Óvenjudjúp lægð(?)

Óvenjueitthvað dag eftir dag? Já, þannig verður það víst að vera. Það verður að teljast óvenjulegt þegar reiknimiðstöðvar spá loftþrýstingi nærri lágmarksmeti júlímánaðar. En athugum samt að lægðin er ekki komin - og varla orðin til þegar þetta er skrifað (seint á sunnudagskvöldi 30. júní). - Stundum eru lægðir líka dýpri í spám heldur en þær verða í raun og veru. 

En það er samt þannig að þrýstingur hefur ekki nema 13 sinnum mælst lægri en 980 hPa hér á landi í júlímánuði (frá 1873) - svona á 10 ára fresti að meðaltali - en fjórum sinnum á síðustu tuttugu árum. Það hefur aðeins gerst þrisvar að þrýstingur hefur mælst lægri en 975 hPa hér á landi - á  40 til 50 ára fresti að meðaltali - en aldrei undir 972,4 hPa. Það met var reyndar sett fyrir aðeins tveimur árum, 22. júlí 2012, þegar loftvogin á Stórhöfða (leiðrétt til sjávarmáls) sýndi þessa tölu. Þrýstingur í lægðarmiðjunni þeirri var lægstur áður en hún rakst á landið, evrópureiknimiðstöðin sýndi 967,8 hPa - sjá kortið hér að neðan - það batnar við stækkun þannig að hægt er að lesa haustextann.

 

 

 

 

 

 

 

 

 

 

 

 

[Athugið vel að kortið er frá árinu 2012 - en á ekki við næstu daga]. Þótt landið sé stórt, 100 þúsund ferkílómetrar, er það aðeins lítill hluti lægðaleikvangs Atlantshafsins. Því eru líkur á því að 970 hPa lægð hitti á landið í júlí - einmitt þegar hún er dýpst - ekki svo miklar - jafnvel þótt þær séu margar á sveimi um leikvanginn. 

Þegar þetta er skrifað spáir evrópureiknimiðstöðin lægðinni nýju niður í 971 hPa á miðvikudagskvöld - og að þá verði hún við norðausturströndina. Bandaríska veðurstofan sýnir lægst 980 hPa á svipuðum tíma - ansi munar miklu. Kanadíska veðurstofan er þarna á milli - með 977 hPa og sú breska líka, með 975 hPa. 

En það er annað. Þessar miðstöðvar spá allar óvenjulágum 500 hPa-fleti á sama tíma. Lægsti 500 hPa flötur sem við höfum frétt af yfir Keflavíkurflugvelli í júlímánuði er 5240 metrar - og í endurgreiningum má finna tölur niður í 5210 metra.

Það gæti því verið að atlagan að 500 hPa-hæðarmetinu verði harðari heldur en sú sem beint er að loftþrýstingi til sjávarmál. E.t.v. á svipað við um aðra hæðarfleti, 300 hPa met eru t.d. líka í hættu, en eldri gögn eru lítt aðgengileg og þvæla málið. 

Eins og venjulega láta hungurdiskar Veðurstofuna um veðurspár næstu daga - en halda áfram að fylgjast með því óvenjulega. 

Svo er spurningin hversu langan tíma tekur að hreinsa upp eftir þessa lægð - kippir hún meiru en fjórum til fimm dögum út úr sumrinu hlýja? Tekst henni að ná í kalt loft norðan úr höfum? 

Hafi lesendur fyrirspurnir eða athugasemdir eru þeir vinsamlega beðnir um (sé þeim það unnt) að beina þeim frekar á fjasbókarsíðu hungurdiska [https://www.facebook.com/groups/hungurdiskar/] heldur en á þetta blogg. Fjasbókarfjendur geta þó reynt bloggið - en ekki er öllum athugasemdum hleypt þar samstundis að.

Athugasemdir

[Sigurður Antonsson, 30.6.2014 kl. 02:39]

Misvísandi veðurspár frá sömu veðurstofu?

Í sjónvarpinu í gær var spáð miklum vindhviðum á Snæfellsnesi.

Þori varla að hafa eftir vindhraða. Um allt vestanvert landið á að vera mikill vindur og rigning, þriðjudag og miðvikudag. Samkvæmt henni þarf að vara ferðalanga betur við. Allt lauslegt þarf að njörva niður?

Allt annað er að sjá á sjálfvirkri veðurspá.

[Torfi Stefánsson (IP-tala skráð) 30.6.2014 kl. 04:55]

"sumrinu hlýja"?

Mér finnst nú nær að tala um rigningarsumarið hér á Suður- og Vesturlandi, enda verður maður lítið var við "hlýindin" þegar rignir og er þungbúið dag eftir dag eins og allur júnímánuður hefur verið meira og minna. Er þetta annað árið í röð hér á suðvesturhorninu sem þetta er raunin.

Talandi um hlýindi þá er kalt um alla norður Evrópu þessa daganna og spyrja Norðmenn sig t.d. hvort sumarið sé búið.

Eitthvað virðist þannig hafa dregið úr hnattrænu hlýnuninni!

[Sigurður Þór Guðjónsson, 30.6.2014 kl. 14:28]

Hlýindi og rigningar geta auðvitað farið saman. Ekki er hægt af nokkru viti að horfa framhjá þessum miklu hlýindum sem ríkt hafa í júni sem víða er að slá met fyrir meðalhita júnímánaðar. Hlýindi eru þetta og hlýindiskulu þau heita. Að komi tveir úrkomusamir og sólarlitlir júnímánuðir í röð (samt ekkert sérlega líkir að öðru leyti) , jafnvel heilt sumar, og þó þau væru þrjú, er svo hversdagslegt fyrirbrigði á Íslandi að það boðar ekki neinar raunverulegar veðurfarsbreytingar, hvorki hér né annars staðar, hvað þá heimskólnun eftir hlýjasta maí í sögu mælinga í heiminum. - en kannski heimsendi!

[Einar Þór (IP-tala skráð) 30.6.2014 kl. 19:06]

Þó svo að meðalhiti sé "hár" í sögulegu samhengi, þá hefur sumarið ekki verið neitt sérlega hlýtt hvað þá gott.

Maður þarf ekki að vera með Ph.-gráðu í veðurfræði, hvað þá stærfræði til að finna það út, að þegar dagshiti er 12 gráður, og næturhitinn 9 gráður, þá fær maður út meðalhita sem er 10,5 gráður yfir daginn.

Sumarið er þrátt fyrir reiknaðan háan meðalhita, ekki búið að vera sérlega gott og í raun ömurlegt, en þetta mun kalla á sannkallaða sprengingu í utanferðum landans til veðurbetri staða seinna í sumar.

Sigurður Þór, ég skil umkvartanir fólks vel varðandi leiðinlegt sumarveður. Sumarið er stutt hér á landi og á að vera besti tími ársins veðurfarslega séð og sá bjartasti, og fólk er búið að hlakka til að njóta sumarfrísins í góðu veðri og sólskini. Og svo verður þetta einn sá dimmasti og votasti og eyðileggur sumarfrí fólks.