Hvenær náði þrýstingur síðast 1050 hPa?

Þótt líkurnar á því að þrýstingur nái 1050 hPa hér á landi í þessari umferð stendur spurningin í fyrirsögninni. Svarið er að það var 24. febrúar 2006 að þrýstingur á Dalatanga og Skjaldþingsstöðum komst í 1050,0 hPa. Næst á undan var 15 árum áður þegar hann fór í 1050,8 hPa á Egilsstöðum 16. apríl 1991. Síðustu 60 árin hefur þrýstingur náð 1050 hPa aðeins tvisvar i viðbót, á Galtarvita 9. janúar 1977 (1051,1 hPa) og á Akureyri og Dalatanga í febrúar 1962, þann 25. á Dalatanga og þann 26. á Akureyri, 1051,7 hPa á báðum stöðvum. Aðeins er kunnugt um örfá eldri tilvik.

Ég hef skrifað pistil um hæsta loftþrýsting á Íslandi á vef Veðurstofunnar og vísa á hann varðandi frekari fróðleik um metin og þau gildi sem næst þeim koma.

Athugasemdir

[Emil Hannes Valgeirsson, 12.12.2010 kl. 22:17]

Er ekki orðið æði langt síðan 1050 hPa náðust í Reykjavík? Erum við kannski að tala um 19. öld?

[Trausti Jónsson, 12.12.2010 kl. 23:20]

Ég held að þrýstingur hafi farið í 1050,0 hPa í Reykjavík þ.26. febrúar 1962. Athuganir frá því í desember 1917 hafa ekki fundist í Reykjavík - til samanburðar við Stykkishólmsmetið. Annars voru skilyrði þegar það met var sett (16. desember) óvenjuleg. Þrýstingur steig mjög snögglega upp í metið og féll nær samstundis aftur. Það mætti fjalla um síðar. Annars þarf að fara aftur til 19. aldar.

[Trausti Jónsson, 13.12.2010 kl. 13:24]

Emil. Ég athugaði málið betur og sá að þrýstingur í Reykjavík fór í 1051,0 hPa kl. 12 þann 26. febrúar 1962 og var 1050,0 kl.9 þann dag. Fyrri talan er því hæsti þrýstingur sem Veðurstofan hefur mælt í Reykjavík.

[Emil Hannes Valgeirsson, 13.12.2010 kl. 16:10]

Sko til. En þetta er allavega fyrir mína tíð.