Fyrsti sumardagurinn í ár (í Reykjavík)

Það var varla búið að skilgreina sumardaga og jafnframt kvarta yfir algjörri fjarveru þeirra í ár þegar sá fyrsti dettur inn. Sé tekið mark á skilgreiningunni telst 20. júní fyrsti sumardagurinn í Reykjavík í ár (en er auðvitað ekki sumardagurinn fyrsti). Þá er bara spurningin hversu margir þeir verða.

En þeir eru þegar orðnir 15 á Akureyri.

Munið þó að skilgreining hungurdiska (sjá næsta pistil á undan þessum) er ekkert betri en hver sú önnur sem menn velja sér. Vonandi hafa lattelepjendur, bjórþambarar og grillir notið blíðunnar utandyra. Ritstjórinn sá þó ekki mjög marga á fæti né á hjólum í austurhverfi borgarinnar fyrr í kvöld - ætli þeir hafi ekki stokkið á fjöll.

Athugasemdir

[Hilmar Hafsteinsson (IP-tala skráð) 22.6.2013 kl. 10:05]

Veðurstofa Íslands færir sumardaginn fyrsta í Reykjavík til bókar - 20. júní 2013.

Samkvæmt dagatalinu ber sumardaginn fyrsta, frá fornu fari, upp á 25. apríl!

Hér skakkar rétt tæpum tveimur mánuðum. Er þetta öll óðahlýnunin?

Ps. Í gærkvöldi var mikill uppsláttur í 10-fréttum RÚV um skelfilega spilliefnið - metan - sem er skyndilega orðin mikilvirkasta og skilvirkasta gróðurhúsalofttegund jarðar. Rætt var við sérfræðing á Veðurstofu Íslands sem vitnaði um skaðsemi metans fyrir andrúmsloftið.

Er CO2 kannski bara náttúrulegur áburður eftir allt saman?