Þrálát suðvestanátt næstu daga?

Með miðvikudegi (25. mars) snýst vindur enn og aftur til suðvestanáttar. Hún virðist ætla að verða ríkjandi, alla vega viðloðandi, meira og minna fram yfir helgi og e.t.v. lengur. Lægð situr á Grænlandshafi - stundum vestur undir Grænlandi - stundum nær okkur eða  þá á Grænlandssundi. Hraðfara lægðir ganga til austurs fyrir sunnan land - og slá á suðvestanáttina meðan þær ganga hjá - en reiknimiðstöðvar telja að hún taki sig alltaf upp aftur. 

Kortið sýnir stöðuna um hádegi á fimmtudag (26. mars) - að mati evrópureiknimiðstöðvarinnar.

Hér kúrir lægðin í skjólinu við Grænlandsströnd - og nær alveg upp í háloftin. Hún beinir köldu lofti frá Kanada austur á Atlantshaf og í átt til okkar. Við sjáum að hún liggur nokkuð þvert á jafnhitalínurnar (bláar og strikaðar) í 850 hPa (um 1200 m hæð yfir sjávarmáli). Það er -10 stiga línan sem nær að Íslandi - hún táknar að frost er ríkjandi - þótt sólin nái nokkuð góðum tökum síðdegis á milli élja og norðaustanlands ætti í raun að vera besta veður lengst af. 

En þótt kalda aðstreymið sé eindregið liggur leið loftsins yfir hlýrri sjó og það gengur ekkert að koma -15 og -20 stiga jafnhitalínunum áleiðis til okkar - vindurinn er einfaldlega ekki nógu mikill. Kannski að hiti við sjávarsíðuna verði ekki nema svosem einu stigi undir meðallagi? 

Úrkoman er sýnd með gulum, grænum og bláum litum á kortinu. Á leið kalda loftsins virðast ekki vera neinir sérstakir garðar eða skilasvæði heldur dreifð él. En þótt líkan reiknimiðstöðvarinnar sé öflugt verðum við samt að gera ráð fyrir einhver skipulegur hroði lendi á okkur þessa næstu daga. 

Útsynningurinn virðist eiga að verða hvað öflugastur á föstudaginn - en það er í raun of snemmt að fjölyrða um það. 

En verra gæti það verið - miklu verra. 

Athugasemdir

[Torfi Stefánsson (IP-tala skráð) 25.3.2015 kl. 06:59]

Þetta með vestlæga átt fram yfir helgi stenst nú ekki samkvæmt spá Veðurstofunnar því hún spáir norðlægri átt á sunnudag og mánudag. Norska veðurstofan spáir því sama og að norðanáttin standi fram á þriðjudag.

Annars er verið að spá hægum vindi allan þennan tíma (eða eins og Trausti segir: "verra gæti það verið - miklu verra"!) svo við erum greinilega að losna við illviðrin sem hafa verið að hrjá okkur, nú síðast í nótt. 

[Sigurður Þór Guðjónsson, 25.3.2015 kl. 12:33]

Það versta sem ég get hugsað mér á þessum árstima er hörku norðanátt með frosti um allt land en glaðasólskini hjá okkur. En frosti allan solarhringinn.

[Ö. Jónasson (IP-tala skráð) 25.3.2015 kl. 18:19]

Þetta er ekki þrálát s/v-átt, heldur er þetta orðið eðlilegt veðurfar hér á landi ig hefur verið undanfarin tvö ár. Sérstaklega hefur þetta verið ábrandi í vetur.

Nýtt veðurkefrið hefur nefnilega fest sig í sessi hér á norðurslóðum.  Það er í stuttu máli þetta:

Kalt loft streymir stöðugt allan ársins hring frá norðurpólnum um sundið milli Grænlands og Labrador.

Þetta kalda loft blandast hlýju og röku lofti sem kemur sunnan úr höfum og magnast við þetta og myndar krappar lægðir með mikilli úrkomu, rigningu á sumrin, snjókomu á veturna.  

Þetta er það sem kallast lægðir á færibandi og er víst orðið "eðlilegt" veðurfar hér á landi og er orðið fast varanlegt ferli.

Ég hélt að veðurfræðingar hér á landi gerðu sér grein fyrir þessum breytingum veðrátunni hér á landi undanfarin tvö ár?

[Helga Kristjánsdóttir, 25.3.2015 kl. 23:35]

Nei, þessar lægðir voru ekki eins og perlufesti fyrir 2 árum og mörg ár á undan. En fátt er svo með öllu illt;það segja okkur vísindamenn að veðurfarið haldi niðri óþvera loftinu úr Holuhrauni.

[Helga Kristjánsdóttir, 25.3.2015 kl. 23:36]

Þurkaðu þetta bara út Trausti minn e að klikka á því sem Ö:Jónsson skrifar.

[Sigurður Þór Guðjónsson, 26.3.2015 kl. 00:32]

Hvað er "eðlilegt" veðurlag á Íslandi? Er til eitthvað staðal veður sem verður svo óeðlilegt ef það breytist eitthvað?

[Trausti Jónsson, 26.3.2015 kl. 00:49]

Ritstjórinn og Sigurður eru búnir að fylgjast lengi með veðri, ritstjórinn í 55 ár - og man ákveðna atburði enn lengra aftur - allt sem gerst hefur á því tímabili verður að teljast eðlilegt veðurfar. Það hefur þó sífellt komið á óvart og óvænt væri ef það hætti því - nú, svo eru nokkur þekkt afbrigði líka til á lager til viðbótar sem við tveir eigum eftir að upplifa - en teljast samt innan marka þess eðlilega. En segir ekki í Krukkspá að Ísland muni eyðast af langviðrum?