Enn meiri rigning (en breyting samt)

Landið hefur nú setið í sömu háloftalægðarmiðjunni frá mánaðamótum. Hún er nú að þokast norður af og grynnist. Ný kemur í staðinn - en sú virðist ekki ætla að lenda á sama stað og hin fyrri (sé að marka spár). Það er þó óhætt að upplýsa strax að í þessu felst líklega lítil bót (engin) fyrir landið sunnanvert. 

En lægðin er ekki alveg búin að ljúka sér af. Fyrsta kortið hér að neðan sýnir uppsafnaða úrkomu sem harmonie-líkanið hellir yfir landið næstu tvo sólarhringa, frá þriðjudegi kl. 18 til fimmtudags kl. 18.

 

 

 

 

 

 

 

 

 

 

 

 

Kvarðinn og tölurnar, sem eru í mm, skýrast sé kortið stækkað. Þetta má heita dæmigerð dreifing úrkomu undir háloftalægð að sumarlagi (þó er þurrara norðaustanlands heldur en allra dæmigerðast er). Úrkoman er almennt mest inn til landsins, svæðin eru þó „misvön“ þessu magni. Sunnanlands er meðalúrkoma júlímánaðar alls víða á bilinu 65 til 85 mm - en langt yfir 100 þar sem mest er. Á Norðurlandi vestanverðu er hún hins vegar ekki nema 30 til 40 mm. Talan 20 mm er því „aðeins“ um fjórðungur meðalmánaðarúrkomunnar sunnanlands (eða minna) - en helmingur hennar fyrir norðan. 

Landið veit einhvern veginn af þessu - rétt eins og menn sem eru misvel búnir til fótanna blotna mismikið í sömu rigningu. 

En við skulum ekki taka mikið mark á smáatriðunum á kortinu. Það er t.d. harla ótrúlegt að Álftanes utanvert og Seltjarnarnes sleppi að mestu við úrkomu (hún er samkvæmt spánni minni en 1 mm) þessa tvo daga - en það er svosem aldrei að vita.

En þetta er sumsé dæmigert fyrir úrkomudreifingu undir háloftalægð - við getum þóst sjá að hún á að þokast norðurfyrir (suðvestanátt tekur við) á því að lítið á að rigna inn til landsins á Norðausturlandi eins og fyrr sagði.

Meðalveðurkort vel ástandið sem hefur verið ríkjandi síðustu tíu daga. 

 

 

 

 

 

 

 

 

 

 

 

 

Jafnhæðarlínur 500 hPa-flatarins eru heildregnar - en litir sýna hæðarvik, blá þar sem hæð flatarins hefur verið undir meðallagi, en bleik þar sem hæðin hefur verið yfir því. Margar jafnhæðarlínur hringa sig um lægðarmiðjuna - sem þýðir að hún getur ekki hafa hreyfst mikið (annars myndi hún „smyrjast“ út).

Meðalkort næstu tíu daga (frá evrópureiknimiðstöðinni) er dálítið öðru vísi.

 

 

 

 

 

 

 

 

 

 

 

 

Hér hafa neikvæðu vikin hörfað langt suður í haf - en háþrýstisvæðið fyrir austan sótt að okkur (þó ekki nóg). Mjög eindregin sunnanátt er ríkjandi - standist þessi spá mun halda áfram að rigna um landið sunnanvert - jafnvel mikið á köflum. En sunnanáttin er alltaf hlý - sérstaklega norðaustanlands. Gætu þar komið einhverjir mjög hlýir dagar rætist þessi spá.

Þessi umskipti (sem kannski fáir sunnlendingar finna á skinni sínu) eiga þó ekki að verða fyrr en háloftalægðin hefur yfirgefið okkur - við eigum ekki að losna við lægðarbeygju hennar fyrr en síðdegis á fimmtudag. 

Það munar hins vegar grátlega litlu að við fáum hin raunverulegu hlýindi, sem verið hafa viðloðandi fyrir austan okkur allan þennan mánuð, til okkar. Ein og ein spáruna á stangli hefur gefið vonir, kannski ein af hverjum 6 til 10 (tvær koma á dag), líkindin eru kannski þessi - 10 til 20 prósent. Það er eiginlega ekki nógu gott. 

Athugasemdir

[Torfi Stefánsson (IP-tala skráð) 16.7.2014 kl. 12:03]

Ég skil þetta ekki (vegna innskotsorðins "alls"). Er búið að rigna 65-85 mm hér sunnanlands það sem af er mánuðinum - og sumstaðar langt yfir 100 mm, eða ertu að tala um eitthvert meðaltal yfir júlímánuð almennt (þetta "alls")?

Og hvað búið að rigna mikið það sem af er mánuðinum hér á höfuðborgarsvæðinu og hvar stendur sú tala hvað metin varðar?

[Trausti Jónsson, 16.7.2014 kl. 13:15]

Hér er átt við meðalúrkomu júlímánaðar alls. Verið er að bera tölurnar á kortinu (tveggja daga úrkomu) saman við venjulega mánaðarúrkomu. Á kortinu eru tölurnar á vestanverðu Norðurlandi ekki ósvipaðar þeim sem sjá má á Suðurlandi vestanverðu - þær eru þó mjög misstór hluti af þeirri venjulegu (meðalúrkomu júlí). Úrkoman það sem af er þessum mánuði er hins vegar víða búin að ná meðaltali mánaðarins (1971 til 2000).