Suðaustanáttin hvassa

Kortarýnin heldur áfram - erfið fyrir flesta. Í dag er fjallað um tvö 500 hPa hæðar- og þykktarkort af N-Atlantshafi. Það fyrra sýnir ástandið eins og evrópureiknimiðstöðin segir það verða á hádegi á fimmtudag.

Eins og venjulega sýna heildregnu línurnar hæð 500 hPa flatarins í dekametrum (1 dam = 10 metrar). Því þéttari sem þær eru því meiri er vindurinn. Rauðu strikalínurnar sýna þykktina, líka í dekametrum. Því meiri sem hún er því hlýrra er loftið í neðri hluta veðrahvolfs. Það er 5400 metra jafnþykktarlínan sem er rétt sunnan við landið á norðurleið. Þetta eru mikil vetrarhlýindi. Iðan er sýnt í bleikgráu - en við látum hana ekki trufla okkur að sinni.

Vestast á kortinu (lengst til vinstri) er miðja kuldapollsins sem við köllum Stóra-Bola. Lægðin er býsna djúp, í miðju hennar eru aðeins 4670 metrar upp í 500 hPa flötinn. Mesti kuldinn (minnsta þykktin) er þar í grennd, um 4720 metrar. Vetrarlágmarkið gæti orðið lægra en það er þó ekki víst. 

Næsta mynd sýnir hins vegar spá um samspil hæðar- og þykktarflata 18 klukkustundum síðar, klukkan 6 á föstudegi (18. janúar).

Illviðri má flokka eftir samspili þykktar- og hæðarflata. Þetta er gott dæmi um illviðri undir litlum þykktarbratta. Hér nær 5400 metra jafnþykktarlínan í hring - hún myndar hlýjan hól. Í hólnum er þkktin 5450 metrar þar sem mest er. Hlýir hólar eru mjög algengir - en í þeim er vindur oftast hægur. Hér fara hins vegar saman þéttar jafnhæðarlínur og flöt þykkt. Hvað táknar það?

Við sjáum það á síðasta kortinu, en það sýnir hæð 925 hPa-flatarins (hér í um 500 m hæð) auk vinds og hita í fletinum.

Nú - hér fylltist myndakrókur hungurdiska og skrifum því sjálfhætt. Fylgist með spám Veðurstofunnar.

 

Athugasemdir

[Ari (IP-tala skráð) 17.1.2013 kl. 23:23]

Tja ekki þurfti maður allavega að rýna lengi í þessi til að sjá Frón, ólíkt undanförnum kortum. ;)  Spurning annars hvort möguleiki sé að slá meðalhitamet janúar að þessu sinni (3.6°C frá ´64 sýnist mér?)