Næsta lægð er við Nýfundnaland

Lægðirnar kröppu sem gengu nærri Færeyjum í gær og dag (sunnudag 15. desember) voru litlar um sig þegar þær dýpkuðu hvað mest. Síðari lægðin þó aðeins stærri. Svo er að heyra að allmiklir skaðar hafi orðið í Færeyjum. Hvasst varð um tíma sums staðar austanlands í dag og sömuleiðis olli lægðin miklu hvassviðri og einhverju tjóni í Skotlandi. 

Næsta lægð verður að sögn álíka djúp og þær fyrri en talsvert fyrirferðarmeiri. Það þýðir að vindur verður almennt minni - en nægur samt. Lægðin á að fara yfir Ísland á aðfaranótt miðvikudags. Klukkan 18 á morgun (mánudag) verður hún um 700 km austur af Nýfundnalandi.

Hún verður þá um 974 hPa í miðju en á að dýpka niður í um 950 hPa á leið hingað til lands. Það háir lægðinni aðeins - ef svo má segja - að hún skilur eftir sig lægðardrag til vesturs um Nýfundnaland og hefur farið á mis við kaldasta loftið norðurundan. Hún á því rétt svo að ná inn í skilgreininguna amerísku á sprengilægð, en til að komast í þann flokk verða lægðir að dýpka um 24 hPa á sólarhring. En við verðum samt að taka lægðina alvarlega og rétt að fylgjast vel með veðurspám Veðurstofunnar.

Þessi lægð á hins vegar að leggja upp fyrir þá næstu þar á eftir sem springur út suður í hafi strax á miðvikudag. Hún á að taka 38 hPa á 24 tímum - eða svipað og Færeyjalægðirnar. Að sögn evrópureiknimiðstöðvarinnar eru Færeyjar og Skotland enn í skotlínunni - en við sleppum vonandi að mestu - en trúlega ekki alveg.

Efnislega á svipuð staða að halda áfram svo lengi sem sést. Margar krappar óðalægðir á Atlantshafi.

Athugasemdir

[Hilmar Hafsteinsson (IP-tala skráð) 16.12.2013 kl. 21:47]

Er ekki líka rétt að fylgjast með Suðurskautinu Trausti? Nýtt kuldamet slegið, -135.8°F, mesti kuldi sem skráður hefur verið frá upphafi mælinga og hafísinn mældist 17.16 milljón km2 í nóvember (1981 - 2010 meðaltalið fyrir nóvembermánuð er 16.30 milljón km2)!

> http://guardianlv.com/2013/12/antarctica-record-cold-and-growing-ice-chills-global-warming-theories/

[Sigurður Þór Guðjónsson, 17.12.2013 kl. 00:32]

Þetta eru -93,2 kuldabolastig á Celsíus! Það er greinilega líka að kólna á Suðurskautslandinu! Bráðum fer að frjósa i helvíti!

[Emil Hannes Valgeirsson, 17.12.2013 kl. 00:42]

135.8°F var nú bara einhver gervihnattamæling frá því í ágúst 2010 sem þeir voru að rýna í.

[Sigurður Þór Guðjónsson, 17.12.2013 kl. 00:52]

Er þetta ekki bölvað bull!

[Trausti Jónsson, 17.12.2013 kl. 01:59]

Minnsti yfirborðsljómi (luminance temperature) sem fundist hefur í gervihnattagögnum - það er metið. Sá mesti er 70,7 stig sem komu fram við mælingu yfir Íran 2005. Munum líka að viðurkenndur heimslágmarkshiti er -89,2 stig á Vostokstöðinni, ljómametið breytir engu þar um. Stöðvakerfið á Suðurskautslandinu er mjög gisið - en er mjög að þéttast - nánast öruggt er að Vostokmetið verður slegið á næstu árum - alveg sama hvort veðurfar fer hlýnandi eða ekki.

