Meðalvetrarhitinn

Nú getum við með sæmilegri samvisku bætt vetrinum 2018 til 2019 inn á línuritið sem birtist hér fyrir nokkrum dögum.

Meðalhiti hans - á landsvísu - verður annað hvort +0,3 eða +0,4 stig. Hann er því langt inni í flokki þeirra hlýju. Á myndinni sjáum við að hann sómir sér vel meðal hlýindanna miklu á þessari öld - þó nokkuð skorti hann upp á allra hæstu hitahæðir. 

Einnig mun óhætt að segja að vel hafi farið með veður í vetur. Illviðri með færra móti og snjór - það litla sem var - lagðist ekki illa. Jörð er víðast hvar þíð. 

En nú er spurning hvernig fer með í apríl. Við treystum mánaðarveðurspám ekki vel - en þær segja nú að fyrsta vikan verði í kaldara lagi - en síðan komi tvær fremur hlýjar - lítið sem ekkert er sagt um fjórðu vikuna. 

Athugasemdir

[Torfi Kristján Stefánsson, 30.3.2019 kl. 22:00]

Þetta er auðvitað nokkuð skondið innlegg miðað við að vorkoman er í seinasta lagi þetta árið - og sér ekki fyrir endann á vetrinum!
Kannski ætti maður frekar að taka mark á lóunni en á veðurfræðingum? Koma lóunnar seinkar ár frá ári. Í ár kom hún þann 28. mars en hefur að meðaltali komið 23. mars eðs fimm dögum fyrr en nú. Og þetta gerist þrátt fyrir mjög hraða "hnattræna" hlýnun!