Hiti á landsvísu í júní til ágúst

Alþjóðaveðurfræðistofnunin skilgreinir mánuðina júní til ágúst sem sumar á norðurhveli jarðar. Hér á landi viljum við helst telja september með líka. En lítum samt á alþjóðaútgáfuna. 

Meðalhiti reiknast 9,8 stig. Það er nákvæmlega í meðallagi síðustu tíu ára, og 0,1 stigi ofan meðallagsins 1991 til 2020. Aftur á móti 0,9 stigum ofan meðallagsins 1961 til 1990 og 0,3 stigum ofan við meðaltalið forna 1931 til 1960. 

Myndin sýnir meðalhita sumarsins nærri 150 ár aftur í tímann - ekki mikið að treysta á landsmeðaltal fyrir þann tíma (þó við vitum um allmikið um hitafar þá). Svo sýnist sem allt sé á uppleið - en munum þó að leitni segir ein og sér nákvæmlega ekkert um framtíðina. Á tímabilinu 1951 til 1991 voru aðeins þrjú sumur jafnhlý eða hlýrri heldur en 2020 - en á þessari öld lendir það í 11.hlýjasta sæti - af því má ráða hversu mikið samkeppnin hefur harðnað. 

Lítum í leiðinni á röðunarstöðu hita í ágústmánuði.

Eftir kalda dumbungsbyrjun á landinu suðvestanverðu snerist til betri vegar og lyftist þá hitinn upp eftir listanum - norðaustan- og austanlands héldust hlýindi lengst af.

Að tiltölu varð hlýjast á Austurlandi að Glettingi, þetta er þriðjihlýjasti ágústmánuður aldarinnar þar og sá fjórðihlýjasti á Norðausturlandi. Kaldast (að tiltölu) varð á Suðausturlandi, hiti þar í 13.hlýjasta sæti. 

Athugasemdir

[Siggi (IP-tala skráð) 1.9.2020 kl. 23:31]

Sæll Trausti

Er eitthvað að marka þessa þrumuspá frá Evrópsku Veðurstofunni, nú hef ég farið inn á þessa meðfylgjandi síðu nokkrum sinnum á dag í nokkur ár og ég man ekki eftir að hafa séð svona stóran og þéttann flekk yfir landinu.

Eru þið að sjá þetta í ykkar líkönum?

https://www.windy.com/-Thunderstorms-thunder?thunder,2020-09-07-00,66.956,-19.973,5 

[Trausti Jónsson, 2.9.2020 kl. 00:36]

Strangt tekið er þetta ekki þrumuspá - heldur er verið að spá svonefndu veltimætti loftsins. Tengsl eru oft á milli þess og þrumuveðra - en ekki endilega. Veltimætti getur stundum verið allmikið þótt engar eða litlar líkur séu á þrumuveðri, t.d. var það allmikið í dag (þriðjudag) - en engra eldinga varð vart. Síðan er þetta 6 daga spá - ein af mörgum tugum sem í dag spáðu fyrir þennan dag - og sú eina sem sýnir viðlíka vont veður. 

En það er ekki þar með sagt að spáin geti ekki ræst - það gæti orðið vont veður - jafnvel með þrumuveðri. Spár evrópureiknimiðstöðvarinnar eru að jafnaði áreiðanlegastar - en samt ekki alltaf réttar. Við verðum bara að bíða og sjá hvað setur.