Skammt undan - en samt alveg utan seilingar

Ekki er mjög langt í hásumarloftið - en það er samt alveg utan seilingar (svo langt sem séð verður). Kortið hér að neðan sýnir þykktarspá evrópureiknimiðstöðvarinnar sem gildir á hádegi á sunnudaginn (6. júlí).

 

 

 

 

 

 

 

 

 

 

 

 

 

Jafnþykktarlínur eru heildregnar og merktar í dekametrum (1 dam = 10 metrar). Því meiri sem þykktin er því hlýrri er neðri hluti veðrahvolfs. Litafletir sýna hita í 850 hPa-fletinum, en hann er í um 1300 metra hæð yfir landinu - jöklar og hæstu fjöll stinga sér upp í hann. Á grænum og bláum svæðum er hitinn undir frostmarki. Kortið og þar með tölur og kvarði verða mun læsilegri sé kortið stækkað (í vafra yðar). 

Þykkt sem er minni en 5400 metrar er varla boðleg í júlí - og ekki batnar skúffelsið þegar horft er á kræsingarnar til beggja átta. Við sjáum í 13 stig uppi í hægra horni - opinbert júlíhitamet í 850 hPa yfir Keflavíkurflugvelli er einmitt 12,7 stig [ein gömul mæling í 13,9 - en það þarf að skoða hana betur]. 

Líka er hlýtt í suðvesturhorni kortsins - en ekki alveg eins í 850 hPa og er fyrir norðaustan land.

Og þykktin er heldur ekkert slor - við sjáum 5620 metra línuna við töluna 13 og suðvestur í hafi sést sama lína - en það er miklu venjulegra á þeim suðurslóðum. 

En okkur eru allar bjargir bannaðar - kuldapollurinn stíflar öll innflutt hlýindi - innflutningshöft ríkja. Einhvers staðar verða vondir (kalda loftið) að vera - best væri á skáskjóta því norðvestur til Grænlands [kannski í næstu viku - með tilheyrandi kostnaði] - nú eða þá suðaustur til Frakklands - bretar eru nú þegar litlu betur settir en við. 

Nokkur vindhraðamet júlímánaðar féllu á sjálfvirku stöðvunum í dag (föstudag 4. júlí), t.d. á Ísafirði, Súðavík, Hraunsmúla í Staðarsveit, Garðskagavita og Þingvöllum en allar þessar stöðvar byrjuðu að athuga fyrir aldamót. Eitthvað óvenjulegt er þetta. 

Sömuleiðis að ekki tók nema þrjá daga fyrir úrkomuna í Mjólkárvirkjun að komast upp fyrir meðaltal júlímánaðar.  

Athugasemdir

[Guðbjörg Snót Jónsdóttir (IP-tala skráð) 5.7.2014 kl. 11:00]

  Þakka þér fyrir allan þinn flóðleik um veður fyrr og síðar. Ég sagði nú í morgun. þegar ég heyrði veðurfréttirnar, að þetta myndi verða sumarið, sem kom og fór, án þess að verða nokkurn tíma almennilegt sumar, ef þetta ætti að verða svona áfram. Ég skil ekki orðið þróunina í þessu veðri hérna á Íslandi, og ég hugsa, að svo sé um fleiri. Mér finnst orðið svo lítill munur á árstíðum veðurfarslega séð, að það er mjög erfitt að átta sig á því, hvort það er vetur, sumar, vor eða haust. Veðrið er eiginlega alltaf eins. Veðurfarið hér á Íslandi í dag miðað við það, sem áður var, ekki síst, þegar ég var að alast upp á sjötta og sjöunda áratug síðustu aldar, er orðið þvílíkt, að maður fer að spyrja sjálfan sig, hvort jörðin sé að umpólast. Mér fannst ég líka einhvern tíma lesa eitthvað um það í erlendum blöðum, að svo væri. Þetta er mjög undarlegt veðurlag orðið hérna á landinu, en það væri fagnaðarefni, ef kæmi einhvern tíma almennilegt sumar, áður en sumarið liði. Hundadagarnir fara bráðum að byrja. Ég man þá tíð, að fyrstu vikur júlímánaðar voru alltaf góðir, en eftir 13. júlí, upphaf hundadaga, þá var stöðug rigning. Þetta er ekki til í dæminu lengur. Ég vona svo sannarlega, að komi hlýrri vindar hérna á næstu vikum en blása í gegnum gluggann hjá mér í Vesturbænum þessa stundina.

[Trausti Jónsson, 5.7.2014 kl. 13:29]

Þakka þér fyrir Guðbjörg. Hundadagar þóttu skæðir á árum áður og almenn sú skoðun að rigndi við upphaf þeirra væri sumarið búið. Ekki hefur það þó alltaf farið svo. Fyrir 8 árum voru júnímánuður og fyrri hluti júlí - og þar á meðal fyrstu hundadagarnir sérlega leiðinlegir með rigningarhvassviðrum og hálfgerðu haustveðri. En þá breytti snögglega um tíð og hélst gott það sem eftir lifði sumars. Mörg mjög slæm hret hafa komið snemma í júlí - kannski bý ég til lista yfir einhver þeirra.

[Sigurður Þór Guðjónsson, 5.7.2014 kl. 15:11]

"Það væri fagnaðarefni ef einhvern kæmi almennilegt sumar áður en sumarið liði." Einhvern tíma! Þegar alla þesa öld hafa komið sumur hvert öðru betri, hlý og sólrík sem sjaldan fyrr. Þangað til í fyrra.  Annars hafa verið frábær sumur í háa herrans tíð. Þetta er í annað sinn á nokkrum dögum sem ég hef séð fólk á netinu vera að lofa sumrin eftir miðja síðustu öld og áfram á kostnað síðustu ára. Þvílík öfugmæli!

[Emil Hannes Valgeirsson, 5.7.2014 kl. 16:55]

Sumrin 2007-2012 voru sérlega góð í Vesturbænum.