Um stöðu frá októberbyrjun

Smávegis um stöðuna. Þó hlýtt hafi verið bæði í febrúar - og allan tímann frá áramótum - er hitinn þennan tíma samt langt frá metum. En allur tíminn frá 1. október hefur hins vegar aðeins einu sinni verið hlýrri í Reykjavík heldur en nú. Það var 1945 til 1946. Meðalhiti þessa tíma nú er 4,0 stig, en hefur mestur orðið 4,2 stig. Þetta er lítill munur.

Febrúar 1946 var ekki kaldur, en meðalhiti var þó ekki nema -0,1 stig. Meðalhiti mánaðanna október til febrúar (samtals) var hæstur 2002 til 2003, 3,5 stig, næsthæstur 1945 til 1946, líka 3,5 stig og þriðjihæstur 1941 til 1942, 3,2 stig. Ritstjóra hungurdiska sýnist að eigi hitinn nú (október til febrúar) að verða fyrir ofan öll þessi tímabil þurfi meðalhiti í núlíðandi febrúar að verða að minnsta kosti 1,7 stig. - Sem er auðvitað vel hugsanlegt - ennþá. - Sérstaklega ef við förum að trúa spá evrópureiknimiðstöðvarinnar á kortinu hér að neðan sem gildir fyrir næstu tíu daga - að vísu í 850 hPa - og hlýindi þar uppi skila sér sjaldnast til jarðar í hafátt. 

Meðalhiti í Reykjavík það sem af er febrúar nú er 3,4 stig - sömu febrúardagar hafa 13 sinnum verið hlýrri svo vitað sé.

Úrkoma frá 1. október hefur líka verið óvenjumikil, komin yfir 610 mm. Hefur aldrei verið meiri á sama tíma - svo vitað sé - en nokkrum sinnum litlu minni en nú.

Sólskinstundir hafa verið óvenjufáar - munar mest um sólarlítinn október - því sólarstundir geta aldrei orðið margar í desember og janúar.

Athugasemdir

[Birnuson, 9.2.2017 kl. 00:01]

Það er sparðatíningur, en víst hefur átt að standa fremst í pistlinum „Þó hlýtt hafi verið bæði í janúar…“.

[Trausti Jónsson, 9.2.2017 kl. 00:56]

Þakka athugasemd - rétt er að óskýrt er orðað - en þetta er svona - á annars vegar við febrúar (það sem af er) en hins vegar við meðaltal 39 daga frá áramótum - en ekki janúar einan og sér.

[kristinn geir steindórsson briem (IP-tala skráð) 9.2.2017 kl. 05:51]

ætli verði ekki svipað veður næstu tvær vikurnar ef hjátrúin ræður bara spurníng um él eða skúri. því miður. hef feingið nóg af votviðrinu. er farin að hafa áhyggjur af gróðurin fari að lifna við. en eflaust er ég ílla haldin af útlendíngagróðursfordómum  

[kristinn geir steindórsson briem (IP-tala skráð) 9.2.2017 kl. 05:59]

p.s. átta mig reindar ekki á hversvegna lægðin tók ekki með sér kalda loftið sem stalst suður eftir grænlandi frá kanada, gæti verið að það skreppi í sólina á bretlandi næstu daga 

[Birnuson, 9.2.2017 kl. 22:59]

Gróður er þegar farinn að að lifna við. Það er töluverður nývöxtur í grasflötinni hjá mér, ýmsir laukar spretta hratt þessa dagana og sjá má blöð skjótast upp úr moldinni hér og þar. Jarðarberjaplönturnar hafa ekki misst græna litinn í allan vetur og hefur þó ekkert hlíft þeim annað en það að standa sunnan undir vegg. Fyrstu blómin láta vafalaust sjá sig fyrir lok mánaðarins.

[Trausti Jónsson, 9.2.2017 kl. 23:14]

„ ... því það er góugróður, vinur minn,
sem grær oft fljótt, en stendur skjaldan lengi. “
(Þorsteinn Erlingsson)

„ ... og allt gat verið svikult og endasleppt, það sannaði best góugróðurinn, sem sjaldnast lifði langt fram á vorið.“ (Þórður Tómasson í Skógum)