Slefar í meðaltalið - en langt í eitthvað betra

Loftið sem nú er yfir landinu rétt slefar í meðalhita júnímánaðar í neðri hluta veðrahvolfs. Þó ekki sé rétt að kvarta mikið yfir þessu langar flesta í eitthvað hlýrra - en það er vart í sjónmáli. Lítum á norðurhvelsspá evrópureiknimiðstöðvarinnar sem gildir um hádegi á laugardag.

Jafnhæðarlínur eru heildregnar að vanda, merktar í dekametrum (1 dam = 10 metrar) og þykktin er sýnd með litaflötum. Því hærri sem hún er því hlýrra er loft í neðri hluta veðrahvolfs. Ísland er rétt neðan við miðja mynd og má sjá lítinn gulan blett við Vesturland. Í blettinum er þykktin meiri en 5460 metrar. Meðalþykkt í júní er 5420 metrar þannig að kortið sýnir hita yfir meðallagi fyrir vestan landið en nærri honum austar.

Kuldapollurinn mikli yfir Norðuríshafi er enn býsna ískyggilegur þótt hann hafi aðeins mildast síðan við sáum hann síðast hér á hungurdiskum fyrir sex dögum. Hæðarhryggurinn sem þá var yfir okkur hefur veikst og kalda lægðin sem var fyrir sunnan land er nú komin austur til Bretlands. Við erum nærri því að vera inni í hringrásinni utan um kuldapollinn stóra - óþægilega nærri.

En séu framtíðarspár réttar mun lega okkar í hringrásinni lítið breytast næstu vikuna. Stóri kuldapollurinn á að stökkva í átt til Kanada eftir helgina og Labradorpollurinn á að fara til austurs fyrir sunnan land. Ef svona fer breytist hitafar lítið hjá okkur. Ekki má þó gleyma mætti sólarinnar á daginn þar sem hún nær að skína - en í þetta svölu lofti er alltaf mjög stutt í síðdegisskúrirnar.

Ameríska spáin er þegar þetta er skrifað (seint á fimmtudagskvöldi) enn svartsýnni, sendir Labradorpollinn nánast yfir okkur með hryssingi að vestan - og veðurblíða þá víðs fjarri.

Hvenær síðan tekst að ná í hlýrra loft að sunnan eða niðurstreymi að ofan er ekki vitað - en staðan á kortinu er ekki sérlega vænleg. Okkar megin á því nær græni liturinn alveg suður á 50. breiddargráðu, en handan norðurskauts ekki nema suður að þeirri sjötugustu - að slepptum kröppum kuldapolli við Aljúteyjar. Heildarfyrirferð grænu og bláu litanna og þar með svala loftsins minnkar mjög hægt (en gerir það samt í nærri tvo mánuði til viðbótar). Allt sem stuggar við því á einum stað verður til þess að það breiðir úr sér annars staðar.

Athugasemdir

[Ágúst H Bjarnason, 14.6.2013 kl. 13:30]

Sæll Trausti.

Samkvæmt þessum ferli er hafísinn um þessar mundir meiri en árin 2007, 2008, 2009, 2010, 2011 og 2012:
http://arctic-roos.org/observations/satellite-data/sea-ice/observation_images/ssmi1_ice_ext.png

 - eða samanborið við árin frá 2002:
http://www.ijis.iarc.uaf.edu/seaice/extent/AMSRE_Sea_Ice_Extent_L.png

Meira hér

[Emil Hannes Valgeirsson, 14.6.2013 kl. 17:16]

Ágúst. Í gærkvöldi lagði ég drög að heilmikilli hafísbloggfærslu sem gæti klárast í kvöld. Þar verður komið inn á stöðuna í útbreiðslu hafíssins.

[Hilmar Hafsteinsson (IP-tala skráð) 14.6.2013 kl. 22:49]

Sjálfmenntaði heimilisveðurfræðingurinn boðar "heilmikla hafísbloggfærslu þar sem verður komið inn á stöðuna í útbreiðslu hafíssins"(!)

Verkfræðingar komast auðvitað lítið áleiðis að benda á vísindagögn sem sýna fram á aukningu hafíss, bæði við Norður- og Suðurheimskautið, þegar EHV klárar drögin að kolefnisblætinu sínu. :)

[Trausti Jónsson, 15.6.2013 kl. 01:37]

Þakka þér fyrir Ágúst - ég fylgist lauslega með ísnum á þessum tíma árs. Þar hefur verið óvenjuþrálátt lágþrýstisvæði að undanförnu og verður víst eitthvað áfram. Emil, ég les hafísblogg þitt alltaf af athygli. Hilmar - ég vona að sem flestir snúi sér að heimilisveðurfræðinni. Þér gengur bara nokkuð vel að fitja upp þráðinn.

[Hermundur Sigurdsson (IP-tala skráð) 15.6.2013 kl. 08:43]

Það hlýtur samt að skjóta svolítið skökku við að þó að Co2 í andrúmslofti sé komið í 400ppm, þó bólar ekkert á þessari miklu hlýnun sem boðuð hefur verið á norðurslóðum. Og ísbreiðan á Suðurskautslandinu vex og dafnar sem aldrei fyrr.

[Hilmar Hafsteinsson (IP-tala skráð) 15.6.2013 kl. 08:58]

Þakkir fyrir hlý orð Trausti. Ég geri mér grein fyrir miklum heimilisveðurfræðiáhuga innan veggja Veðurstofu Íslands. :)

Sjálfur er ég hrifnari af ísköldum vísindum eldri og reyndari veðurfræðinga. Minni í því sambandi enn og aftur á ágæta grein Borgþórs H. Jónssonar, "Kólnandi veðurfar"(!) í 1. tölublaði Veðurs, 21. árgangi 1978.

Þar hrekur þessi ágæti veðurfræðingur hindurvitni kolefniskirkjunnar og segir m.a: "Af því, sem nú hefur verið ritað, verður að telja, að kolsýringskenningin um hækkandi hitafar samfara vaxandi kolsýringsmagni andrúmsloftsins sé vafasöm, a.m.k. hvað viðvíkur Íslandi." (Veðrið, 21. árg. 1978, bls. 27)

Ég vænti þess að þú náir að halda þræðinum. Er ekki kaltjón bænda á Norður- og Austurlandi sagt sláandi?

[Ágúst H Bjarnason, 15.6.2013 kl. 09:58]

Pistillinn hans Emils um hafísinn er fróðlegur.

Nú verður spennandi að fylgjast með framvindunni...

[Trausti Jónsson, 16.6.2013 kl. 01:12]

Það er alveg með ólíkindum hvað menn eru óþolinmóðir í gróðurhúsamálunum. Á hiti að rjúka upp úr öllu valdi hér og nú? Er þetta dulið heimsendablæti - eða hvað? Við vonum bara að veðurfarsbreytingar í kjölfar aukinna gróðurhúsaáhrifa dragist sem lengst og sem flest leggist gegn þeim - ekki veitir af.