Fyrir sunnan land

Útlit er fyrir að lægð helgarinnar fari fyrir sunnan land - sem þýðir að vætutíðin heldur áfram um landið norðaustan- og austanvert. Sjá má frumvarp evrópureiknimiðstöðvarinnar um stöðuna síðdegis á laugardag (8. ágúst) á kortinu hér að neðan.

Jafnþrýstilínur eru heildregnar, hiti í 850 hPa er sýndur með mislitum strikalínum, frostmarkslínan er grænleit - en þær sem sýna hita ofan frostmarks eru rauðar - og bláar línur merkja hita neðan þess. Úrkoma er sýnd með litum - grænt yfir í blátt (sjá kvarðann). 

Lægðarmiðjan er hér beint sunnan við land á leið norðaustur - ætli veður verði samt ekki sæmilegt um meginhluta landsins mestallan laugardaginn - helst að hann blási allra syðst á landinu - og sums staðar suðaustanlands. Rigningin nær eitthvað inn á land - verður væntanlega mest á Suðausturlandi - og síðar á Austfjörðum og Norðausturlandi. 

Þetta er býsna öflug lægð miðað við árstíma - en fer að grynnast á laugardagskvöld. Þeir sem treysta sér til að rýna í kortið sjá að hiti í 850 hPa er meiri en 20 stig í Mið-Evrópu - þykktin er þar meiri en 5700 metrar - veðurstofur flagga rauðum hitamæli á viðvörunarskiltum - en lítill kuldapollur veldur úrhelli í Pýreneafjöllum og Suður-Frakklandi - evrópskir spáveðurfræðingar hafa úr nægilegu að moða næstu vikuna.

Örin efst til vinstri bendir á kuldapollinn haustgrun fyrsta - en rétt er að gefa honum gaum næstu daga. Þar má, ef vel er að gáð, sjá -5 stiga línuna. Á suðurvæng pollsins er líka mjög hlýtt loft, meir en +10 stig í 850 hPa - og sjá má mikla bleytu og orkuríkt umhverfi við Nýfundnaland. - Reiknimiðstöðvar hafa ekki ákveðið hvort eitthvað að ráði verður til úr stefnumótum eftir helgi. 

Athugasemdir

[Þorkell Guðbrands (IP-tala skráð) 7.8.2015 kl. 17:11]

Spárnar frá ECMWF virðast gera ráð fyrir að veðrakerfin dragi kuldapollinn, sem þú kallar svo skemmtilega "haustgrun 1" suðaustur yfir Grænlandsjökul og yfir á okkur þegar líður á næstu viku. Skyldi þó ekki fara svo að um miðjan mánuðinn fáum við fyrsta alvöru hausthretið?

[Trausti Jónsson, 7.8.2015 kl. 18:12]

Reiknimiðstöðvar hringla með framhaldið - samkomulag er um að pollurinn komi hingað - en gæti verið orðinn alveg tannlaus - eða hann þá misst af stefnumótum við hlýtt og rakt loft sem nauðsynleg eru í þessu tilviki til að búa til djúpa lægð/lægðir í honum. Vonandi er sumarið ekki búið - það er ólíklegt að svo sé.