Heiðasti febrúardagurinn

Þá er komið að heiðasta febrúardeginum í pistlaröðinni um heiðustu daga hvers mánaðar. Myndefnið er eins og oftast áður úr frábæru safni móttökustöðvarinnar í Dundee í Skotlandi. Það nær aftur til haustsins 1978.

Ekki þarf að leita langt aftur í tímann að þessu sinni því heiðastur febrúardaga er sá 9. árið 2009 - fyrir aðeins þremur árum.

w-blogg090212a

Hér er harla lítið um ský í námunda við landið, smávegis við Austfirði og yfir Selvogi að því er virðist. Þarna var heiðarleg hæð yfir Grænlandi og náði hún einnig upp í háloftin og myndaði dálitla fyrirstöðu. Vindur í háloftunum var nánast af hánorðri, en norðaustanátt við jörð. Þegar vindur snýst mót sólargangi með vaxandi hæð yfir sjávarmáli ríkir kalt aðstreymi í neðri hluta veðrahvolfs. Næstheiðasti febrúardagurinn var sá 15. árið 1987.

Við leitum líka að skýjaðasta deginum. Þar er samkeppnin mun harðari og reyndar vafasamt að veita einhverjum sérstökum degi titilinn. Við gerum það samt og upp koma jafnir þeir 19. árið 1958 og 13. 1953.  Það kemur á óvart að þrýstingur var hár báða þessa daga og hæðarhryggur yfir landinu í háloftunum í báðum tilvikum (krappir háloftaöldutoppar). Skýjagagnasafnið nær aftur til 1949.

Einnig var leitað að besta skyggninu. Sú keppni er enn vafasamari - en þar kemur 15. febrúar 1987 í fyrsta sæti, sá sami og var í öðru sæti heiðskírra daga. - Og versta meðalskyggnið var 13. febrúar 1973. Þá geisaði mikið norðanillviðri á landinu með hríðarbyl, samgöngutruflunum, rafmagnsleysi og snjóflóðum. Meira að segja fór heitt vatn af flestum húsum á þjónustusvæði Hitaveitu Reykjavíkur í rafmagnsleysinu. Þetta veður stóð marga daga og þann 11. varð mikið sjóslys fyrir sunnan land. Sjálfsagt erfið vakt á Veðurstofunni - en ritstjóri hungurdiska var erlendis.


« Síðasta færsla | Næsta færsla »

Athugasemdir

1 identicon

Hægt að rifja upp veðrið þessa daga. Á Stórhöfða voru allt að 12 vindstig og talsvert frost. Hvassast varð um kl. 8:15 þ. 14. 87 hnútar í meðalvind og mestu hviður í 102 hnúta. Ill vist í sandbylnum í Vestmannaeyjabæ þá. Gosmökkurinn varð láréttur og lá 1 - 2 km austur af veðurstöðinni en sjálf slapp hún við þann svarta byl.

Óskar J. Sigurðsson (IP-tala skráð) 10.2.2012 kl. 10:58

2 Smámynd: Trausti Jónsson

Þakka þér fyrir fróðleikinn Óskar. Þetta var óvenjulegt veður - samkvæmt skrám á Veðurstofunni virðist þetta vera næstmesti vindhraði í norðanátt á Stórhöfða frá að minnsta kosti 1949, 44,8 m/s. Þann 2. mars 1965 er talan 46,3 m/s. Síðan kemur 19. nóvember 1977 með 40,2 m/s. Í báðum þessum tilvikum er getið um foktjón í Vestmannaeyjum. Ég man vel eftir veðrinu 1965 en í nóvember 1977 var ég erlendis eins og 1973.

Trausti Jónsson, 10.2.2012 kl. 16:51

3 identicon

Þakka þér upplýsingarnar Trausti.  2. mars 1965 held ég að 46,3 geti verið áætluð hviða. Þá vantaði hviðumæli og miðað við reynslu síðar held ég að ógurleg hviða sem gekk yfir hafi verið mun meiri. Mótatimbur sem búið var að negla saman í búnt hér fóru af stað og skoppuðu langar leiðir. Veðrið 19. nóv. 1977 stóð stutt en náði að splundra hálf byggðu húsi í Vestm.bæ. Sjálfur varð skrifari 40 ára þennan dag. Miklu tilkomumeira veður þegar Jóhann Pétursson í Hornbjargsvita varð fimmtugur í febrúar 1968.

Óskar J. Sigurðsson (IP-tala skráð) 11.2.2012 kl. 11:37

4 Smámynd: Trausti Jónsson

Óskar, ég kíki á bókina varðandi 1965-töluna.

Trausti Jónsson, 13.2.2012 kl. 00:44

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Maí 2019
S M Þ M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Nýjustu myndir

  • arid_1909p
  • arid_1909p
  • ar_1909t
  • arid_1909p
  • ar_1909t

Heimsóknir

Flettingar

  • Í dag (25.5.): 53
  • Sl. sólarhring: 116
  • Sl. viku: 1630
  • Frá upphafi: 1785294

Annað

  • Innlit í dag: 34
  • Innlit sl. viku: 1379
  • Gestir í dag: 32
  • IP-tölur í dag: 32

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband