Meðal köldustu júlímánaða um landið norðan- og austanvert

Mánuðurinn hefur verið mjög kaldur - sérstaklega um landið norðan- og austanvert - en undir meðallagi síðustu tíu ára um land allt. Á bletti um landið suðvestanvert er hann enn ofan við meðallag áranna 1961 til 1990. 

Kortið hér að neðan sýnir stöðu hitavika - sé miðað við síðustu tíu ár.

Vikin eru meiri en -3 stig á allstóru svæði norðaustanlands og við -4 stig í efstu byggðum og á hálendinu norðan Vatnajökuls. Skárra hefur verið á annesjum - sjórinn mildar aðeins þrátt fyrir allt. Kuldi hefur einnig legið vestur með landinu suðaustanverðu - og líka út Breiðafjörð - en þau svæði sem hafa sloppið best eru Faxaflói og sunnanverðir Vestfirðir. 

Keppnin á júlíbotninum er nokkuð hörð þannig að við vitum ekki enn í hvaða sætum hiti einstakra staða lendir - en mánaðarmet falla sennilega ekki á neinum stöðum þar sem mælingar hafa staðið í meir en 20 ár. Júlí 1993 er mjög viðskotaillur - og hleypir núlíðandi júlímánuði varla niður fyrir sig.

En þó - við fáum samt met. Lítum á töflu sem sýnir meðalhita á nokkrum sjálfvirkum stöðvum það sem af er mánuði. 

Hlýjustu og köldustu stöðvar júlímánaðar - til þessa (til og með 28.)
röð	ár	mán	mhiti		nafn
1	2015	7	11,41		Reykjavíkurflugvöllur
2	2015	7	11,34		Reykjavík
3	2015	7	11,33		Reykjavík búveðurstöð
4	2015	7	11,27		Korpa
149	2015	7	3,35		Innri Sauðá
150	2015	7	3,25		Þverfjall
151	2015	7	1,82		Brúarjökull B10
152	2015	7	1,59		Gagnheiði

Reykjavíkurstöðvarnar raða sér í toppsætin. Það er auðvitað mjög óvenjulegt - hefur þó gerst áður. - En á botninum er Gagnheiði. Það kemur ekki á óvart og heldur ekki að Brúarjökull og Þverfjall séu í næstu sætum þar fyrir ofan. Tölurnar á Gagnheiði og Brúarjökli eru hins vegar óvenjulegar. Þetta er lægsti meðalhiti sem sést hefur í júlí á íslenskum veðurstöðvum. - Nú voru þessar stöðvar ekki farnar að mæla í júlí 1993 - og er ekki ótrúlegt að þá hafi verið enn kaldara - en þetta eru samt lægstu tölur sem við eigum - og met sem slík. - Nokkuð langt er í næstu tölur ofan við. 

Við skulum líta á þær.

Lægsta júlítalan til þessa er frá Gagnheiði 1995, +3,00 stig, 1,4 stigum ofan við meðaltalið hér að ofan. Í júlí 1998 mældist meðalhitinn á Fonti ekki nema +3,33 stig - það er lægsta tala sem við eigum á láglendi. Nú er hins vegar mun hlýrra á Fonti - meðaltal núlíðandi júlímánaðar er +5,75 stig. Eitthvað munar um sjóinn í ár. 

Júlímánuður 1882 var afburðakaldur. Þá var meðalhiti í Grímsey 3,7 stig, en er +6,51 stig nú - nærri þremur stigum hlýrri. Lítillega kaldara var á Skagaströnd en í Grímsey í júlí 1882, 3,6 stig. 

Nú er hitinn í Möðrudal +5,8 stig - en var ekki nema +4,6 stig 1993. Ekki var mælt í Möðrudal 1882 - en þá var meðalhiti á Grímsstöðum á Fjöllum +7,4 stig - hærri en nú. 

Þetta ætti að sýna að eðli kuldans er nokkuð misjafnt. Stundum er kaldast að tiltölu inn til landsins - en skárra við sjóinn - stundum öfugt - og stundum er varla hægt að greina á milli. 

Vegagerðarlistinn er svona:

hlýjustu og köldustu vegagerðarstöðvar það sem af er mánuði
röð	ár	mán	mhiti		nafn
1	2015	7	11,39		Blikdalsá
2	2015	7	11,25		Akrafjall
3	2015	7	11,18		Kjalarnes
3	2015	7	11,18		Hraunsmúli
84	2015	7	4,51		Ennisháls
84	2015	7	4,51		Möðrudalsöræfi II
86	2015	7	3,98		Vatnsskarð eystra
87	2015	7	3,63		Fjarðarheiði
88	2015	7	3,57		Steingrímsfjarðarheiði

Tölurnar í neðstu sætunum öllum eru lægri heldur en lægstu júlímeðaltöl hingað til á vegagerðarstöðvunum. Þetta er kaldasti júlí sem þessar stöðvar hafa séð. Lægsta talan til þessa var frá Sandvíkurheiði, +5,41 stig - þar er meðalhiti nú aðeins +4,79 stig.

En við bíðum spennt eftir mánaðamótum. 

Athugasemdir

[Torfi Stefánsson (IP-tala skráð) 29.7.2015 kl. 04:42]

Þetta kuldatal er nú að verða mjög þreytandi. Dagurinn var mjög góður hér á höfuðborgarsvæðinu og um landið vestan- og sunnarvert. Hitinn fór t.d. yfir 17 í Stafholtsey. Borgin iðaði af mannlífi, fólk þyrptist léttklætt út á götur og torg og naut sólarinnar og hægviðrisins - en Trausti skrifar enn og aftur um kuldann - og ekki aðeins norðanlands og austan! 

Að rýna aðeins í einhverjar hitatölur (sem þó eru alls ekki lágar nema miðað sé við hitastigið í sunnan roki og rigninu) gefur einfaldlega ranga mynd af veðrinu. 

[Hilmar Hafsteinsson (IP-tala skráð) 29.7.2015 kl. 12:02]

Bestu þakkir fyrir að skýra frá staðreyndum Trausti Jónsson. Júlímánuður hefur sannarlega verið mjög kaldur á Íslandi. Reyndar hefur "sumarið" 2015 verið mjög kalt.

Þetta kuldatal er m.ö.o. mjög upplýsandi fyrir landsmenn og þarft.

[Sigurður Þór Guðjónsson, 29.7.2015 kl. 15:52]

Mikið er það nú þakkarvert að Trausti skuli ekki einblína á einstök landsvæði heldur sjá hlutina í víðu samhengi - hvort sem það er nú í hita eða kulda.