Hvar í ósköpunum er hlýja loftið?

Við liggur að það sé utan við kortið. Jæja, það fer eftir því hvaða kröfur við erum að gera. Það er þrátt fyrir allt norðanátt og hún er sjaldan hlý. Hún hefur líka þann eiginleika að vera til þess að gera þung og fleygast því auðveldlega undir hlýrra loft ofan við. Þar er ástandið skárra, þykktin yfir landinu í dag var 5420 til 5444 metrar. Það er lélegt, en ekki afleitt, við viljum helst fara yfir 5500. Hvar er það loft?

Sumir lesendur kannast við svipinn á kortinu. Þetta er spá um hæð 500 hPa-flatarins um hádegi á morgun (laugardaginn 18. júní) - heildregnar, svartar línur og þykktina, rauðar, slitnar linur. Þykktin segir til um meðalhita lofts á milli 500 og 1000 hPa-flatanna, því meiri sem hún er því hlýrra er loftið. Í grófum dráttum fylgjast hæðar- og þykktarlínur að, en þó ekki alveg, síst í námunda við vaxandi lægðir og einnig þar sem hæðarsviðið er mjög flatt. Mikil flatneskja er á þessu korti eins og venjulega á sumrin, en þó er vindstrengur þvert yfir hafið frá Nýfundalandi og austur til Frakklands.

Skemmst er frá því að segja að þar er hlýja loftið sem við viljum fá til okkar. ég hef sett rauða, þykka línu nokkurn veginn þar sem 5520-þykktarlínan liggur. Eins og staðan er í augnablikinu er hingaðkoma hennar ekki í augsýn.

Við sjáum þó að vestur af Noregi er þykktin ofan við 5460 á allstóru svæði. Gallinn er sá að þessi hlýja er að nokkru fest þar við akkeri, hún verður til við niðurstreymi í skjóli fjallgarða Skandinavíu. Eitthvað kann þó að slitna hingað. Svipað er hér við Suðvesturland, lítilsháttar niðurstreymi er í skjóli landsins auk þess sem sólin belgir þykktina lítillega út að deginum. Það táknar að sæmilegir dagar geta komið á Suðvesturlandi og e.t.v. víðar þar sem vindur stendur af landi.

En við verðum að halda áfram að vona. Allt kortið er fullt af smálægðum, litlum kuldapollum sem reika þar um stefnulítið, aðeins vottar fyrir hæð við Norðaustur-Grænland.

Síðan háloftaathuganir hófust er vitað um eitt sumar þar sem þykktin yfir landinu fór aldrei yfir 5520 metra, það var 1979. Þykkt eins og sú sem er yfir landinu núna er mjög algeng á sumrin í venjulegu árferði. Höfum í huga að árferði hefur ekki verið venjulegt í júní undanfarin ár.

Athugasemdir

[Gunnar Sæmundsson (IP-tala skráð) 18.6.2011 kl. 09:27]

Já, hvar er hlýja loftið? Á hverjum morgni fer ég í tölvuna og skoða frá þér færslunar. Þetta vor og það sem komið er af sumri er að verða eitt af þeim verri sem ég man eftir. Þó segja megi að við í Hrútafirðinum hafi að sumu leyti sloppið betur en sumstaðar, við fengum ekki snjó í byggð. Ég man vel eftir 1979 og hef verið að vona að eiga ekki eftir að fá annað eins og þetta er nú ekki orðið eins slæmt að öllu leyti. En þakka þér allann fróðleikinn. Veður og öll sú fræði sem því fylgir, meðtekur maður eins og þyrstur maður vatn.

Kveðja.

[Ben.Ax. (Benedikt Jóhannes Axelsson), 18.6.2011 kl. 17:37]

Sæll. Ömmu minni leist ekkert á veðrið ef hæð var yfir Grænlandi og lægð á leiðinni úr suðri held ég. Ég man þetta ekki nákvæmlega en hún hafði nokkuð oft áhyggjur af þessu. Getur þú spáð í hvað hún meinti miðað við þessar fátæklegu upplýsingar? 

[Trausti Jónsson, 19.6.2011 kl. 01:19]

Hún átti við að vindur færi vaxandi af norðaustri eða austri - það er oftast ekki gott.

[Trausti Jónsson, 20.6.2011 kl. 01:22]

Ég þakka hlýjar kveðjur Gunnar.