Austanáttarvika?

Nú er kuldinn að hverfa aftur norður í haf og angrar okkur vonandi ekki aftur alveg á næstunni. Ekki er nú samt útlit fyrir hlýindi næstu daga. Landið verður í hægri austanátt - sem verður heldur sterkari við jörð en í háloftunum - að sögn reiknimiðstöðva. Kortið að neðan nær yfir mestallt norðurhvel norðan við 30. breiddarstig, Ísland er rétt ofan við miðja mynd.

 

 

 

 

 

 

 

 

 

 

 

 

Jafnhæðarlínur 500 hPa-flatarins eru heildregnar, því þéttari sem þær eru því meiri er vindurinn en hann blæs samsíða línunum með lægðir á vinstri hönd. Þykktin er sýnd með litum, kvarðinn batnar við stækkun. Því meiri sem þykktin er því hlýrra er loftið. Grænir (og bláir) litir eru kaldari en þeir gulu og brúnu. Ísland er rétt á mörkum gula og græna litarins - og telst það viðundandi á þessum árstíma - en ekki meira en það. 

Mikil háloftalægð er suðvestur í hafi og beinir til okkar austlægum áttum. Enn fáum við ekki frið fyrir lægðarbeygjunni - þess vegna er varlegt að gera ráð fyrir alveg þurru veðri. Úrkomusvæði koma hvert á fætur öðru suðaustan- og austanað, flest eru þó veigalítil - ef trúa má reiknimiðstöðinni.

Mikil hlýindi eru enn yfir Norðurlöndum - þar er þykktin á kortinu yfir 5640 metrum - svo mikla þykkt sjáum við næstum aldrei hér við land (en vonumst samt eftir henni á hverju sumri). Enn er verið að slá hitamet í Eystrasaltslöndum og séu spár réttar gætu fleiri met fallið bæði þar og í Skandinavíu. 

Kuldapollarnir yfir Norðuríshafi eru öflugir - en fyrirferðarlitlir og enn mun bráðnun halda áfram. Sólarylurinn verður veigaminni með hverjum deginum - svo fer að lokum að ísinn hættir að bráðna nema þar sem vindur flæmir hann út í hlýrri sjó - sem náð hefur að vera auður um einhverja hríð.  

Athugasemdir

[Helga Kristjánsdóttir, 4.8.2014 kl. 03:08]

Af góðum fræðandi lýsingum slepptum,eru teiknuðu myndirnar af kerfunum,lægðunum merktar og litaðar til skilgreiningar á hitastigi,alveg eins og af óttalegum forynjum. Þetta er gamanmál,en þakka mikið fyrir þínar færslur,Mb.Kv.

[Erlingur Björn (IP-tala skráð) 4.8.2014 kl. 16:48]

Hvers vegna hefur Ísland alveg sloppið við Global Warming?

Hér hefur nefnilega verið svalt, vætusamt og sólarlítið undanfarin sumur, en hvert hitametið slegið af öðru í norðanverðri Evrópu, sérstaklega í Skandinavíu og í löndunum í kringum Eystrasalt, Rússlandi og Mið-Asíu.

Er þetta ekki verðust rannsóknarefni?

[Trausti Jónsson, 4.8.2014 kl. 22:22]

Þakka góðar undirtektir Helga. Erlingur. Það hefur hlýnað alveg jafn mikið hér á landi og að meðaltali í heiminum -. Fyrstu sjö mánuðir þessa árs eru þeir hlýjustu sem vitað er um í Grímsey og á Akureyri - þrátt fyrir sólarleysi og rigningu á Suðurlandi er hitinn þar samt í einu af efstu sætunum. Hiti í Stykkishólmi hefur t.d. aldrei verið hærri í júní heldur en á þessu ári. Mjög hlýir dagar hafa hins vegar verið fáir.