Enn einn hlýindavetur liðinn

Á Veðurstofunni nær veturinn yfir tímabilið desember til mars. Það tímabil á betur við hérlendis heldur en alþjóðaveturinn desember til febrúar. Reyndar var það svo í nágrannalöndunum að mars 2013 varð kaldari heldur en vetrarmánuðirnir hver um stig. Það hefur gerst hér líka að vormánuðurinn apríl hafi verið kaldasti mánuður ársins.

Samkvæmt gamla íslenska tímatalinu nær veturinn yfir allan tímann milli fyrsta vetrardags og sumardagsins fyrsta. Hvar núlíðandi vetur lendir í metingi á þeim vettvangi verður að sýna sig. Fyrirfram má þó segja að þar sem nóvember var rétt í rúmu meðallagi hér á Suðurlandi er varla að árangurinn verði jafngóður og veðurstofuveturinn státar nú af.

Það eru aðeins þrír vetur sem hafa gert betur í Reykjavík frá upphafi samfelldra mælinga þar 1871. Einn vetur á eldra mæliskeiði Reykjavíkur (1823 til 1854) blandar sér í flokk þeirra allra hlýjustu. Það er 1847.

En lítum á meðalvetrarhitann á mynd.

Þrepið 2003 verður nú sífellt áþreifanlegra - en ekki megum við þó halda að við stöndum á því um alla framtíð. Kuldinn í nágrannalöndunum í austri sýnir að hitann má að minnsta kosti að einhverju leyti þakka afbrigðilegum hringrásaraðstæðum. Fyrirstöðuhæðin góða sér um sitt.

Í mars var hún þó vestar heldur en í janúar og febrúar. Svo virðist sem hún lifi áfram um sinn - en þetta er nú orðin býsna löng syrpa.

Skrár tengdar þessari bloggfærslu:

• Meðalhiti á Brú á Jökuldal 1969 til 2013

Athugasemdir

[Aðalsteinn Ingi Jónsson. (IP-tala skráð) 3.4.2013 kl. 15:01]

Hér á Jökuldal hefur verið kafsnjór síðan síðustu helgi október mánaðar. Þegar þú talar um enn einn hlýindaveturinn þá hefur hluti landsins aðra sögu að segja. Febrúar að vísu þokkalega hlýr og góðviðrasamur, aðrir mánuðir vetrarins ömurlegir. Kv Aðalsteinn Jónsson Klausturseli.

[Ágúst H Bjarnason, 3.4.2013 kl. 17:12]

Kaldasti marsmánuður í Þýskalandi í 130 ár stendur í Mitteldeutsche Zeitung í dag: http://www.mz-web.de/panorama/wettervorhersage-wann-kommt-endlich-der-fruehling-,20642226,22268888.html

[Pálmi Freyr Óskarsson, 3.4.2013 kl. 21:07]

Sæll Trausti.

Ég hef einkennilega áhuga á vindhraða og loftþrýstingstölum, annað enn Veðurstofa Íslands gerir. Og þar sem marsmánuður var mjög sérstakur fyrir háan vindhraða og loftþrýsting þann 6. mars. Þá vantar mér topplista dagsmeðaltals vinds á Stórhöfða, Vestm.bæ og Surtsey. Mestu 10 mín. meðalvindhraða og mestu vindhviður á Stórhöfða, Vestm.bæ og Surtsey. Og svo langar mér líka að fá hæstu loftþrýstingtölur á þessum sömu stöðvum.

Væri enn betra ef það væri líka hægt að fá hæstu vindtölur og loftþýstingin í hverju mánuði fyrir sig.

[e-mail]

[Trausti Jónsson, 4.4.2013 kl. 01:05]

Þakka ádrepuna Aðalsteinn. Hitamælingar hafa verið gerðar á Brú frá 1969. Nýliðinn vetur er þar í 7. til 10. hlýjasta sæti á tímabilinu (af 44) og janúar og febrúar saman hafa aldrei verið hlýrri en nú - rétt eins og um meginhluta landsins. En snjóþungt hefur verið á Norðausturlandi í allan vetur og aldrei náð að taka. Á Akureyri eru alhvítu dagarnir orðnir 126 það sem af er vetrar og hafa ekki verið fleiri á sama tíma síðan 1999. Þetta er 20 dögum umfram meðallag. Ég man ekki meðalfjölda alhvítra daga á Brú þann tíma sem mannaðar athuganir fóru þar fram - þarf að fletta því upp.

Ég þakka vísinn Ágúst. Ég skal tína þetta til Pálmi - en það tekur smátíma.

[Trausti Jónsson, 4.4.2013 kl. 01:07]

Ég setti mánaðameðalhita á Brú 1969 til 2013 í viðhengi pistilsins. Þeir sem hafa áhuga geta náð í hann þar.

[Pálmi Freyr Óskarsson, 5.4.2013 kl. 19:37]

Allt í góðu Trausti. Ég bíð þolinmóður og spenntur eftir tölfræðinni.