Tuttugustigaskortur

Hiti hefur ekki farið í 20 stig á landinu síðan 7. júlí - nú er 10. ágúst. Það er harla óvenjuleg rýrð. Tuttugustigadagarnir í júlí urðu ekki nema þrír. Júlímeðaltal áranna frá 1996 (skeið sjálfvirka kerfisins) er 15,1 dagur. Það var í júlí 1998 sem tuttugustigadagar sjálfvirku stöðvanna voru jafnfáir. 

En kerfin tvö, það mannaða og sjálfvirka telja ekki alveg eins - á síðari árum er sjálfvirka kerfið mun þéttara og nær fleiri dögum en það mannaða - en var frekar á hinn veginn fyrir 2004 - þar á meðal í júlí 1998, en þá náði mannaða kerfið 9 dögum. Við þurfum því sennilega að leita enn lengra aftur til að finna jafnrýran tuttugustigajúlí, kannski var það júlí 1985 þegar mannaða kerfið sagði dagana vera 2 - sömu tölu gaf júlí 1979 og í júlí 1970 var dagurinn aðeins einn. 

Sumarið 2015 - hefur líka verið afskaplega tuttugustigarýrt það sem af er - dagarnir aðeins orðnir 8 á sjálfvirku stöðvunum og aðeins 4 á þeim mönnuðu (en í stórlega grisjuðu kerfi). 

Ársmeðalfjöldi tuttugustigadaga 1996 til 2014 er 32,6 á mönnuðu stöðvunum, en 36,5 á þeim sjálfvirku. Meðaltal áranna 1961 til 1990 er 21,0 - hlýskeiðið hefur því fært okkur að minnsta kosti 12 „aukatuttugustigadaga“ á ári á landsvísu, það er 60 prósent „aukning“ - sýnd veiði en ekki gefin.

En ekki í sumar - þótt það sé auðvitað ekki búið. Meðalfjöldi tuttugustigadaga fram til 10. ágúst 1996 til 2014 er 28,3 á sjálfvirku stöðvunum - rúmir þrír fjórðu hlutar ársfjöldans eru því venjulega liðnir hjá þegar hér er komið sumars. Að meðaltali komu aðeins 8 dagar síðar á sumrinu. 

Á árunum 1961 til 1990 var meðalfjöldi tuttugustigadaga til 10. ágúst 16,7 - aðeins 4,3 dagar að meðaltali eftir það sem lifir sumars. - En meðaltöl eru bara meðaltöl - árið 2003 komu 18 tuttugustigadagar eftir 10. ágúst og á mönnuðu stöðvunum hafa þeir 11 sinnum orðið 10 eða fleiri - á tímabilinu frá 1949. En - 8 sinnum komu engin 20 stig eftir 10. ágúst. 

Næstu tíu daga eru ekki margir tuttugustigadagar í sigtinu - sé að marka spár - en þeir gætu þó orðið einhverjir. - Hin köldu meðaltöl segja að eftir séu um það bil þrír á árinu. - En erum við ekki á hlýskeiði? Meðaltal þess segir að tíu tuttugustigadagar séu eftir á árinu. - Þessi leikur er ekki á „lengjunni“ er það?

Myndin sýnir „rétthugsanlegantuttugustigadag“ - miðvikudaginn 12. ágúst - í boði þykktarkorts evrópureiknimiðstöðvarinnar.

En - lægðin er djúp - mikið af skýjum og brælu í lofti.

Athugasemdir

[Torfi Stefánsson (IP-tala skráð) 10.8.2015 kl. 18:49]

Einmitt! Eins og ég er alltaf að segja. Nýtt kuldatímabil er hafið (ekki korta-).

Mér sýnist að þessi dagur, mánudagurinn 10. ágúst, sé sá kaldasti í tvo mánuði hér á höfuðborgarsvæðinu. Þá virðast sumarið vera búið því langtímaspárnar eru ekki beysnar.

Við erum greinilega ekki lengur á hlýskeiði!

[Anna Sigríður Guðmundsdóttir, 11.8.2015 kl. 00:49]

Verð að viðurkenna að ég hugleiddi það að senda son minn með vetradekkin í farangrinum, þegar hann fór í heimsókn vestur í Dýrafjörð í gær.

En mér fannst ég dálítið klikkuð að hugsa þetta, og að þá fengi ég nú bara enn einn klikkunar-stimpilinn, og var eiginlega sammála þeim stimpli.

Það virðist ætla að verða napurt, þurrt, frekar bjart, og kalt haust.

M.b.kv.