Óvenjuleg hlýindi - fjúka hjá

Óvenju hlýtt hefur verið víða um land í dag (þriðjudag 26. nóvember) og í gær. Sérlega hlýtt hefur verið á Austfjörðum og komst hiti í 20,2 stig á Dalatanga. Sjaldgæft er að hiti nái 20 stigum í nóvember og aðeins er vitað til þess að það hafi gerst í tveimur fyrri nóvembermánuðum, 1999 og 2011. Í nóvember 1999 fór hiti raunar í 20 stig tvisvar með nokkurra daga millibili.

Hámarkshitamet mánaðarins var sett í fyrri hrinunni 1999, 23,2 stig mældust þá á sjálfvirku stöðinni á Dalatanga og 22,7 á mönnuðu stöðinni á sama stað.

Hitinn í dag er sá hæsti sem mælst hefur svo seint á árinu og var dægurmet dagsins slegið svo um munaði, fyrra metið var sett á Skjaldþingsstöðum í Vopnafirði 1994 og var 14,5 stig. Met dagsins var sum sé 5,7 stigum hærra.

Mikil hrúga af dægurmetum stöðva féll eins og vera ber, flest á sjálfvirkum stöðvum sem ekki hafa athugað lengi, en dægurmet féllu reyndar á mönnuðu stöðinni á Akureyri þar sem nokkuð öruggur dægurhámarkalisti nær aftur til 1938 (13,9 stig) - og á mönnuðu stöðinni á Dalatanga en þar er dægurmetalistinn 64 ár (65 með nýju færslunni).

Tafla sem sýnir ný met fyrir nóvember allan á veðurstöðvunum er hins vegar heldur rýr. Hitahrinurnar 1999 og 2011 eiga enn flestöll mánaðametin. Þeim var ekki haggað í dag.

Hvasst var á landinu í dag og á hvassviðrið sinn þátt í hinum háa hita. Það er óvenjulegt að hiti á veðurstöð nái mættishita í 850 hPa. Yfirleitt blandast hlýindin í háloftunum við kalt loft neðar þannig að munur sé á þessu tvennu - jafnvel fljóti hlýja loftið alveg yfir. Evrópureiknimiðstöðin sagði mættishitann við Austurland hafa komist í rúm 20 stig. Þykktin var meiri en 5540 metrar - það er eins og á góðum sumardegi.

En þetta er væntanlega það hlýjasta í bili, við vonum auðvitað það besta en ekki er víst að 20 stigunum verði náð aftur fyrr en í maí næsta vor - eða enn síðar. Veðrið hefur samt lag á að koma okkur sífellt á óvart. Umhleypingarnir eiga samt að halda áfram en með venjubundnari hita. Svo er alltaf eitthvað kuldakast lengra framundan ef trúa má spánum. Við vonum að slíkt rætist ekki.

Vegna flókinna átaka á alþingi hungurdiska um framtíðarritstjórnarstefnu miðilsins verður minna um pistla á næstunni en verið hefur að jafnaði undanfarin ár. Leitað er pólitískra lausna.

Athugasemdir

[Brynjólfur Tómasson, 27.11.2013 kl. 10:02]

Takk fyrir þetta, fræðandi og skemmtilegt. 

[Haraldur Haraldsson, 27.11.2013 kl. 11:12]

Einnig takk frá mér þú ert frábær veðurfræðingur og fl.Kveðja

[Gunnar Sæmundsson (IP-tala skráð) 27.11.2013 kl. 16:01]

Bestu þakkir. Vonandi finnst "pólitísk" lausn hið fyrsta. Veit ekki hvernig maður þolir

við ef ekki koma frá þér pistlar.

Kveðja 

[Pálmi Freyr Óskarsson, 27.11.2013 kl. 18:02]

Við Stórhöfðafeðgar eru sammála þeim Brynjólfi, Haraldi og Gunnari. Endilega ekki láta "sérvitringinn" Hilmar eyðileggja þetta veðurblogg.

[Sveinn Atli Gunnarsson, 28.11.2013 kl. 01:18]

Takk fyrir góða pistla í gegnum tíðina og vonandi heldur áfram stöðugur straumur veðurfróðleiks á blogginu - hvað sem líður pólitísku argaþrasi á ritstjórninni.

[Birna Lárusdóttir (IP-tala skráð) 28.11.2013 kl. 13:30]

Kærar þakkir fyrir allan fróðleikinn, má ekki til þess hugsa að þessir pistlar hætti að sjást.

[Hilmar Hafsteinsson (IP-tala skráð) 28.11.2013 kl. 14:53]

Á ekkert að ræða hrakfarirnar á loftslagsráðstefnunni í Póllandi á alþingi hungurdiska? :)