Nóttin kalda

Ágúst byrjar mjög kuldalega - eftir að júlí hafði náð sér upp úr volæðinu á frábærum endaspretti. Nánari fréttir af júlí má finna í frétt á vef Veðurstofunnar.

Frost mældist á 12 veðurstöðvum fyrstu nótt mánaðarins, þar af fjórum í byggð (sjá lista í viðhengi). Mest mældist það á Brúsastöðum í Vatnsdal, -2,4 stig. Það reynist vera dægurmet, hiti hefur aldrei mælst jafnlágur í byggð aðfaranótt 1. ágúst. Jökulheimar eiga -2,5 stig sem landsmet þennan dag. það var 1965.

Bjartviðri komandi nætur (aðfaranótt föstudagsins 2. ágúst) býður líka upp á lágan hita. Sérlega þurrt er víða um landið vestanvert og það eykur líkur á næturkulda. Þykktin er þó hærri en var síðastliðna nótt - það hjálpar eitthvað. Möðrudalur á lægsta lágmark 2. ágúst, -3,0 stig sem mældust 1986.

Kuldapollurinn yfir norðurskautinu sem gaf tilefni til  pistils í gær virðist ætla að senda okkur tvo kuldaskammta í næstu viku (ekki gott það) - en spár svo langt fram í tímann riðlast oft þannig að við höfum leyfi til að vona hið besta.

Rétt er að geta þess að nú stendur silfurskýjatíminn sem hæst. Í gær (aðfaranótt miðvikudags) mátti sjá góða sýningu milli kl. 1 og 2 (kannski aðeins lengur) - en skýin eru ekki alveg jafn áberandi nú í kvöld (hvað sem síðar verður). Silfurský sjást oft á lofti hér á landi á tímabilinu 25. júlí til 17. ágúst. Tímabil þeirra er lengra - en hér er allt of bjart þegar sól er lengst á lofti til að hægt sé að sjá þau - síðan hverfa þau snögglega einn daginn um miðjan ágúst þegar hlýna fer í miðhvörfunum (í um 90 km hæð). Það er ein margra ábendinga um að sumri sé farið að halla.

Skrár tengdar þessari bloggfærslu:

• frost 1. ágúst 2013

Athugasemdir

[Hilmar Hafsteinsson (IP-tala skráð) 2.8.2013 kl. 23:33]

Þá er það (væntanlega) staðfest: "...hiti hefur aldrei mælst jafnlágur í byggð aðfaranótt 1. ágúst." Þetta er m.ö.o. nýtt kuldamet í byggð 1. ágúst. Nú fara kuldametin að falla ;)