Hæsti hiti ársins (til þessa)

Mjög hlýtt var norðaustanlands i dag (sunnudaginn 21. júlí) og var hiti á mörgum stöðvum sá hæsti á árinu til þessa - en Vestur- og Suðurland situr enn eftir og gengur illa að rjúfa 20 stiga múrinn. Hæsti hitinn í dag mældist í Ásbyrgi, 26,4 stig.

Í viðhenginu er listi yfir hæsta hita ársins til þessa á sjálfvirkum veðurstöðvum og geta nördin gert sér hann að góðu og leitað að sínum uppáhaldsstöðvum. Í viðhenginu er einnig listi yfir hæsta hita hvers dags það sem af er ári.

Nú er spurning hvort hlýindin nái líka til Suður- og Vesturlands í vikunni. Mánudagurinn er mögulegur en þriðjudagur og miðvikudagur eru þó taldir líklegastir. Hafgolan er þó ágeng við sjávarsíðuna og býsna tilviljanakennt hvar hún heldur hámarkshitanum í skefjum.

Svo sýnist sem meðalhitinn í Reykjavík það sem af er mánuði sé kominn í rétt rúm 10 stig en með því fylgist nimbus í sínu góða skjali.

Viðbót 22. júlí (mánudag):

Hlýindin halda áfram. Í dag (mánudag) náðu 39 sjálfvirkar veðurstöðvar hæsta hita ársins til þessa. Þar á meðal var slæðingur af stöðvum á Suðurlandi sem ættu að geta gert enn betur næstu daga enda er varla boðlegt að kominn sé 22. júlí og hiti í uppsveitum á þeim slóðum ekki búinn að ná 20. stigum. En listi dagsins er í nýju viðhengi.

Skrár tengdar þessari bloggfærslu:

• hæsti hiti ársins til 21.júlí 2013
• 22-júlí hæstur

Athugasemdir

[Gunnar Th. Gunnarsson, 22.7.2013 kl. 12:19]

Magnað að sjá þarna Vattarnes með 19,5. Er það ekki nálægt meti, a.m.k. dægurmeti?

[Sigurður Þór Guðjónsson, 22.7.2013 kl. 12:56]

Papey stendur sig bara vel. Kemst á blað sem methafi eins dags. Kannski er hún öll að sækja í sig veðrið!

[Hilmar Hafsteinsson (IP-tala skráð) 22.7.2013 kl. 13:19]

Hæsti hiti á Íslandi: (30,5°C) Teigarhorn 22. júní, eh... 1939 :)

[Trausti Jónsson, 22.7.2013 kl. 23:40]

Gunnar. Hæsti hiti sem mælst hefur á sjálvirku stöðinni á Vattarnesi er 25,8 stig. Það gerðist í ágústhitabylgjunni í fyrra (2012) 9. ágúst þegar 28,0 stigin mældust á Eskifirði. Hæsti júníhiti þar er 20,3 stig - mældist 22. júlí 2008. Sigurður, að sögn hefur hiti hæst komist í 23,2 stig á sjálfvirku stöðinni í Papey. Það var 26. júlí 1999 (hvort það er rétt er óathugað). Hilmar, ársíslandsmet falla sjaldan - lágmarksmetið er t.d. frá 1918. En um síðir detta bæði þessi hámarks- og lágmarksmet, ekki síst vegna þéttingar mælikerfisins. Þetta gerist alveg ótengt hnattrænni hlýnun eða kólnun svo lengi sem þær breytingar haldast innan sómasamlegra marka.  

[Pálmi Freyr Óskarsson, 23.7.2013 kl. 00:33]

Hérna á Stórhöfða falla bara Vestmannaeyjamet í júlí-úrkomu. Þá meina ég frá 1.-15 og svo 1.-20.

Mesta úrkoma í Vestmannaeyjum 1887(?) - 2013 (1-15):
1.  124,2 mm. 2013 (Vestmannaeyjamet)
2.  118,9 mm. 2006
3.  112,5 mm. 1955.

