Hlýjar suðvestanáttir ríkjandi næstu vikuna?

Heldur daufleg var helgin á Suðvesturlandi í sunnanátt og sudda - en mun betri á landinu norðan- og austanverðu. Að sögn evrópureiknimiðstöðvarinnar verður svipað uppi á teningnum næstu viku til tíu daga. 

 

 

 

 

 

 

 

 

 

 

 

 

Heildregnu línurnar sýna meðalhæð 500 hPa-flatarins næstu tíu daga [7. til 17. september] og strikalínurnar meðalþykktina. Þykktin mælir hita í neðri hluta veðrahvolfs. Þykktarvik eru sýnd í lit. Við Austurland er mesta vikið 102 metrar. Það þýðir að hiti verður um 5 stigum ofan meðallags - reikni líkanið rétt. Þetta er stórt vik - fyrir svona langt tímabil.

Hér hefur oftlega verið bent á að mjög hlý þykktarvik skila sér illa til jarðar og þannig fer væntanlega aftur nú. Á móti kemur að nokkuð hvasst verður í lofti og við slík skilyrði er hitinn líklegri að ná sér niður þar sem vindur stendur af háum fjöllum. 

Spáin er mun óvissari fyrir síðari fimm dagana heldur en þá fyrstu. Hámark fyrri hluta hlýindanna verður náð á þriðjudaginn (sé eitthvað að marka spána yfirleitt). Þá er því spáð að mættishiti í 850 hPa komist yfir 22 stig yfir Austurlandi. Sól er farin að lækka á lofti og minnka við það líkur á mjög háum tölum. Til þess að þriðjudagurinn sýni okkur hæsta hita ársins þarf landshámarkshiti að komast yfir 23,3 stig. Til þess er ekki mikil von - en samt ekki alveg vonlaust. 

Talan á kortinu yfir Suðvesturlandi er +55 - það segir að hiti sé +2,5 stigum ofan meðallags septembermánaða áranna 1981 til 2010. Meðalhiti í september í Reykjavík þetta sama tímabil er 8,0 stig. Að hiti þar verði að meðaltali ofan 10 stiga þessa tíu daga er hugsanlegt - en fremur ólíklegt. 

Hlýindin eru tengd fyrirstöðuhrygg yfir Bretlandseyjum og Skandinavíu og hann er aftur studdur af afskorinni lægð austan Asóreyja. Kulda er spáð yfir Baffinslandi, fjórum stigum undir meðallagi.

Höfum í huga að þetta kort sýnir tíu daga meðaltal - mikið getur vikið frá meðallaginu einstaka daga - jafnvel þó spáin sé rétt.  

Athugasemdir

[kristinn geir steindórsson briem (IP-tala skráð) 8.9.2014 kl. 09:17]

eru öfgar að aukast í veðurfari heimsins fellibiljir virðist vera öplugri en áður flóð i asíu ymislegt fleira er hægt að telja til hvernig er það í sögunni sem nær ekki voðalega langt aftur. nemað þá hugsanlega í borkjörnum og jarðlögum. ef skoðaðaðar eru tölur hér á landi þá hafa senilega komið tvö kuldatímabil frá því mælíngar hófust fyrir alvöru og tvö hlískeið erum við nú á því seitna sem ætti þá að endast til um 2020. með hléum svo það ætti að vera til næg gögn til að rína í hvort það sé einhver hríngrás sem ég trúi á að sé rauninn

[Sigurður Þór Guðjónsson, 8.9.2014 kl. 13:10]

Það væri nú notalegt að fá þó ekki væri nema einn sæmilega hlýjan sólardag í Reykjavík áður en alvöru haust tekur við. En líkurnar minnka með degi hverjum. Það er líitð varið í sólardaga með t.d. bara 8 stiga hita eða minna þegar enn er september.  

[Gunnar Th. Gunnarsson, 8.9.2014 kl. 14:10]

Aukin flóð þurfa ekki endilega vera vegna öfga í veðri. Þau geta verið vegna fólksfjölgunar og áhrifa þess að umhverfið. Einnig má nefna meira frétta og upplýsingaflæði. Ekki má gleyma því að vondar fréttir selja betur en góðar.