Köldustu febrúardagarnir

Við lítum nú á köldustu febrúardaga á landinu frá og með árinu 1949. Þar reynist febrúar 1969 vera áberandi. Gríðarleg kuldaköst veturinn 1968 til 1969, þá var mikill hafís við land. Sé reynt að líta á landið í heild var hann næstkaldasti febrúar 20. aldarinnar - ívið kaldara var í febrúar 1935 og febrúar 1907 var ámóta kaldur. Einn mjög kaldur febrúar hefur komið á nýrri öld, 2002. 

En lítum á lista yfir daga lægsta meðalhita á öllu landinu.

	ár	mán	dagur		meðalh.
1	1969	2	6		-16,04
2	1969	2	7		-13,78
3	1969	2	1		-13,06
4	1998	2	28		-12,14
5	1968	2	12		-11,90
6	2002	2	24		-10,90
7	1950	2	23		-10,78
8	1968	2	14		-10,63
9	2008	2	1		-10,44
10	1990	2	28		-10,30
11	1968	2	15		-10,19
12	1973	2	24		-10,15
13	1995	2	7		-10,15

Dagar í febrúar 1969 sitja í fyrsta, öðru og þriðja sæti - sá 6. er langkaldastur. Í fjórða sæti er síðan 28. febrúar 1998. Kuldakastið í lok febrúar og byrjun mars 1998 er það mesta á síðari árum (ef hægt er að tala um tíma fyrir 14 árum með því orðalagi). Febrúar 1968, hafísmánuður eins og 1969, á fimmta, áttunda og 11. sæti. Tveir dagar á nýrri öld eru á meðal efstu tíu. Það er nokkuð vel af sér vikið í öllum hlýindunum.

Meðallágmarkslistinn er svona:

	ár	mán	dagur		meðallágm
1	1969	2	7		-18,10
2	1969	2	6		-17,67
3	1969	2	2		-15,35
4	1969	2	1		-14,88
5	1968	2	13		-14,58
6	1969	2	8		-14,58
7	1968	2	15		-14,03
8	1981	2	10		-13,88
9	1968	2	2		-13,67
10	1950	2	23		-13,38

Hér er febrúar 1969 með fjóra efstu og að auki daginn í sjötta sæti, febrúar 1968 á þrjá - aðeins tvö önnur ár komast á blað, með 10. febrúar 1981 og 23. febrúar 1950.

Dagar með lægstan meðalhámarkshita (tungubrjótur) eru:

	ár	mán	dagur		meðalhám
1	1969	2	1		-11,54
2	1969	2	7		-11,43
3	1969	2	6		-11,23
4	1998	2	28		-9,12
5	2002	2	24		-8,82
6	1968	2	15		-8,66
7	1985	2	1		-8,33
8	1990	2	28		-7,63
9	1995	2	8		-7,62
10	1960	2	17		-7,56

Þetta eru óskaplega kaldir dagar. Þeir köldustu eru enn úr safni febrúarmánaðar 1969. Rétt er að benda á 17. febrúar 1960 í tíunda sæti, sá ágæti febrúar á daga bæði á hlýrra- og kaldradagalistum, 7. febrúar - aðeins tíu dögum áður - er hlýjasti febrúardagur alls þess tímabils sem hér er lagt undir.

Athugasemdir

[Óskar J. Sigurðsson (IP-tala skráð) 21.2.2012 kl. 10:49]

Tilefni til upprifjunar. 6. feb. 1969 var fádæma kaldur sólarhrigur á Stórhöfða. Meðal hiti sólarhringsins - 15.0 stig. Þá lagði gufu upp úr Trölladyngju. Þrátt fyrir nafnið er bara hola ofan í jörðina skammt NV af vitanum. Þar blæs upp þegar vindur blæs af noðri. Hafði heyrt að gufa hafi sést upp af Trölladyngju í kuldanum 1918. Þarna sá ég það með eigin augum. Tók mér sjávarhitamælinn í hönd og mældi hitann í uppstreyminu og mældist hann 5,4 stig en á sama tíma var lofthitinn - 15,5 stig. Mynnist ekki að hafa séð það fyrr né síðar

[Trausti Jónsson, 22.2.2012 kl. 01:25]

Óskar: Ég þakka enn fyrir fróðleikinn. Það er skemmtilegt að sjá að hitinn sem þú mældir í uppstreyminu er mjög nærri því að vera sá sami og meðalhiti ársins á Stórhöfða - sem líklega er hitinn inni í höfðanum. Ekki kann ég örugga skýringu á því hvers vegna svona mikið frost þurfi til þess að gufa sjáist - en gæti giskað.

[Óskar J. Sigurðsson (IP-tala skráð) 22.2.2012 kl. 12:31]

Þakk fyrir Trausti.  Ég giska að vindur hafi verið hæfilega hægur. Oft héla kringum opið. Hef minnst á ársmeðalhita í sambandi við gustinn upp úr opinu sbr. Árbók F.Í 2009 bls. 109.