Risastór lægð

Risastór lægð er nú yfir Atlantshafi frá Labrador í vestri og ná áhrif hennar austur til Þýskalands, nærri suður til Madeira og norður fyrir Jan Mayen. Við lítum á spákort sem gildir um hádegi á fimmtudag.

Þegar ritstjórinn var yngri og vildi hafa fútt í hlutunum fylltist hann ákveðinni mæðu við að horfa á lægðir af þessu tagi - þeim fylgdi fyrirsjáanlegt tíðindaleysi dag eftir dag. Allar veðurfréttir byrjuðu á pistlinum: „Víðáttumikið og hægfara lægðasvæði er langt suður í hafi. Suðvesturland til Breiðafjarðar og Suðvesturmið til Breiðafjarðarmiða: Austan kaldi eða stinningskaldi, léttskýjað með köflum“. Nú er allt orðið með öðrum brag og sami ritstjóri harla ánægður - enda er nú hægt að drekkja sér í allskonar smáatriðum í veðurkortunum. Eins og roskin veðurnörd átta sig á var þetta fyrir spásvæðabreytinguna miklu fyrir rúmum 30 árum.

Hér má sjá þrýsting við sjávarmál eins og evrópureiknimiðstöðin spáir honum um hádegi á fimmtudag (13.12. 2012). Við sjáum úrkomusvæði hringa sig í kringum risavaxna lægðarmiðjuna. Flestallt virðist í læstri stöðu. En þó ekki allt.

Punktalínur á kortinu sýna hita í 850 hPa-fletinum og ef rýnt er í þær (stækkið kortið) má sjá að talsvert og ákveðið aðstreymi af köldu lofti er frá Labrador og langt austur á Atlantshafi - þessi straumur tekur þátt í því að hnika lægðinni austur á bóginn næstu daga. Kalda loftið skefur líka upp sneiðar af hlýrra lofti úr suðri og býr þar með til minniháttar lægðabylgjur.

Ein af þeim er nú við Landsendahöfða á Norðvestur-Spáni og stefnir inn á Evrópu. Önnur er að verða til rétt austan við þar sem bláa örin endar á kortinu og mun lenda á ívið norðlægari braut en sú fyrri. Gæti hún eða einhver ómynduð valdið leiðindaveðri og trúlega hláku í Danmörku eða Suður-Noregi undir helgina. Spá dagsins nefnir þann möguleika að rusl úr henni komi hér við sögu enn síðar - en allt of snemmt er að tala um það. 

Athugasemdir

[Jón Þórhallsson, 12.12.2012 kl. 10:31]

Það sem mér finnst oft vanta inn á svona myndir; það er að þið reynið að áætla stefnu lægðarmiðjunnar eins og um fellibyl væri um að ræða og þess vegna að setja einhverskonar tímasetningar inn á kortið> Hvar er núverandi miðja lægðarinnar og hvar mun miðjan vera eftir 3 daga?

http://www.hurricanesoftware.com/MoreImages.aspx

[Trausti Jónsson, 13.12.2012 kl. 01:19]

Jú, það væri sjálfsagt skýrara og til eftirbreytni - en í þessu ákveðna tilviki er um litla hreyfingu að ræða. Annars er hringrás fellibylja oftast mun langlífari heldur en hringrás lægða - sem sífellt endurnýjast af nýjum - koll af kolli. Fellibyljir liggja þannig mun betur sem fréttaefni.