Heiðasti janúardagurinn (langt er síðan)

Leitin að heiðustu dögum hvers mánaðar síðustu 60 árin rúm er fastur liður á hungurdiskum um þessar mundir. Myndefnið hefur hingað til verið úr góðu safni gervihnattamynda í Dundee í Skotlandi. Þegar heiðasti janúardagurinn er leitaður uppi bregður svo við að fara þarf niður í sjötta sæti á lista heiðustu daga til að finna dag sem myndasafnið nær til. Myndir eru þar til aftur til haustsins 1978. Þessi dagur í sjötta sæti er 23. janúar 1988.

Heiðasti dagurinn er hins vegar 8. janúar 1961. Þrátt fyrir miklar hugarflettingar man ritstjórinn ekki eftir honum. Við leitum því í skjól amerísku endurgreiningarinnar sem hungurdiskar flýja oft í. Í þeirri fullvissu að fastir lesendur (þetta lesa varla aðrir) kunni að lesa í kortið, því það er 500 hPa kort. Í þetta sinn er ekkert á því nema jafnhæðarlínur sem merktar eru í metrum.

w-blogg210112

Ísland  er rétt ofan við mitt kort. Þar er háþrýstisvæði eins og búast mátti við eftir heiðríkjufréttirnar. Hæðin er ekki sérlega veigamikil - aðeins ein jafnhæðarlína umlykur hana og ekki sérlega ofarlega í rófinu - aðeins 5280 metrar. Heimskautaröstin (þéttar jafnhæðarlínur) æðir austur um Atlantshaf til Vestur-Evrópu og grunn lægðarenna er á milli hennar og hæðarinnar.

Hæðir sem þessar geta verið furðu þaulsetnar en svo var ekki með þessa. Rúmum tveimur sólarhringum síðar hafði öflugt lægðdrag sem þarna er rétt utan við kortið í vestri rutt öllu um koll og hér á landi gerði vitlaust veður. Næstheiðasti dagurinn er 14. janúar 1971 og 11. janúar 1963 í þriðja sæti.

Við leitum líka upp daginn sem státar bestu meðalskyggni (enn verri vísindi leitin sú). Það er 30. janúar 2010 - aðeins tvö ár síðan. Munum vér eftir því?

Leitin að skýjaðasta deginum er enn vafasamari - en til er hann - 6. janúar 2009. Skyggnið var að sögn verst 29. janúar 1966 en þá geisaði fádæma norðaustanillviðri á landinu með miklum sköðum. Þar sem ekki snjóaði skóf sjó, sand og mold. Olli særokið ekki raflínuísingu á Suðurnesjum? Það minnir mig.


« Síðasta færsla | Næsta færsla »

Athugasemdir

1 identicon

Sæll Trausti. Fletti upp á þessum tveimur dögum sem þú nefnir frá árunum 2010 og 2009. Veðurbækur mínar ná ekki nema til 2003 af neinu viti. 6. janúar 2009 virðist vera hér SA um 3 m/s um morguninn, hitinn +1°C á sprittmælinn minn en +1,8°C á digitalmæli. Loftvogin er 1020 um morguninn en er fallin í 1015 hPa kl. 21:00 og þá er breytileg átt, 1 m/s sem sagt nánast logn. Snjómugga virðist hafa verið mestallan daginn. 30. janúar árið 2010 hef ég verið í bústaðnum okkar (sem er syðst í Hegranesinu og því ekki langt frá) þannig að ég hef ekki mælisstöður, en hef bókað að þar hafi verið hálfskýjað, stillt og kalt um morguninn. Stillt veður og skýjað öðru hvoru yfir daginn, kl. 21:00 um kvöldið er logn, 3/8 skýjað, mest flákaský, frostið -7°C á sprittmælinn en -5,5°C á digitalmæli. Loftvogin í 1016 hPa.

Þorkell Guðbrands (IP-tala skráð) 21.1.2012 kl. 08:51

2 Smámynd: Trausti Jónsson

Þakka þér fyrir þetta Þorkell, alltaf gaman að sjá veðurlýsingar.

Trausti Jónsson, 22.1.2012 kl. 01:27

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Maí 2024
S M Þ M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Nýjustu myndir

  • Slide10
  • Slide9
  • Slide11
  • w-1945v
  • Slide8

Heimsóknir

Flettingar

  • Í dag (24.5.): 34
  • Sl. sólarhring: 85
  • Sl. viku: 1502
  • Frá upphafi: 2356107

Annað

  • Innlit í dag: 34
  • Innlit sl. viku: 1407
  • Gestir í dag: 34
  • IP-tölur í dag: 34

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband