Snarpur kuldapollur - en bæði lítill og hraðfara

Útlit er fyrir kuldakast í vikunni - það er þó ekki sérlega fyrirferðarmikið miðað við t.d. það sem heimsótti okkur sömu daga í fyrra. En við skulum samt líta á tvö spákort evrópureiknimiðstöðvarinnar.

Það fyrra gildir síðdegis á þriðjudag.

Heildregnu línurnar sýna þykktina, en hún mælir hita í neðri hluta veðrahvolfs. Mikill þykktarbratti er yfir landinu. Mjög hlýtt er vestan við land, það er 5380 metra jafnþykktarlínan sem snertir Reykjanes, en 5240 metra línan er við Austfirði - hér munar 140 metrum - eða um 7 stigum. 

Litirnir sýna hita í 850 hPa-fletinum, sem er hér í ríflega 1500 metra hæð yfir landinu. Við vesturströndina er hitinn um frostmark, en töluna -13 stig má sjá við Norðausturland, munar 13 stigum. Af þessu sjáum við að kalda loftið er fyrirferðarmeira í neðstu lögum heldur en ofar - fleygast undir það hlýja.

Meginkuldapollurinn sjálfur er svo alveg við norðurjaðar kortsins, - þar má sjá að þykktin er um 5040 metrar - loftið um 10 stigum kaldara heldur en við Austurland.

Þetta er ekki stór pollur - en hreyfist hratt til suðurs og verður yfir Íslandi austanverðu aðeins sólarhring síðar - síðdegis á miðvikudag. Þetta er heldur fyrr en spáð var fyrir nokkrum dögum - og tekur líka fyrr af.

Kortið að neðan gildir síðdegis á miðvikudag, 27. apríl.

Hér má sjá töluna -17 í 850 hPa í uppstreyminu áveðurs á Austurlandi - og þykktin er komin niður í um 5070 metra þar sem lægst er. Meðalhiti í neðri hluta veðrahvolfs hefur því fallið um 8 stig eða svo á Austurlandi frá því sem spáð er á þriðjudag, en við Reykjanes hefur þykktin fallið um 120 metra - sem samsvarar um 6 stiga kólnun. 

En það er ekki mikil fyrirferð í mesta kuldanum - og daginn eftir (á fimmtudag) á þykktin yfir landinu að vera komin aftur upp í um 5300 metra - ekki sérlega hlýtt - en nærri meðallagi árstímans. 

Svona til að ná einhverjum samanburði lítum við loks á samsvarandi kort frá 25. apríl í fyrra. Þá gekk skelfilegt og langvinnt kuldakast yfir landið - ekki þarf að horfa lengi til að sjá að væntanlegt kuldakast er í allt öðrum flokki - þó nógu leiðinlegt sé.

Þetta er kort frá í fyrra - athugið það. 

Athugasemdir

[Torfi Stefánsson (IP-tala skráð) 25.4.2016 kl. 07:58]

Lengi má böl bæta með því að benda á annað verra!
Þó svo að það hafi verið fínt veður síðustu daga og hitinn komist vel yfir 10 stigin víða, þá er samt lofhitinn ekki mikill og talsverður hitamunur dags og nætur. 
Og nú er verið að spá kuldakasti eins og kemur hér fram í þessari færslu Trausta. Hann degur þó úr því frekar en hitt því það virðist í raun ætla að ná frá miðvikudegi fram á sunnudag eða út mánuðinn.

Það er spá snjókomu fyrir norðan og austan á miðvikudag og fimmtudag og gæti m.a.s. snjóað eitthvað hér syðra seinni daginn. Hætta á frostnóttum allan tímann.

Gaman væri nú að fá tölur yfir meðalhita það sem af er mánaðarins. Síðasta vika var frekar köld þar til nú um helgina og sú á undan einnig.
Það virðist því ekkert ætla að bóla þessum hnattrænu hlýindum, þau koma minnsta kosti ekki hingað upp á skerið þessi misserin. Enn bíður maður og bíður eftir vorinu og verður alltaf fyrir vonbrigðum ...

[Sigurður Þór Guðjónsson, 25.4.2016 kl. 12:03]

Meðalhitinn það sem af er april er 0,9 stig yfir meðallagi síðustu tíu ára í Reykjavík og 1,5 á Akureyri. Marsmánuður var vel yfir meðallagi. Vorið hefur ekki látið bíða eftir sér en aðal vorið er auðvitað eftir.  

[Torfi Stefánsson (IP-tala skráð) 25.4.2016 kl. 20:36]

Í janúar var hitinn í Reykjavík 0,2 stig. Það var heilu stigi kaldara en meðaltal síðustu 10 ára (2006-15). Þetta var 5. kaldasti jánúrarmánuður frá 2000 eða í 16 ár. Enn kaldara að tiltölu var fyrir norðan og austan.

Febrúar í ár reyndist svo kaldasti febrúar síðan 2002. Meðalhitinn í Reykjavík var -0,5 stig sem er -1,9 stigum kaldara en meðaltal síðustu 10 ára. Sama átti við á landsvísu, kaldast síðan 2002.

Þetta skánaði svo aðeins í mars eins og Sigurður segir. Meðalhiti í Reykjavík varð 2,7 stig, 1,2 ofan meðallags síðustu tíu ára. Hlýjasti mars síðan 2012 (ekki er nú lengra síðan en svo).

 

Ef þetta er rétt hjá Sigga með apríl þá er hitinn það sem af er í Rvík 4,8 stig (ef meðalhitinn síðustu 10 ára er 3,9 stig).
Ég á hins vegar bágt með að trúa því þar sem þann 19. var meðalhitinn 4,2 stig og frekar kalt verið síðan nema núna síðustu daganna.
Og svo á aftur að kólna hressilega og spáð dagmeðalhita um frostmark á fimmtudaginn ...

 

[Trausti Jónsson, 25.4.2016 kl. 23:04]

Meðalhiti fyrstu 24 daga mánaðarins er 4,3 stig í Reykjavík, +0,9 stigum ofan meðallags sömu daga síðustu tíu ára og +1,7 stigum ofan meðallagsins 1961 til 1990. Meðalhitinn fellur væntanlega nokkuð þá 6 daga sem eftir lifa af mánuðinum.