[Hilmar Hafsteinsson (IP-tala skráð) 17.12.2013 kl. 13:51]

70,7°C - 93,2°C = - 22,5°C. Meint "hlýnandi veðurfar" í hnotskurn :)

[Emil Hannes Valgeirsson, 17.12.2013 kl. 14:12]

Nei. Hilmarskur misskilningur í hnotskurn.

[Sveinn Atli Gunnarsson, 17.12.2013 kl. 15:27]

Kuldamet munu verða slegin - svo og hitamet, hvað sem líður hnattrænni hlýnun. Þegar það hlýnar má gera ráð fyrir að hitametin verði fleiri eins og verið hefur á undanförnum áratugum. Þegar net mælistöðva þéttist á Suðurskautinu þá má líka eiga von á mælingum með kuldametum þar (eins og Trausti kemur inn á).

PS. Nóvember í ár var hlýjasti nóvember frá upphafi mælinga samkvæmt mælingum NASA-GISS - það er fróðleg staðreynd sem hilmarskir kólnunarsinnar ættu að hafa í huga, sjá http://data.giss.nasa.gov/gistemp/tabledata_v3/GLB.Ts+dSST.txt

[Hilmar Hafsteinsson (IP-tala skráð) 17.12.2013 kl. 17:33]

Hér hafa hlýnunarsinnar farið mikinn í nóvemberhitadrama. Staðreyndin er engu að síður sú að sé litið á 11 fyrstu mánuði ársins þá er árið 2013 (það sem liðið er) fjórða heitasta ár frá því að mælingar hófust 1891 (átjánhundruðníutíuogeitt) - deilir reyndar fjórða sæti með 2002. Árin 1998, 2005 og 2010 eru öll heitari.

Hér dugar því ekki að fara að leita bláberja við Esjurætur að hætti þeirra EHV og SAG, heldur verður að sjálfsögðu að líta á árið í heild sinni :)

> http://www.usatoday.com/story/weather/2013/12/17/warm-november-global-climate-report/4052839/

[Sveinn Atli Gunnarsson, 17.12.2013 kl. 18:56]

Einmitt Hilmar - árið er það fjórða hlýjasta frá upphafi mælinga eins og sakir standa, takk fyrir að benda á þá staðreynd. Staðreynd sem er m.a. mér mjög kunn og ætti að vera kunn sem flestum - enda engin kólnun í pípunum, heldur áframhaldandi hlý ár á heimsvísu. Frábær nálgun að benda á þetta - þar sem þetta styður ekki kólnunar fullyrðingar...takk fyrir Hilmar.

PS. Ég á ekki von á að Hilmar skilji hversu mikið hann skýtur niður eigin fullyrðingar - en hvað um það - best að þakka góðar ábendingar.

[Hilmar Hafsteinsson (IP-tala skráð) 17.12.2013 kl. 20:13]

Hér ber nýrra við. Trausti hefur staðfest nýtt kuldamet, -135.8°F (-93,2°C) og þýðandinn á loftslag.is hefur staðfest að árið 2013 sé einungis í fjórða sæti (ásamt 2002) í hópi hlýjustu ára frá því að mælingar hófust!

Það er semsagt staðfest að engin meint hnatthlýnun er í gangi - enda telst það viðurkennd vitneskja að engin hnatthlýnun hefur átt sér stað sl. 15 ár. Jafnframt hneigjast sífellt fleiri vísindamenn á þá skoðun að hnattkólnun sé yfirvofandi.

Bullkenningin um meinta hnatthlýnun vegna aukins magns CO2 í andrúmslofti hefur því verið hrakin :)

[Höskuldur Búi Jónsson, 17.12.2013 kl. 21:54]

Hvað segirðu Hilmar - er ekki árið 2013 þá heitara en 2012 - það hlýtur því að vera að hlýna samkvæmt þínum kokkabókum

Reyndar er árið ekki búið, en það skiptir kannski ekki máli - því það er sama hvar árið lendir, það mun vera að kólna samkvæmt eðlisfræðispekúlantinum Hilmari...