Molar um 20 stiga hita á Akureyri

Í dag (þriðjudaginn 4. júní) vantaði aðeins 0,1 stig upp á hiti næði 20°C á Akureyri. Hámarkshitinn var 19,9 stig við lögreglustöðina og 19,7 á sjálfvirku stöðinni við Krossanesbraut. Það er nú vonandi að stöðvarnar nái þessu í sumar og helst sem oftast.

Sú spurning vaknar hversu langur tími hefur mest liðið á milli 20 stiga á Akureyri. Eins og veðurnördum mun kunnugt er Reykjavíkurmetið nálægt sléttum 16 árum (ískyggilegt), frá 8. júlí 1960 til 9. júlí 1976. Þann 5. ágúst 1969 komst Reykjavíkurhámarkið í 19,9 stig.

En hvað með Akureyri? Við eigum auðaðgengileg gögn þaðan frá 1949 að telja og á því tímabili liðu mest 737 dagar á milli 20 stiga. Hiti komst aldrei í 20 stig á Akureyri sumarið 1951. Tímabilið frá 16. júlí 1950 til og með 22. júlí 1952 var tuttugustigalaust. Þrjú önnur sumur hafa verið án 20 stiga á Akureyri, það voru 1961, 1967 og hið illræmda 1979. Litlu munaði 1993 því hiti fór þá í 20 stig aðeins einu sinni og það ekki fyrr en 25. ágúst. Ekki var það heldur um of því mælirinn sýndi nákvæmlega 20,0 stig.

Að meðaltali (tímabilsins alls) nær hiti 20 stigum sjö daga á ári á Akureyri - en eitthvað er af svonefndum tvöföldum hámörkum en þau bæta aðeins í fjöldann. Þetta þætti mikil hátíð hér í Reykjavík.

Flestir voru 20 stigadagarnir á Akureyri 16 á einu sumri, það var 1990. Sumarið 1997 voru þeir 15. Lengsta samfellda syrpan var sjö daga löng, frá 12. til 18. júlí 1990 og 2012 (í fyrra) var hiti ofan við 20 stig á Akureyri í sex daga í röð, frá 7. til 12. ágúst.

Hæsta hámark tímabilsins mældist 23. júní 1974, 29,4 stig - var þá einhver ákveðnasta aðför að íslandsmetinu um langt skeið. Hiti hefur 13 sinnum náð 25 stigum á Akureyri á tímabilinu, en hins vegar ekki síðan 1991, talsverð bið orðin eftir þeim. Litlu munaði þó 30. júlí 2008 þegar hitinn fór í 24,8 stig.

Að vori komu fyrstu 20 stigin þann 29. apríl 2007 (21,5°C) en þau síðustu að hausti 23. september 1997 (líka 21,5 stig) - nærri fimm mánaða gluggi.

Viðbót 5. júní: Hámarkshitaathuganir hófust á Akureyri síðustu daga júnímánaðar 1938. Gengið var í samskonar athugun og fjallað er um að ofan fyrir árin frá þeim tíma til 1948. Sumarið 1939 reynist eiga flesta 20 stiga dagana, sautján, einum fleiri en 1990. Að öðru leyti eru engin stórtíðindi. Ekkert áranna er án 20 stiga hita og meðalfjöldi atvika sá sami og síðar (7 dagar á ári). Athuga ber að rétt hugsanlegt að 20-stigadagarnir hafi verið fleiri 1938 en hér er getið.

Dagalistinn, 1938 til 2012 er í viðhenginu fyrir nördin.

Skrár tengdar þessari bloggfærslu:

• akureyri-20stig-1938til2012

Athugasemdir

[Haukur E. (IP-tala skráð) 5.6.2013 kl. 09:41]

Sæll Trausti

Áttu til upplýsingar um aðra mæla á höfuðborgarsvæðinu á tímabilinu sem þú vísar til sem Reykjavíkurmets, t.d. við Elliðaárstöðina?

[Axel V. Birgisson (IP-tala skráð) 5.6.2013 kl. 10:20]

Sæll Trausti.

Er ekki rétt hjá mér að hitamælingar frá Akureyri eru gerðar á eða nærri malbikuðu bílastæði? Eitthvað rámar mig í að Veðurstofan hafi áður bent á að þessar hitamælingar séu ekki við staðalaðstæður og því spurning hversu mikið er að marka þessi hámörk frá Akureyri.

[Trausti Jónsson, 6.6.2013 kl. 00:29]

Haukur. Ég á hámörk fyrir þær stöðvar sem hafa verið með hámarksmæla. Elliðaárstöðin mældi hámarkshita mjög stopult - en ég man ekki hvaða ár nákvæmlega - ég þarf að fletta því upp. Axel, Akureyrarhámörkin þykja grunsamleg á ákveðnu tímabili, frá ca. 1968 og fram yfir 1985. En varla er ástæða til að slátra þeim.