Fárviðrið 30. desember 1953

Enn er fjallað um fárviðri í Reykjavík, nú er nafnlaust veður í lok árs 1953 til umfjöllunar. 

Tíð var umhleypingasöm í desember 1953. Tímaritið Veðráttan segir: „Tíðarfariö var óvenju milt, en umhleypingasamt. Snjór var lítill, en jörð mjög blaut. Á stöku stað sáust útsprungin blóm. Samgöngur voru greiðar.“ Þetta er þriðjihlýjasti desember allra tíma og sá fjórðiúrkomusamasti fyrir landið í heild og líklega sá úrkomusamasti á Suðurlandi. 

Ákefðaráhugamaður um veður sem fylgdist með um þetta leyti sagði ritstjóra hungurdiska að hann hefði tæpast séð jafnmargar lægðir og skilakerfi fara yfir landið í einum mánuði. 

Við sjáum óróann vel á mynd. 

Það má telja margar lægðir á myndinni en hún sýnir loftþrýsting í Reykjavík á 3 stunda fresti þennan mánuð - frá þeim 20. kemst stærri sveifla í þrýstinginn og lægðirnar verða meiri um sig.

Þrjú veður í mánuðinum skila sér inn á illviðralista, þann 6., 16. og svo veðrið 29. til 30. - en í síðastnefnda veðrinu náði vindur fárviðrisstyrk á Reykjavíkurflugvelli.

Hér er frétt sem birtist í síðdegisblaðinu Vísi þriðjudaginn 30. desember. Við sjáum að girðingin um Melavöllinn hefur skemmst allmikið í veðrinu - við getum þó ekki nefnt veðrið eftir þeim atburði því þessi girðing kemur við sögu í fleiri illviðrum. 

Lægðin sem olli þessu veðri verður að teljast venjuleg - hún kemur sem innlegg í reglulegri háloftabylgju suðvestan úr hafi. Hún var ekkert sérlega djúp.  

Hér má sjá stöðuna í háloftunum þegar lægðin nálgaðist á mánudeginum. Vindur var kominn í suður þegar hvessti - trúlega hárastarveður. Heldur slaknaði á vindinum þegar kuldaskil fóru yfir - en hvessti svo aftur af vestsuðvestri.

Kortið sýnir hæð 1000 hPa-flatarins kl.6 að morgni þriðjudags 30. desember. Sjávarmálsþrýstikort lítur eins út, 40 metra jafnhæðarbil jafngildir 5 hPa þrýstibili. Innsta jafnhæðarlína lægðarinnar sýnir -160 metra, það jafngildir 980 hPa þrýstingi. En línurnar eru mjög þéttar yfir Íslandi - sérstaklega yfir Suðvesturlandi. Hæðin fyrir sunnan land er í kringum 1036 hPa í miðju. 

Stormur var víða um land - en hinn mikli vindhraði í Reykjavík kemur samt nokkuð á óvart. Vindhraðaritið fannst ekki við snögga leit (sennilega illa merkt), en við lítum á athugunarbók flugvallarins.

Þar má sjá vindhraðann 33,4 m/s kl.9 og að vindhviða hefur farið í 42,2 milli kl.9 og 10. 

Þrýstiritið er mjög loðið um það leyti sem vindur er mestur - trúlega hávaðasamt í gamla flugturninum á Reykjavíkurflugvelli þar sem spádeild Veðurstofunnar var staðsett á þessum árum. 

Eins og fram kom í frétt Vísis varð lítilsháttar tjón í Reykjavík, en mesta tjónið í veðrinu varð fyrir norðan. 

Fjárhús og hlaða fuku á bænum Krossum á Árskógsströnd. Hluti af fjárhús- og hlöðuþaki fauk á Jódísarstöðum i Eyjafirði og þak af útihúsi á Urðum í Svarfaðardal. Þak fauk á haf út á bænum Hlíðarenda í Breiðdal (mjög óviss dagsetning Breiðdalsatburðar). Bát rak á land við Húsavík.

Hörmulegt slys varð á Vatnsleysuströnd þann 30. þegar ung kona og piltur drukknuðu í brimsogi er þau voru að bjarga fé.