Hámarkshiti það sem af er sumars (heldur lélegur víðast hvar)

Það má vekja athygli hversu lágur hæsti hiti ársins til þessa er á landinu - sem og á mjög mörgum einstökum veðurstöðvum - miðað við hversu hlýtt hefur annars verið í sumar. En það hefur verið mjög skýjað í sumar - líka fyrir norðan. 

Hæsti hiti á landinu til þessa eru 23,3 stig sem mældust á Húsavík 23. júlí. Hiti hefur ekki komist upp í 20 stig nema á rúmum þriðjungi allra veðurstöðva (hálendi og útnes meðtalin). 

Mjög lausleg (og eftir því ónákvæm) skyndikönnun gefur til kynna að almennar líkur á að hæsti hiti á árinu falli á ágúst (eða síðar) séu ekki nema um 30% að meðaltali á stöðvunum. 

Listi yfir hámarkshita ársins (það sem af er) á öllum sjálfvirkum stöðvum er í viðhengi og geta nördin velt sér upp úr honum.

Þar má m.a. sjá að lægsta hæsta hita ársins, á stöðinni á Brúarjökli - þar hefur hiti ekki komist ofar en í 11,1 stig. Það var 7. maí (já). Þverfjall er næstlægst með 12,6 stig, reyndar bæði í júní og júlí. Í þriðja neðsta sæti er vegagerðarstöðin á Öxi með 13,8 stig.

Á láglendi vekur hinn slaki árangur Reykjanesbrautar athygli, þar er hæsti hiti ársins til þessa ekki nema 15,3 stig - sem mældust 8. og 12. júní - svipaður hiti og hæstur er á ýmsum fjallvegum. Í Seley hafa ekki mælst nema 15,5 stig - en það kemur ekki svo mjög á óvart.  Keflavíkurflugvöllur er í 16,9 stigum, sömu daga og „toppurinn“ hjá Reykjanesbrautinni. 

Sjálfvirka stöðin í búrinu á Veðurstofutúninu hefur hæst komist í 17,1 stig, en hin sjálfvirka stöðin á sama stað í 19,2 stig - en Reykjavíkurflugvöllur í 18,1. 

Austanlands eru Hallormsstaður (23,0 stig) og Egilsstaðaflugvöllur (22,9 stig) með hæstu tölurnar, Sámsstaðir hins vegar á Suðurlandi (22,6 stig) og Vatnsskarðshólar með 22,5 stig - sem er óvenjugóður árangur á þeim stað. 

Seljalandsdalur á hæsta hitann á Vestfjörðum, 20,0 stig, og Gjögurflugvöllur er litlu lægri með 19,9 - sem er óvenjugóður árangur eins og á Vatnsskarðshólum - ekki eru allir bældir.  

Þótt austanáttin þessa dagana sé ekki sérlega hlý - er hún samt þannig að nái sól að skína gæti hæsti hiti ársins á einhverjum af stöðvunum birst fyrirvaralítið - sérstaklega á það við um slöppustu staðina. 

Skrár tengdar þessari bloggfærslu:

• hámörk til 5. ágúst 2014

Athugasemdir

[Gunnar Th. Gunnarsson, 6.8.2014 kl. 01:49]

Hvar er viðhengið?

[Trausti Jónsson, 6.8.2014 kl. 01:51]

Takk fyrir Gunnar - það er komið núna.

[Erlingur Alfreð Jónsson, 6.8.2014 kl. 04:38]

Góðan dag. Meira en 2 gráðu munur á sjálfvirkum stöðvum á sama stað (fyrir utan Veðurstofuna) finnst mér nokkuð mikið, svo ég nördist aðeins. Er þessi munur venjulega svona mikill á milli þessara stöðva og er vitað hvers vegna hann er? Þessi tvö gildi fyrir Reykjavík áttu sér stað með 4 klst millibili. Hvað sýndi stöð 7475 kl. 20 þ. 29 júlí þegar hin sýndi 19,2 gráður? Maður hefði haldið að á þessum stað, fyrir utan Veðurstofuhúsið, ættu 2 stöðvar að sýna sama hitastig, alla vega nokkrun veginn (+/- ca. 0,1 stig)? Hvor stöðin er svo notuð til að tilkynna hitastig í Reykjavík? Eða velja menn bara hæsta gildið hverju sinni? :-)

[Trausti Jónsson, 7.8.2014 kl. 00:18]

Erlingur, munurinn á milli hita stöðvanna varð mestur milli kl. 19:40 og 19:50 þann 29. júlí, 2,5 stig. Mælum er ekki eins fyrir komið á stöðvunum tveimur - tregða þeirra er misjöfn og þær sýna ekki sama hita - upp á 0,1 stig nema í um 13% tilvika. Ég mun, vonandi fljótlega, fjalla um þetta sérstaklega hér á hungurdiskum. Þegar vísað er í hita í Reykjavík er oftast átt við mönnuðu stöðina (kvikasilfursmæli) - sem sagt þriðju stöðina á túninu. Meðalhitamunur þessara þriggja stöðva er sáralítill, t.d. ekki nema 0,02 stig að meðaltali í júlí 2006 til 2014.