Reykjavíkursumarúrkoma nálgast met

Þegar þetta er skrifað (mánudagskvöldið 21. júlí) hefur úrkoma í Reykjavík það sem af er júlí mælst 76,4 mm. Mesta úrkoma sem vitað er um í júlí mældist 126,9 mm. Það var 1885. Litlu minna mældist í júlí 1926 117,6 mm. Eins og málin standa nú er heldur á móti líkum að núverandi júlímánuði takist að komast upp fyrir þessa fyrri bleytu. 

Aftur á móti var júní sérlega úrkomusamur, sá næstblautasti sem vitað er um. Nú er ljóst að þessir tveir mánuðir saman eru komnir upp fyrir öll önnur júní- og júlípör - nema eitt, 192,2 mm hafa nú mælst síðan 1. júní. Júní og júlí 1899 skiluðu samtals 211,9 mm - það er metið. Nú vantar aðeins tæplega 20 mm upp á að það náist. Það getur varla talist ólíklegt að 20 mm skili sér fyrir mánaðamótin - en auðvitað er það engan veginn víst.

Við skulum líta á línurit sem sýnir samanlagða úrkomu í júní og júlí frá upphafi mælinga 1885.

w-blogg220714i

 

 

 

 

 

 

 

 

 

 

 

 

 

Lóðrétti ásinn sýnir úrkomumagn, en sá lárétti markar árin. Hafa verður í huga að á árunum 1908 til 1919 voru engar úrkomumælingar í Reykjavík - en aftur á móti var mælt á Vífilsstöðum. Þótt þær athuganir séu að sumu leyti ótrúverðugar látum við þær fylla upp í eyðuna eins og hægt er.

Hér sést glöggt hversu afbrigðilegir núlíðandi sumarmánuðir eru í langtímasamhenginu. Auk 1899 stinga 1923 og 1984 sér upp fyrir 180 mm.

Svo sjáum við líka hversu óvenjuleg sumrin sex, 2007 til 2012 eru í langtímasamhenginu. Úrkoman í júní og júlí var þá sérlega lítil - örfá ár eru samkeppnisfær - en aldrei neinir áraklasar í líkingu við þessa sex ára röð. - Kannski ekki að furða að raddir heyrðust um að veðurfar í Reykjavík hefði breyst endanlega til batnaðar. En - .

Þótt sagan segi okkur að líklegt sé að rigningatíð haldi áfram í ágúst er samt alls ekki hægt að ganga að því vísu. Sumrin 1899 og 1984 var engin miskunn í ágúst. Júní, júlí og ágúst þessi ár skiluðu yfir 300 mm alls, en ágúst 1923 var hins vegar í þurrara lagi. Annars eru kröfur um þurrk orðnar svo miklar að ágúst má verða í þurrasta lagi til að ekki verði kvartað undan úrkomunni hver sem hún verður. 

Lauslega er fylgst með stöðu hita- og úrkomumála á fjasbókarsíðu hungurdiska:

https://www.facebook.com/groups/hungurdiskar/


« Síðasta færsla | Næsta færsla »

Athugasemdir

1 identicon

Þetta er nú meira skítasumarið. Sólin hefur varla sést og það rignir nánast upp á dag. Maður saknar mikið gömlu góða sumardaganna á síðasta áratug. Alls staðar í kringum okkur er búið að vera brakandi sumar og sól og mikil veðurblíða. Við þurfum þá alla vegana ekki að óttast þurrka hér á landi!

Sumarið sem á að vera skemmtilegasta tíminn þar sem að maður safnar kröftum í sólskini og hlýju, er orðið leiðinlegasti tíminn. Þetta bara alls ekki búið að vera gleðilegt sumar. Maður er strax farinn að kvíða fyrir næsta sumri, því það verða örugglega sömu vonbrigðin og þetta sumar.

Og fyrst að það er farið rigna svona mikið á annað borð, þá ætla ég bara að vona að það rigni bara í allan næsta vetur. Við fáum þá amk. hlýjan vetur og engan snjó.

Siggeir Helgi (IP-tala skráð) 22.7.2014 kl. 02:09

2 identicon

Sumarið er orðinn langversti árstíminn hér. Undanfarin ár hefur hver hörmungin rekið aðra í sumarmálum. Það er rétt að á síðasta áratug komu nokkur mjög góð sumur: 2003, 2004, 2007 og 2008. Það hlýtur að vera einsdæmi að komið hafi fjögur góð sumur sama áratuginn.  Eftir 2010 fer litlum sögum af svoleiðis löguðu.

Gunnar Valdimarsson (IP-tala skráð) 22.7.2014 kl. 07:06

3 Smámynd: Sindri Karl Sigurðsson

Flytjið bara austur kæru vinir. Þar er sól og blíða eins og á að vera yfir sumarmánuðina, SV er enginn útsynningur hér á bæ.

Kveðja úr blíðubrakinu að Austan.

Sindri Karl Sigurðsson, 22.7.2014 kl. 21:02

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Jan. 2020
S M Þ M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Nýjustu myndir

  • w-blogg220120a
  • w-180120ia
  • w-blogg180120a
  • w-blogg-150120a
  • w-blogg140120b

Heimsóknir

Flettingar

  • Í dag (23.1.): 274
  • Sl. sólarhring: 530
  • Sl. viku: 3126
  • Frá upphafi: 1881100

Annað

  • Innlit í dag: 246
  • Innlit sl. viku: 2809
  • Gestir í dag: 242
  • IP-tölur í dag: 237

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband