Kuldi við norðurskautið

Háloftakuldapollurinn við norðurskautið virðist ekkert vera að gefa sig. Hann er talsvert kaldari heldur en á sama tíma í fyrra. Hæð 500 hPa-flatarins er meir en 200 metrum undir meðallagi í pollinum - en ritstjórinn hefur ekki alveg á tilfinningunni hversu algengt það er á þessum árstíma. Rétt er þess vegna að ræða ekki meira um það að svo stöddu.

En kortið nær yfir megnið af norðurhveli suður um 30. breiddarstig og gildir um hádegi á föstudag 2. ágúst. Jafnhæðarlínur eru heildregnar en þykktin sýnd í lit. Munum að hún mælir meðalhita í neðri hluta veðrahvolfs. Því meiri sem hún er því hlýrra er loftið. Kvarðinn á myndinni batnar mjög við stækkun.

Á föstudaginn hefur hiti hér á landi aðeins jafnað sig eftir kuldann sem nú í nótt og á morgun (fimmtudag) ríkir um mikinn hluta landsins. Megnið af landinu er á gulu svæði en það sýnir sumarhita (lágan að vísu).

Mikil hlý tunga flæðir norður um Evrópu vestanverða, svo sýnist sem 5700 metra jafnþykktarlínan nái norður til Danmerkur - það telst mjög mikil þykkt á þeim slóðum. Þetta hlýja loft fer hjá í alskýjuðu veðri og sennilega rigningu þannig að hitinn fer ekki nærri því eins hátt og yrði ef sólar nyti. Það er helst að aðfaranótt laugardags verði óvenjuhlý. Síðan kólnar aftur.

Annars bar það til tíðinda í gær að hiti í Maniitsoq/Sukkertoppen á Grænlandi fór í 25,9 stig. Að sögn dönsku veðurstofunnar er þetta hæsti hiti sem mælst hefur á Grænlandi það tímabil sem gagnagrunnstaflan sem miðað er við nær til. Það er frá og með 1958. Eitthvað rámar ritstjórann í eldri og hærri grænlenskar tölur, en meðan danska veðurstofan upplýsir okkkur ekki betur um það látum við gott heita.

Á vef dönsku veðurstofunnar er nú einnig frétt um danska norðurljósaleiðangurinn á Akureyri veturinn 1899 til 1900 og má þar sjá margar góðar og skemmtilegar myndir sem teknar voru í kampavínsleiðangri akureyringa á Súlur nú á dögunum. Tilefnið var sýning Minjasafnsins á myndum sem gerðar voru í danska leiðangrinum. Í nýlegum fréttum af leiðangrinum og sýninguna er oftast talað um Dönsku veðurfræðistofnunina - það er að vísu nákvæm þýðing nafnsins - en alsiða er hér á landi að tala um Dönsku veðurstofuna. Veðurstofa Íslands tók við athugunum af þeirri dönsku 1920.

Veðurstofan birtir væntanlega yfirlit um júlímánuð á morgun (fimmtudag), en hiti komst yfir meðallagið 1961 til 1990 hér í Reykjavík, en var talsvert undir meðalagi síðustu ára.

Í síðari hluta mánaðarins mældist hiti 20 stig eða meir í fjórtán daga í röð - sem verður að teljast mjög gott. En í dag, miðvikudaginn 31. júlí, komst hiti ekki svo hátt - og aðeins ein stöð náði hæsta hita sumarsins. Það var Tálknafjörður þar sem hitinn komst í 16,7 stig, vonandi að þar komist hann enn hærra í ágúst.

Athugasemdir

[Hilmar Hafsteinsson (IP-tala skráð) 1.8.2013 kl. 20:19]

Kuldi við norðurskautið?

Akureyri (föstudagur): Hámarkshiti 9°C; (laugardagur): Hámarkshiti 8°C; (sunnudagur): Hámarkshiti 5°C; (mánudagur): Hámarkshiti 5°C.

Egilsstaðir (föstudagur): Hámarkshiti 7°C; (laugardagur): Hámarkshiti 7°C; (sunnudagur): Hámarkshiti 5°C; (mánudagur): Hámarkshiti 5°C (http://weatherspark.com).

[Anna Sigríður Guðmundsdóttir, 1.8.2013 kl. 21:50]

Takk fyrir þetta Trausti. Þú og Páll Bergþórsson eru veðurfræðingarnir, sem ekki látið stjórnast í blindni, af múgæsings-heimsveldis-stjórnunar-skólun og einhliða túlkun bókstafs-trúar veðurfræðinnar.

Þið tveir látið sem betur fer stjórnast af ykkar eigin brjóstviti, þekkingu, innsæi og raunverulegri víðsýni, með heiðarleikann og sannleikann að leiðarljósi.

Okkur ber öllum að þakka fyrir þá fáu einstaklinga, sem standa með því sem er heiðarlegt, raunverulegt, ó-eigingjarnt/ókeypis og satt.

M.b.kv.