Hlýrra loft á leiðinni

Nú virðist öllu hlýrra loft heldur en við höfum búið við að undanförnu vera á leið til landsins. Spár eru sammála um að sæmileg sumargusa að sunnan fari yfir landið á mánudag og þriðjudag með talsverðum vindi. Hlýjast verður norðaustanlands og líklegt að 20-stiga mörkunum verði náð í fyrsta skipti á þessu ári.

Þetta sést nokkurn veginn á spákorti sem gildir kl. 21 á sunnudagskvöld.

Jafnþrýstilínur eru heildregnar, úrkoma er sýnd með grænum og bláum litum og jafnhitalínur 850 hPa flatarins er strikaðar. Lægðin suðvestur í hafi er djúp miðað við árstíma og sunnanstrengurinn austan hennar býsna öflugur. Sé rýnt í kortið má sjá (það batnar talsvert við stækkun) að 5 stiga jafnhitalína 850 hPa flatarins er skammt sunnan við land og stefnir hingað.

Þótt loftið sé hlýtt miðað við ástandið að undanförnu er enn hlýrra loft enn yfir Norður-Noregi. Hlýindin þar hafa verið að slá hvert metið á fætur öðru að undanförnu. Hiti í Norður-Svíþjóð komst í rétt rúm 30 stig. Maímánuður hefur aldrei verið svona hlýr í Tromsö og nú. En þarna kólnar eitthvað næstu daga.

Það er svo talsverð spurning hvert framhaldið verður hér á landi. Lendum við í lægðar- eða hæðarbeygju? Hæðarbeygjan er mun hagstæðari, henni hefur nú oft verið spáð að undanförnu - en lítið orðið um efndir. Þetta ætti að skýrast betur á mánudaginn. Svo er það með enn hlýrra loft - kemst það um síðir til landsins?

Athugasemdir

[Torfi Stefánsson (IP-tala skráð) 2.6.2013 kl. 10:19]

Norður-Norðmenn eru að vonast eftir svona veðri næstu 20 árin, segja reyndar að tímabilið hafi byrjað 2007.

Síðan þá hafi sjórinn fyrir sunnan Grænland hlýnað sem gerði það að verkum að hæð myndaðist yfir Grænlandi sem beinir lægðunum sunnar en venjulega. Því lendi úrkoman á Suður- og Austur-Noreg en Norður-Noregur sé í skjóli. Þannig hafi veðráttan breyst mikið - orðið miklu votviðrasamara í Austur-Noregi en áður t.d.

Hvaða áhrif hefur þetta á okkur - og hefur haft (frá 2007)?

Mér finnst eins og veðrátta hér á Suðvesturlandi á sumrin sé orðin eins og veðráttan var hér áður fyrr á Norð-austurlandi. Sól og hiti hér en vott og kalt fyrir norðan. Reyndar virðist árið í ár vera öðruvísi það sem af er vori/sumri.

Hvað segirðu um þetta veðurfræðingur góður (um áhrif breyttrar stöðu hæðar yfir Grænlandi á veður hér)?

[Trausti Jónsson, 3.6.2013 kl. 00:56]

Torfi. Ég held nú að norður-norðmenn geti ekki reiknað með svona maíblíðu árlega hér eftir - gætu þurft að bíða ansi lengi. Veðurfar síðustu ára hefur verið óvenjulegt í langtímasamhengi við allt norðanvert Atlantshaf og sveiflur miklar. Sumur hafa nú flest verið góð hér suðvestanlands en verða það ekki endalaust. Á landinu norðanverðu hafa flest sumur að undanförnu verið allgóð - en þó ekki af besta tagi. Júní 2011 var svakalegur þar um slóðir - vonandi að menn sleppi við svoleiðis næstu árin. Hæðin yfir Grænlandi var sérlega öflug 2010 og frá apríl í fyrra og út árið - en óvenju lin aftur á móti árið 2011 og út mars 2012.