Dægurhámörk ársins 2011

Efni pistilsins í dag er listi sem sýnir hæsta hita á landinu á hverjum degi allt árið 2011. Miðað er við sjálfvirkar stöðvar eingöngu. Gögnin eru auðvitað úr safni Veðurstofu Íslands. Best væri ef hvert og eitt veðurnörd gæti búið til lista af þessu tagi beint að heiman frá sér - en sjálfsagt þarf eitthvað að bíða eftir því. Listinn er allur í viðhenginu til nánari skoðunar. Þar þarf að athuga að stundum eru það tvær veðurstöðvar sem eiga landshámarkið saman, þá daga eru tvær línur í listanum.

Þegar maður lítur yfir svona lista vakna margar spurningar. Ofarlega á blaði er sú sem víkur að hæsta hámarkshita ársins. Hver er hann? Því er fljótsvarað: 24,8 stig á Húsavík þann 27. júlí. Næst koma svo 23,9 stig. Þeim var náð á þremur stöðvum, Ásbyrgi 24. júlí og á Egilsstaðaflugvelli og á Hallormsstað 29. júlí. Þessi árshámörk eru ekki sérlega há, meðaltal hæsta hámarks ársins tímabilið 1961 til 1990 er 25,2 stig. Meðaltal áranna 2001 til 2010 er 26,0 stig.

Hiti náði 20 stigum 32 daga ársins, ég á ekki meðaltal um slíkt á lager - það kemur e.t.v. síðar. En hiti fór fyrst í 20 stig 9. apríl. Þá mældust í 20,4 stig á Kvískerjum í Öræfum. Þetta er óvenjusnemma. Síðasti 20 stiga hiti ársins mældist á Skjaldþingsstöðum í Vopnafirði þann 8. nóvember - reyndar 21,0 stig. En bæði september og október voru án 20 stiga - þótt litlu munaði. Enginn 20 stiga dagur kom í maí og aðeins einn í júní (19.). Heldur rýrt - enda frægt kuldakast í algleymingi. Þeir sem hafa elju ættu að líta sérstaklega á maímánuð og sjá að hámörkin verða lægri og lægri eftir því sem líður á mánuðinn - öfugmæli eiginlega. Átján júlídaga fór hiti í 20 stig eða meira og ellefu daga í ágúst.

En hvenær var lægsta hámarkið? Var frost um land allt einhvern daginn? Því er auðsvarað. Það var aðeins tvo daga sem hiti á landinu fór hvergi upp fyrir frostmark. Sá fyrri var 10. mars (hæsta hámark á Eyrarbakka, -0,1 stig) en sá síðari 9. desember (hæsta hámark á Fonti á Langanesi, -1,2 stig). Merkilegur hámarkshitamethafi - Fontur.

Landið varð tíustigalaust síðast 19. apríl - þann dag náði hiti hvergi 10 stigum. Litlu munaði 23. maí en þann dag var hámarkið á Fagurhólsmýri 10,0 stig. Fyrsti tíustigalausi dagurinn að hausti var 5. október. Síðasti fimmstigalausi dagurinn var 18. mars og sá fyrsti í haust var 30. nóvember.

Látum hér staðar numið - þótt auðvitað væri áhugavert að rannsaka hvaða stöðvar þetta eru sem komast á blað sem hlýjasta stöð dagsins og margt annað. En lítið á viðhengið - þar má líka sjá sérstakan lista yfir hæstu hámörk Vegagerðarstöðvanna.

Skrár tengdar þessari bloggfærslu:

• dægurlandshámörk 2011

Athugasemdir

[magnús (IP-tala skráð) 5.1.2012 kl. 10:39]

Áhugaverðar töflur Trausti

var að renna í gengum þetta og þá koma Eyjafjallastöðvarnar sterkt inn  ( Hvammur og Steinar) og virðast vera einna oftast á dagatoppnum þótt Vegagerðarstöðvar séu.

Eru þetta þá mildustu staðir á landinu á  ? og hver er ársmeðalhitinn þarna?

kveðjur

Magnús

[Trausti Jónsson, 6.1.2012 kl. 00:13]

Það er rétt Magnús að Eyjafjallastöðvarnar eru áberandi á Vegagerðarlistanum. Þær keppa við Surtsey og Vestmannaeyjabæ um að vera hlýjustu stöðvar á landinu. Árið 2011 vantaði slatta af athugunum Eyjafjallastöðvanna þannig að ég hef ekki reiknað ársmeðalhita þeirra það ár. Nú hefur Veðurstofan sett upp stöð á Önundarhorni í sömu sveit, spennandi verður að fylgjast með henni á næstu árum.

[Ari (IP-tala skráð) 6.1.2012 kl. 02:37]

Dalatangi 13,2 stig þann 22 des? Er sjálfvirkur ofvirkur?

[Trausti Jónsson, 6.1.2012 kl. 10:31]

Ari, þetta er rétt tala á Dalatanga, á sama tíma var 12,0 stiga hiti á mönnuðu stöðinni. Hiti rýkur oft upp nærri fjöllum austanlands (og norðan) í hvassri suðvestanátt, ámóta gerðist á Skjaldþingsstöðum í nóvember.

[Ari (IP-tala skráð) 6.1.2012 kl. 15:23]

Núnú, það var óverraskandi, takk.