Veðrið gengur smám saman niður

Norðanveðrið sem plagað hefur landsmenn i dag (sunnudag) fer að ganga niður - gangi spár eftir. Það gerist að vísu ekki snögglega og víða um land verða leiðindi allan mánudaginn. En á kortinu hér að neðan má sjá að þrýstingur stígur mun meira austan við land heldur en vestan við þegar spáin gildir, það er ki. 6 á mánudagsmorgni (16. september). Við þetta fækkar jafnþrýstilínum yfir landinu.

Heildregnar línur sýna sjávarmálsþrýsting með 4 hPa bili. Blálituð svæði sýna hvar þrýstingur hefur stigið síðastliðnar þrjár klukkustundir en rauð hvar hann hefur fallið. Yfir Austurlandi hefur hann stigið um 2 til 4 hPa frá kl. 3 en lítið vestanlands.

Ef við teljum jafnþrýstilínurnar kemur í ljós að þrýstimunur á milli Austfjarða og Vestfjarða er hér um 25 hPa en var 32 hPa kl. 21 í kvöld (sunnudag) og 30 hPa á miðnætti. Þrýstibrattinn dettur þar með niður um 7 hPa og jafnaðarþrýstivindur minnkar úr rúmum 30 m/s niður í um 25 m/s. Það munar um það - þótt í reynd sé þrýstivindurinn í þessu tilviki mun meiri yfir landinu Austanverðu heldur en þessar jafnaðartölur sýna.

Kl. 21 á mánudagskvöld á þrýstimunurinn yfir landið að vera kominn niður í 18 hPa og jafnaðarþrýstivindur því niður í um 15 m/s. En þetta er bara landsmeðaltal - vindstrengir munu þrjóskast við hærri tölur en þetta.

Athugasemdir

[Sigurður Þór Guðjónsson, 16.9.2013 kl. 01:50]

Og þetta gæti ekki verið meiri viðbjóður um miðjan  september.

[Hilmar Hafsteinsson (IP-tala skráð) 16.9.2013 kl. 19:24]

Getum við ekki verið sammála um að það sé að kólna á Íslandi Trausti? :)

[Trausti Jónsson, 17.9.2013 kl. 00:40]

Já, þetta er skelfilegur viðbjóður. Það hefur hingað til alltaf kólnað á Íslandi á haustin - en segir auðvitað ekkert um kólnandi eða hlýnandi veðurfar á áratugavísu.

[Hilmar Hafsteinsson (IP-tala skráð) 17.9.2013 kl. 13:17]

Hvernig væri þá að draga huluna af útreikningum Veðurstofunnnar á meðaltalshita á ársgrundvelli á Íslandi síðustu 100 árin a.m.k.? Þær niðurstöður ættu væntanlega að segja okkur eitthvað um kólnandi eða hlýnandi veðurfar á áratugavísu - eða hvað? :)