Sitja enn eftir

Fyrir viku var hér fjallað um hæsta hita ársins á öllum sjálfvirkum veðurstöðvum landsins. Í dag hjökkum við í sama fari og kynnum uppfærðan lista. Hann má nálgast í viðhenginu.

Á listanum má sjá að stigin 15,4 sem mældust á sjálfvirku stöðinni á Dalatanga hanga enn inni sem hæsti hiti ársins þar á bæ. Heldur einkennilegt (en ekki einstakt). Fáeinar stöðvar sitja enn eftir með maíhita efstan á blaði. Þær má sjá í töflunni hér að neðan. Tölur í °C.

ár	mán	dagur	klst	hæst		nafn
2013	3	1	14	15,7		Dalatangi
2013	5	8	18	15,0		Skálafell
2013	5	10	14	12,6		Brúarjökull B10
2013	5	13	16	14,8		Skarðsfjöruviti
2013	5	16	16	11,6		Stórhöfði
2013	5	16	17	11,8		Surtsey
2013	5	17	13	10,9		Bláfjöll

Hitinn á Skálafelli þann 8. maí er reyndar grunsamlegur - en hefur ekki verið afskrifaður. Sömuleiðis kann að vera einhver bilun í Bláfjöllum. Tölur frá öðrum stöðvum eru hins vegar raunverulegar. Á Stórhöfða, Skarðsfjöruvita, í Surtsey og á Brúarjökli hefur hiti ekki enn komist hærra en hann varð þessa maídaga.

Aðrar stöðvar hafa endurnýjast. Reyndar þrjár í dag (þriðjudaginn 18. júní). Það eru:

ár	mán	dagur	klst	hæst		nafn
2013	6	18	16	14,1		Seljalandsdalur - skíðaskáli
2013	6	18	17	16,9		Ísafjörður
2013	6	18	17	16,1		Súðavík

Ísafjörður og Súðavík áttu sinn hlýjasta dag nú síðdegis. Á listanum má sjá að 17. júní var hvergi á landinu hlýjasti dagur ársins.

Reiknaðar veðurspár benda til þess að varla geri hlýindahrinu næstu daga - en þó hlýtur að vera von til þess að þær stöðvar í byggð sem hingað til hafa ekki enn náð 13 stigum hljóti að geta gert betur - jafnvel þótt tíð verði frekar svöl. Fyrir utan Stórhöfða hafa stöðvarnar í kaupstaðnum í Vestmanneyjum og í Grindavík enn ekki náð 13 stigunum í ár. Ein stöð á hálendinu hefur ekki enn náð 10 stigum, sú í Tindfjöllum.

Þeir sem afrita skrána inn í töflureikni geta raðað henni að vild, t.d. eftir stöðvanöfnum.

Skrár tengdar þessari bloggfærslu:

• hámörk ársins til 18júní

Athugasemdir

[Hilmar Hafsteinsson (IP-tala skráð) 19.6.2013 kl. 09:55]

Kalt þar - kalt hér og ekki allt búið enn . . . ;)

[Emil Hannes Valgeirsson, 19.6.2013 kl. 17:53]

.... en ekki allstaðar:

"Baked Alaska: Anchorage, the state's biggest city, has seen record temperatures of 81F (27C), while other parts of Alaska are believed to have climbed as high as 98F. However, while many are delighted by the unusual warmth, others are sweltering in homes and offices which lack air-conditioning and are not designed to tackle heat." Mail Online 19. júní 2013.

[Hilmar Hafsteinsson (IP-tala skráð) 20.6.2013 kl. 00:18]

... ójú reyndar :P

"However, the unusual heat is set to come to an end soon - a high pressure system responsible for clear skies and high temperatures has moved on, meaning forecasters expect a cooling trend starting from today." (Mail Online 19. júní 2013)

[Trausti Jónsson, 20.6.2013 kl. 00:46]

Á kortum evrópureiknimiðstöðvarinnar mátti sjá smáblett yfir Alaska fara í þykktina 5700 metra aðfaranótt 18. júní (síðdegis þann 17. þar um slóðir). Það er örugglega ekki algengt - en sennilega algengara þó heldur en hér á landi. Íslandsmet í þykkt er sem kunnugt er 5660 metrar eða þar um bil. Heldur kólnar næstu daga - en reiknimiðstöðin gerir þó ráð fyrir því að hlýindi taki aftur við á Alaskaslóðum. Það er líka athyglisvert að reiknimiðstöðvar gera ráð fyrir óvenju djúpri lægð við Aljúteyjar eftir einn til tvo daga - hún á að fara niður fyrir 970 hPa. Það er áreiðanlega óvenjulegt.