Óvenjulegur háþrýstingur

Loftþrýstingur var nærri hæstu hæðum júnímánaðar í dag, fimmtudaginn 2. júní, mældist 1036,9 hPa í Önundarhorni og á Reykjavíkuflugvelli - reyndar er loftvogin á síðarnefnda staðnum líklega örlítið of há. 

Þrýstingur hefur aðeins þrisvar mælst jafnhár eða hærri í júní hér á landi. Hæst er vitað um 1040,4 hPa í Stykkishólmi 21. júní 1939 - þá varð þrýstingur reyndar hærri en nú á fleiri stöðvum. Síðan er vitað um 1038,2 hPa í Stykkishólmi þann 9. júní árið 1903 - og 6. júní 1897 mældist þrýstingur á Akureyri 1036,9 hPa, jafnmikill og hæst nú. Reyndar er nákvæmni þessara mælinga ekki upp á aukastaf - svo vel var vart hægt að mæla hæð loftvoganna sjálfra yfir sjávarmáli á þeim tíma. - Munum að 0,1 hPa er aðeins 80 cm hæðarmunur. - Við eigum líka 1038,0 hPa úr Nesi við Seltjörn 19. júní árið 1823 - kannski er hægt að trúa því að þrýstingur þá hafi í raun og veru verið aðeins hærri en nú - en hæð loftvogarinnar er ekki vel þekkt.

Kortið sýnir spá evrópureiknimiðstöðvarinnar og gildir nú á miðnætti (2. júní kl.24). 

Enn er smámöguleiki á 1037,0 hPa - en varla nema í nótt - síðan fer hæðin að síga saman.