Mesta úrkoma í Vestmannaeyjum 1887(?) - 2013 (1-20):
1.  161,6 mm. 2013. (Vestmannaeyjamet)
2.  152,5 mm. 1947.
3.  145,6 mm. 1955.


Mesta úrkoma í Vestmannaeyjum 1887(?) - 2013 (1-25):
1.   241,9 mm. 1955.
2.   186,1 mm. 1990.
3.   164,1 mm. 2013 þann. 21. kl.09.
4.   161,1 mm. 1947.


Mesta úrkoma í Vestmannaeyjum 1887(?) - 2013 (1-30):
1.  287,7 mm. 1955.
2.  205,8 mm. 1990.
3.  188,8 mm. 1983.
4.  186,0 mm. 1913.
5.  177,5 mm. 1947.
6.  165,5 mm. 1984.
7.  164,1 mm.  2013 þann 21. kl.09

[Trausti Jónsson, 23.7.2013 kl. 12:02]

Sigurður. Papey hefur á undanförnum 15 árum átt hæsta hita landsins 10 sinnum:

ár mán dagur hæst Pap  hæst land

2003    10      22      7.9     7.9
2003    11      22      6.7     6.7
2004    8       26      17.2    17.2
2005    2       24      9.3     9.3
2005    3       7       10.0    10.0
2005    4       1       9.4     9.4
2005    9       3       15.6    15.6
2010    4       16      12.0    12.0
2011    4       2       10.7    10.7
2013    7       13      16.2    16.2

Pálmi - nú koma nokkrir dagar í röð með lítilli úrkomu (sé að marka spár) - en síðan rignir að nýju.

[Hilmar Hafsteinsson (IP-tala skráð) 23.7.2013 kl. 13:33]

Trausti. Þetta er einkar áhugaverð söguskýring. Íslenskir veðurfræðingar stuðla m.ö.o. að hækkandi hitastigi á landinu með því að þétta mælikerfið!

Reyndar mun ekki af veita. Á ráðstefnunni Miljø 91 sem haldin var í Reykjavík 1991 hélt Páll Bergþórsson veðurstofustjóri því blákalt fram að búast mætti við að hitastig í heiminum hækki um 3°C að meðaltali á næstu öld en um allt að 6°C á norðlægari slóðum.(!)

Þið verðið að þekja landið með hitamælum til að spá fyrrverandi Veðurstofustjóra rætist. . . ;)

[Óðinn (IP-tala skráð) 23.7.2013 kl. 19:18]

Hilmar.

Veður er þitt hjartans mál.

[Trausti Jónsson, 24.7.2013 kl. 01:07]

Hilmar - lágmarksmetum fjölgar líka við fjölgun stöðva - ef þeim fjölgar ekki er að hlýna. Annars tala æðstuklerkar frekar um framtíðarsviðsmyndir heldur en spár þegar rætt er um langa framtíð svosem næstu 100 árin.

[Hilmar Hafsteinsson (IP-tala skráð) 24.7.2013 kl. 01:45]

Trausti - þetta er merkilegt. Páll Bergþórsson nefnir hvergi "framtíðarsviðsmyndir" í frétt mbl. Þvert á móti er hann afdráttarlaus í framtíðarspádómum sínum:

"Páll sagði, að 4°C hærri meðalhiti á Íslandi árið 2060 myndi þýða, að á landinu yrðu svipuð veðurskilyrði og nú eru á Skotlandi. Því væru aukin gróðurhúsaáhrif að sumu leyti spennandi umhugsunarefni fyrir Íslendinga. Vaxtarskilyrði birkiskóga gætu aukist um 50%, á láglendi gætu ýmsar jurtir og grænmeti þrifist, og graslendið gæti fætt tvöfalt stærri kúastofn en hér er nú svo eitthvað sé nefnt."

Samkvæmt framtíðarsýn Veðurstofustjóra ætti meðalhiti á Íslandi að vera farinn að hækka ótæpilega - ekki satt? - og markvert stígandi. Sannkölluð hitabylgja í júlí 2013 á Íslandi?

