Fyrstu 15 vikur sumars

Enn tökum við stöðuna á íslenska sumrinu (að hefðbundnu tali), en nú eru liðnar af því 15 vikur. Svo vel(?) vill til - eins og margir lesendur muna - að kuldakast hófst einmitt á sumardaginn fyrsta. Segja má að það hafi staðið linnulítið síðan á landinu norðan- og austanverðu, en syðra hefur sloppið heldur betur til.

Nú er svo komið að þessi tími er á Akureyri sá þriðji kaldasti síðustu 67 árin (frá og með 1949) - en í Reykjavík er hann í 10. neðsta sæti. 

Myndin sýnir meðalhita fyrstu 15 vikna sumars á Akureyri á þessu tímabili.

Lárétti ásinn sýnir (að vanda) árin, en sá lóðrétti meðalhita í °C. Fyrstu 15 vikur sumars 2014 voru þær langhlýjustu á tímabilinu öllu - en heldur bregður við í ár og þarf að leita allt aftur til 1993 að nokkru viðlíka - og aftur til 1979 til að finna kaldara sumar. Sumarið 1967 var einnig harla laklegt sömu vikurnar. 

Hitinn á Akureyri hefur í sumar og vor verið um -1,7 stigum undir meðallagi tímabilsins alls, en -0,8 í Reykjavík, þar sem fara þarf aftur til 1993 til að finna kaldara. 

Athugasemdir

[Gunnar Th. Gunnarsson, 8.8.2015 kl. 09:31]

https://www.facebook.com/photo.php?fbid=10207782175055293&set=a.1084331831471.14108.1321645097&type=1&theater

Og svo hefur ekki hlýnað á jörðinni síðan 1997, eins og sjá má á mynd sem Ágúst H. Bjarnason birtir á fb-síðu sinni. Eitthvað er það nú ekki í samræmi við spár. :)