Aðskiljanleg desembermet

15.12.2010 | 00:18

Aðskiljanleg desembermet

Nú verða rakin nokkur met desembermánaðar sem ekki hefur verið fjallað um á þessum vettvangi áður.

Sólarhringsúrkomumet desembermánaðar er ekki gamalt, frá þeim 18. 2007. Þá mældist sólarhringsúrkoman á Nesjavöllum 191,2 mm. Hér er átt við réttan úrkomusólarhring. Þá er mælt kl. 9 og úrkoman síðan kl. 9 morguninn áður telst sólarhringsúrkoma. En ...

á annan dag jóla 1926 mældist sólarhringsúrkoma í Vík í Mýrdal 215,8 mm - en féll ekki rétt á mælisólarhringinn. Svo vildi til í Vík að það byrjaði að rigna kl. hálf tólf (að þáverandi ísl. miðtíma) að kvöldi 25. Um morguninn voru 122,5 mm komnir í mælinn. Áfram rigndi linnulítið og kl. hálf tólf að kvöldi 26., sólarhring eftir að úrfellið hófst, mældi veðurathugunarmaðurinn úrkomuna aftur og höfðu þá 93,3 mm bæst við morgunathugun. Þetta met er því ekki alveg sambærilegt við önnur sem ætíð eru fengin með mælingunni frá kl. 9 til 9 [8 til 8 að þáverandi miðtíma]. Stöðin í Vík byrjaði að athuga 1925. Mikil skriðuföll urðu í þessu úrfelli og lá m.a. við að manntjón yrði þegar skriða féll á tvo bæi að Steinum undir Eyjafjöllum

Nokkrir staðir eiga yfir 130 mm sólarhringa í desember, Andakílsárvirkjun í Borgarfirði á 162,3 mm, þ.5. 1995. Hólar i Dýrafirði sama dag og ár, 131,8 mm, Seyðisfjörður 135,3 mm þ. 30. 1993, Kvísker í Öræfum 175,3 mm, þann 20. 2006 og 173,3 mm 2. dag mánaðarins 1989 og 136,2 mm í Snæbýli í Vestur-Skaftafellssýslu þann 7. 1998.

Mest úrkoma í desember öllum kom í mæli á Kvískerjum í desember 2006, 770,4 mm. Í desember 1943 mældist úrkoman í Fagradal í Vopnafirði aðeins 0,4 mm. Það er rétt á mörkum þess að við trúum því, en látum það standa í bili.

Mesta sólarhringsúrkoma á sjálfvirkri stöð í desember mældist við Ölkelduháls þann 10. árið 2008, 138,4 mm.

Mesta sólarhringsúrkoma í Reykjavík í desember er 55,1 mm en þeir mældust þann 18. 1938. En talan 55,4 mm er líka til í Reykjavík. Sú úrkoma mældist á sjálfvirku stöðinni á Veðurstofutúninu þann 30. árið 2007 i eftirminnilegu slagviðri eða eins og segir í yfirliti um veðrið:

Talsvert tjón í hvassviðri og vatnsaga um suðvestanvert landið og víða flæddi vatn í hús og truflaði umferð á götum í Reykjavík.

Mesta snjódýpt á landinu í desember mældist á Hornbjargsvita þann 31. árið 1966, 200 cm. Þetta er auðvitað nokkuð ónákvæm tala. Næst þessu koma 175 cm á Kálfsárkoti í Ólafsfirði þann 18. 1992 og 174 cm á Sandhaugum í Bárðardal 15. og 16. desember 1972.

Mesta snjódýpt í Reykjavík í desember mældist 32 cm. Það var að morgni gamlársdags 1978 eftir afskaplega minnisverða snjókomu. Sama snjódýpt mældist einnig 21. og 22. 1984. Á Akureyri var snjódýpt talin 100 cm dagana 7. til 9. árið 1965.

Ég var fyrir nokkrum dögum búinn að ræða háþrýstimet desembermánaðar í pistli. Ég hef fjallað nokkuð ítarlega um lágþrýstimet mánaðarins á vef Veðurstofunnar, en það er jafnframt lágþrýstimet árins.

Flokkur: Vísindi og fræði | Facebook

Athugasemdir

Óviðkomandi þessum pistli, en í tilefni þingsályktunartillögu 14 þingmanna um að seinka klukkunni, þá væri gaman að sjá hitastig á völdum stöðum um landið; kl. 17.30.,18.30. og 19.30. Ef við gefum okkur að kvöldmatartími sé að jafnaði kl. 18.30 og þeir sem vilja seinka klukkunni, eru þá að borða miðað við núverandi tíma, kl. 19.30.

Ég er hins vegar í þeim hópi sem vill frekar flýta klukkunni ef eitthvað er og myndi því borða kl. 17.30.

Ég tala um þetta, því margir vilja fá tækifæri til að nýta sólina og ylinn betur í frítíma sínum að loknum vinnudegi, en sólin er að síga á bak við fjöllin, einmitt um núverandi kvöldmatarleiti, hér á Reyðarfirði, eins og víðast hvar í dölum og fjörðum á Íslandi.

Það munar miklu ef maður vill borða úti; á veröndinni/sólpallinum eða í skógarrjóðri, hvort sólar nýtur eða ekki. Því væri áhugavert að sjá hitastigsmuninn á þessum tímasetningum.

Gunnar Th. Gunnarsson, 15.12.2010 kl. 16:17

Þarna ætti nú frekar að standa "...miðað við núverandi sólstöðu (ekki tíma), kl. 19.30.".

Gunnar Th. Gunnarsson, 15.12.2010 kl. 16:20

Gunnar. Ég er alfarið á móti því að klukkuhringl verði tekið upp aftur, það er veðurathugunum mjög erfitt og ruglingslegt. Því miður er ég ekki með tölur frá Kollaleiru fyrir meira en 3 ár við hendina, en þú getur velt vöngum yfir þeim:

Kollaleira í júní
klst hiti breyting á klst
1 5,66 -0,11
2 5,53 -0,13
3 5,46 -0,07
4 5,64 0,18
5 5,81 0,17
6 6,71 0,90
7 7,31 0,60
8 7,77 0,46
9 8,23 0,46
10 8,53 0,30
11 8,90 0,37
12 9,34 0,44
13 9,51 0,17
14 9,47 -0,04
15 9,32 -0,15
16 9,20 -0,12
17 8,93 -0,27
18 8,71 -0,22
19 8,26 -0,45
20 7,72 -0,54
21 7,27 -0,45
22 6,64 -0,63
23 6,11 -0,53
24 5,77 -0,34
Hér er meðalhiti á klukkustundar fresti á Kollaleiru í júnímánuði. Aftasti dálkurinn sýnir hitabreytingu frá því klukkustund áður. Hiti fellur t.d. um 0,27 stig milli kl. 16 og 17. og svo framvegis. Auðvitað munar meiru á sólskinsdögum en ég er ekki með gögn heimavið til að finna út úr því. Lesa má um dægursveifluna almennt í greinargerð minni frá 2002: