Fáeinar tölur úr illviðrinu í gær og síðastliðna nótt

Hér fylgir viðhengi þar sem finna má lista yfir mesta 10-mínútna vindhraða og mestu vindhviðu á sjálfvirku stöðvunum frá því 8. febrúar kl. 01 til og með 9. febrúar kl. 16. Raðað er eftir 10-mínútna hámarkshraða, stöðvar vegagerðarinnar eru sér, neðan til í listanum. Athuga ber að þar mælast vindhviður oft ívið meiri heldur en á öðrum stöðvum vegna þess að þar er í flestum tilvikum miðað við 1 til 2 sek hviður, en 3 sek hviður á öðrum stöðvum.

Hæstu 10-mínútna gildin voru í m/s:

dagur klst vindátt maxfx maxfg stöðvarnafn
8         24         99 38,1   43,2    Kolka
8         20         96 37,5   47,5    Stórhöfði sjálfvirk stöð
8         24       111 36,2   41,9    Jökulheimar
8         22       109 35,3   45,5    Vatnsfell

Vindátt er gefin í veðurgráðum. Hér sést að hvassast varð við Kolku, hámarkið var skráð kl. 24, en á við klukkustundina milli 23 og 24. Mesti 10-mínútna vindhraði þar mældist 38.1 m/s, en mesta hviða 43,2 m/s. Mesta hviða á stöðvum Veðurstofunnar og samstarfsaðila mældist í Tindfjöllum 49,6 m/s. Þar náði vindur strax hámarki kl. 15, meðalvindur þó ekki nema 28,1 m/s.

Mesta vindhviða á vegagerðastöð mældist á Hvammi undir Eyjafjöllum, 56,2 m/s. Vindhviður náðu 50 m/s á nokkrum vegagerðarstöðvum til viðbótar, en mesti 10-mínútna meðalvindhraði mældist í Vatnsskarði eystra, 44,0 m/s það var kl. 9 í morgun (þ. 9).

Veðrið náði mestri útbreiðslu um kl. 24 og algengast var að vindátt væri á bilinu 100 til 110 gráður (austur til austsuðausturs). Rétt er að benda á að á nokkrum stöðvum er vindátt ekki í lagi en þær stöðvar eru mjög fáar.

Lítið á viðhengið. Með því að líma það yfir í töflureikni getið þið velt tölunum fyrir ykkur á alla mögulega vegu og t.d. reiknað eins konar hviðustuðul. Góða skemmtun.

Skrár tengdar þessari bloggfærslu:

• hámarksvindhraði illviðrisins 8-2-2011

Athugasemdir

[Pálmi Freyr Óskarsson, 9.2.2011 kl. 18:23]

Blessaður Trausti.

Hef oft fundist vanta svona veðuryfirlit hjá V.Í.

Það er einhver skekkja í vindmælingum hérna á Stórhöfða. Vindmælingaskjárinn sýnir meiri vind enn það sem lendir til V.Í.

Hvor talan sýnir rétt?

xxxx

Skrifað 9.2.2011 kl. 9:38 af Pálma Frey

Bein slóð á færslu

Eða 37,5 m/s.?

Ef 38,2 m/s. er rétt þá lendir Stórhöfði í fyrsta sæti 10 mín.meðalvindhraða.

[Trausti Jónsson, 9.2.2011 kl. 23:12]

Pálmi, ég er að athuga málið. Ég hef grun um hvað er á seyði, en verð að bera málið undir mér upplýstari mann áður en ég fullyrði um það.