En auðvitað má vera að hér sé óvandaðri blaðamennsku um að kenna.

Ps. Fréttina má finna hér: http://timarit.is/view_page_init.jsp?issId=124038&pageId=1745351&lang=is&q=13%201991

[Emil Hannes Valgeirsson, 24.7.2013 kl. 09:29]

Hilmar. Það mun koma í ljós árið 2060 hvort Páll hafi haft rétt fyrir sér en þetta var sagt árið 1991 og spurning hvort Páll sé enn sömu skoðunar. Það má þó athuga hvernig gengur með hlýnunina.

Meðalhitinn í Reykjavík á 5 ára tímabili kringum 1991 (1989-93) er 4,36°

Meðalhitinn í Reykjavík síðustu 5 ár (2008-12) er 5,54°

Þarna munar meira en gráðu eða 1,18°. Á ári er þá hlýnunin 0,062° að meðaltali og ef sama þróun heldur áfram verður meðalhitinn 4,28° hærri á Íslandi árið 2060.

Því má svo bæta við að fyrri hluti árs 2013 er hlýrri í Reykjavík en fyrri hluti 1991 sem þó var langhlýjasta ár fyrra 5 ára tímabilsins eða 5,0 stig (aðallega vegna hitabylgjunnar í júlí). Öll árin eftir 2000 hafa hinsvegar verið vel yfir 5 stigum í Reykjavík og 2013 er á sömu leið. En eins og þú veist og marg búið að tala um þá hækkar hiti ekki ár frá ári, það geta líka komið kuldaköst eða köld ár inn á milli í hlýnandi ástandi. Annars hef ég enga skoðun á þessu, held að það muni annaðhvort kólna eða hlýna næstu áratugi - eða hvorugt.

[Pálmi Freyr Óskarsson, 24.7.2013 kl. 20:58]

Úps!!!!!! þar sem maður sér ekki lengur um veðurathugunarnir á Stórhöfða þá er erfiðira að fylgjast nákvæmlega með.  Og þess vegna þarf ég að leiðrétta úrkomustöðu á Stórhöfða kl.09. þann 21. Enn hún á vera 163,8 mm. enn ekki 164,1 mm.

Enn í morgun kl.09 þann 24. var úkomustaða júlímánaðar 2013 á Stórhöfða 165,3 mm. Og stutt í 6. mesta júlí-úrkomu í Vestmannaeyjum.

[Hilmar Hafsteinsson (IP-tala skráð) 25.7.2013 kl. 01:02]

Fyrst þetta EHS. Ég auglýsi að sjálfsögðu enn og aftur eftir árshitameðaltölum frá upphafi mælinga til 2012, útreiknuðum af Veðurstofu Íslands, ásamt viðhlítandi gögnum.

Á meðan Veðurstofan skirrist við að birta þessar nauðsynlegu upplýsingar er erfitt að sannreyna "framtíðarsviðsmyndir" stofnunarinnar.

Í öðru lagi vil ég vinsamlegast benda þér á að ársmeðalhiti í Reykjavík '61-'90 er 4,3°C, samkvæmt upplýsingum Hagstofu Íslands. Til samanburðar er ársmeðalhiti í Reykjavík '97 - '11 5,3°C. Þarna munar því 1°C.

Þú getur svo leitað í smiðju hjá Brynjari Níelssyni og hanterað þessar tölur að hætti hússins, en hafa skal það sem sannara reynist. 7 af þessum 15 árum ('97 - '11) eru kaldari/jöfn meðaltali en átta heitari. Leitni er ekki marktæk.

Ef sama þróun heldur áfram verður ársmeðalhitinn 1°C hærri í Reykjavík en tímabilið '61-'90.

Eins og þú ættir að vita þá lækkar hiti ekki ár frá ári, það geta líka komið hitaköst eða heit ár inn á milli í kólnandi ástandi.

Öfugt við þig þá hef ég skoðun á þessu - hef andstyggð á því þegar stjórnvöld leggja kolefnisskatt á eldsneyti af upplognum ástæðum - og ég er viss um að það muni kólna í haust.