Grænlandshitinn 2010 - með ólíkindum

Nú eru komnar staðfestar tölur um hita á Grænlandi á síðastliðnu ári, 2010. Þá sést svart á hvítu að hiti á Vestur-Grænlandi var með ólíkindum. Þetta má vel sjá á línuriti sem sýnir ársmeðalhita Nuuk frá 1873 til 2010. Tölurnar eru fengnar af vef dönsku veðurstofunnar.

Meðalhitinn í Nuuk 2010 var 2,6 stig. Það er um 4,2 stigum ofan meðallagsins 1961-1990 og 3,7 stigum ofan meðallagsins 1931-1960. Í Narsarsuaq var meðalhiti ársins 2010 5,4 stig og er það 4,4 stigum ofan meðallagsins 1961-1990 og 4,0 stigum ofan meðallagsins 1931-1960. Þetta eru auðvitað dæmalausar tölur á þessum slóðum. Í Ammasalik (Tasiilaq sem nú heitir) á austurströndinni varð árið 2010 það næsthlýjasta eins og sums staðar hér á landi. Þar var 2003 lítillega hlýrra eins og hér.

Ef við ímyndum okkur hitavik upp á 4 stig hér, t.d. miðað við 1961-1990 væri Reykjavík í yfir 8 stigum í ársmeðalhita. Ekki er þó rétt að nota slíkt viðmið því breytileiki hitans er allnokkuð minni hér á landi heldur en á Vestur-Grænlandi. Mér reiknast þó til að 6,8 stiga ársmeðalhiti hér í Reykjavík sé nokkuð samsvarandi því sem Vestur-Grænland upplifði á síðasta ári og um 6,4 stig á Akureyri.

Tölur sem eru svona langt út úr kortunum hljóta að koma til af því að einstök hlýindi hitta vel í árið. Ég hef ekki greint það í tölunum frá Vestur-Grænlandi, en hef hins vegar gert það fyrir íslenskar stöðvar. Hlýjasta 12-mánaða tímabilið sem vitað er um í Reykjavík stóð frá september 2002 til og með ágúst 2003. Þá var meðalhitinn í Reykjavík 6,6 stig, rúmum 0,5 stigum hærri heldur en hæsti ársmeðalhiti hefur orðið. En það er samt 0,2 stigum neðar að tiltölu heldur en Grænlandshitinn 2010. Hæsti 12-mánaða hiti á Akureyri er um 5,8 stig. Það var á sama tíma og hæsti 12-mánaðahitinn í Reykjavík, 0,6 stigum að tiltölu neðan við Vestur-Grænlandshitann 2010.

Hitastökkið á Grænlandi er langt umfram það sem búist er við af hnattrænni hlýnun næstu áratugi. Svipað má segja um hlýindin hér á landi undanfarin ár. En það verður áfram spennandi að fylgjast með þróuninni.

Athugasemdir

[Eiður Svanberg Guðnason, 22.2.2011 kl. 22:34]

Ótrúlegar tölur. Spennandi að sjá hver  framvindan verður. Enginm einhlít skýring, eða hvað. Takk fyrir fróðleikinn.

[Jón H (IP-tala skráð) 23.2.2011 kl. 14:32]

Hafa þessar tölur eitthvað með lagnaðarís að gera? Takk fyrir tölurnar.

Jón H

[Trausti Jónsson, 24.2.2011 kl. 00:48]

Það á við hér sem víðar að skýringar eru auðveldar en réttar skýringar erfiðar. Ég held að lagnaðarís komi ekki hér við sögu þótt hann geti haft staðbundin áhrif.

[Vidar H (IP-tala skráð) 25.2.2011 kl. 01:52]

Það væri samt eðlilegra að líta lengra aftur í tíman, eru þær tölur ekki til? Öld í þessu samhengi er ekki langur tími, hvað þá áratugur.