Kaldur ruðningur úr vestri?

Ástæða er reyndar fyrir spurningarmerkinu í fyrirsögninni. Aðallega vegna þess að loftið sem um ræðir er ekki svo óskaplega kalt - eða verður það ekki þegar hingað er komið. Aftur á móti hefur verið óvenjuhlýtt upp á síðkastið. Apríl það sem af er sá næsthlýjasti á öldinni og reyndar ekki margir í fortíðinni hlýrri heldur. 

Því má segja að vorið hafi nú um tíma farið nokkuð fram úr sér og boðið upp á hita sem venjulegur er um og eftir miðjan maí. Það eru því viðbrigði fari hitinn niður í meðallag eða jafnvel lítillega undir það. Tilfinningin er því sú að kalt sé í veðri.

En lítum á stöðuna eins og evrópureiknimiðstöðin stingur upp á að hún verði síðdegis á laugardag 28.apríl.

Hér eru jafnhæðarlínur heildregnar en þykkt sýnd í lit. Þykktin mælir hita í neðri hluta veðrahvolfs, því meiri sem hún er því hlýrra er loftið. Meðalþykkt um miðjan apríl er um 5290 metrar yfir landinu - á mörkum grænu og bláu litanna. Um miðjan maí er hún hins vegar komin upp í 5350 metra. Þetta segir okkur að á laugardaginn verði þykkt lítillega undir meðallagi. 

Leifar kuldapollsins Stóra-Bola eru hér vestan Grænlands og eiga víst (sé að marka spár) að senda afleggjara í átt til okkar - þá í gervi einskonar útsynnings. Þykktin fer þá neðar - jafnvel niður undir 5200 metra þegar kaldast verður eftir helgina - sem er reyndar svo algengt í maí að varla telst til tíðinda (teldust frekar tíðindi í júní). 

Ætli við sættumst ekki á að flytja spurningarmerkið framar í fyrirsögnina og breytum henni í „Kaldur (?) ruðningur úr vestri“. 

Athugasemdir

[Hjalti Þórðarson (IP-tala skráð) 27.4.2018 kl. 11:54]

Það stefnir í svala daga svona að minnsta kosti er það ekki. Kröfurnar gagnvart veðrinu eru orðnar alveg ótrúlegar. Frost í einhverja daga á miðjum vetri og þá fer nánast allt á hliðina, ef ekki er bjart og kyrrt eftir páska þá er talað um leiðindatíð og svo sé nú ekki talað um sumarið þegar allt annað tíðarfar en 15-20 stiga hiti, sól og logn er bara alls ekki boðlegt. Mér finnst t.d. búin að vera afburðatíð sl mánuð eða svo, logn eða hægur vindur flesta daga, hiti nálægt frosti á nóttunni en oft 5-10 stig á daginn og betra hlýustu dagana fyrir nokkru. Mætti jafnvel rigna meira. 

[Jón Kristjánsson, 27.4.2018 kl. 22:14]

Sæll Trausti, Átti bágt með að trúa hlýjum apríl, fannst helvíti kalt stundum. Skoðaði svo meðalhitann í Hólmsá við Gunnarsholt og sá að hann var sá mesti síðan 2007, 4,6 gráður bæði árin. Í fyrra var hitinn 3,4 og 4,4 í hitteðfyrra. 2015 var hann 2,7, enda var lélegt laxveiðiár, af smálaxi, árið eftir.  

[Trausti Jónsson, 27.4.2018 kl. 22:37]

Sæll sömuleiðis Jón. Gaman að heyra af ánum. Fyrsta aprílvikan var frekar köld, en síðan hlýnaði til muna og vorið fór langt framúr sér (í bili að minnsta kosti).