Norðankastið

Það væri hægt að skrifa mikinn langhund um norðankastið sem nú gengur yfir landið - en bitinn er bara svo stór - og svo langur - að nóttin endist vart til að gleypa hann. Við förum frekar að sofa.

En þetta kast er eiginlega þrískipt - hver sólarhringur sinnar gerðar. Spurning hvort þeir sem takast á við það finna einhvern bragðmun á bitunum þremur. Það er óvíst - en lítum á kort sem sýnir bragð dagsins. Það er reyndar bara forréttur sem stóð stutt við - hinir réttirnir taka við - strax í nótt og síðan á föstudaginn.

w-blogg011112

Kortið sýnir greiningu evrópureiknimiðstöðvarinnar á hita í 500 hPa-fletinum og hæð hans á hádegi í dag (miðvikudag). Kortið er reyndar svo helblátt af kulda að vindörvar sjást ekki mjög vel - betur þó ef kortið er smellastækkað. En jafnhæðarlínurnar eru mjög þéttar yfir landinu vestanverðu og þar er um 30 m/s vindur úr norðaustri. Lægðabeygja er sömuleiðis yfir landinu.

Vindur og vindátt í veðrahvolfi miðju annars vegar og niður undir jörð hins vegar voru sem sagt nokkuð samstíga. En þessu ástandi var lokið nú strax í kvöld, á miðnætti var vindur í 500 hPa yfir Keflavík dottinn niður í 10 m/s - en áttin var enn af norðaustri. Allkröpp háloftalægð er á hraðri leið suður með Grænlandi - fer framhjá okkur, en veldur því að norðaustanáttin uppi gengur niður að miklu leyti. - En illviðrið heldur áfram niðri af sama krafti.

Hér er engu spáð - en breytingar á vindi með hæð breyta stöðugleika og þar með því hvernig loft fer framhjá fyrirstöðum - vindstrengir geta færst til eftir því sem samband efri og neðri vinda þróast, auk þess sem úrkomumyndunarsvæði færast sömuleiðis til. Veður getur því ýmist versnað eða batnað staðbundið af því er virðist tilefnislitlu. Höfum það í huga á ferðalögum.

Ef til vill lítum við á bragð næsta bita á morgun. Kannski stendur hann í ritstjóranum en hann hefur fyrir löngu fengið fylli sína af norðanköstum.


« Síðasta færsla | Næsta færsla »

Athugasemdir

1 identicon

"en hann hefur fyrir löngu fengið fylli sína af norðanköstum."

Og það í vetrarbyrjun,lítur eiginlega ekki nógu vel út með ritstjórann!!! 

Bjarni Gunnlaugur (IP-tala skráð) 1.11.2012 kl. 09:33

2 identicon

Kólnunin er rykkjótt, hér á landi sem annars staðar...

Hilmar Hafsteinsson (IP-tala skráð) 1.11.2012 kl. 19:45

3 Smámynd: Sindri Karl Sigurðsson

Þetta norðankast á sér hliðstæðu ef ég man rétt, þá var Trausti yngri og sneri kassa með veðurkortum og hélt um "veðursprotann" góða, sem eftirminnilega situr sem fastast í minningunni.

Það væri kannski hægt að töfra fram það kort til samanburðar við þetta, svona þegar helgin er yfirstaðin.

Sindri Karl Sigurðsson, 1.11.2012 kl. 23:07

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Maí 2024
S M Þ M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Nýjustu myndir

  • Slide10
  • Slide9
  • Slide11
  • w-1945v
  • Slide8

Heimsóknir

Flettingar

  • Í dag (22.5.): 187
  • Sl. sólarhring: 415
  • Sl. viku: 1877
  • Frá upphafi: 2355949

Annað

  • Innlit í dag: 173
  • Innlit sl. viku: 1747
  • Gestir í dag: 171
  • IP-tölur í dag: 167

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband