Hiti í mars yfir meðallagi - loftþrýstingur óvenju hár

Hiti í mars var yfir meðallagi á Suður- og Vesturlandi en rétt undir því norðanlands og austan. Hér er miðað við árin 1961 til 1990. Sé miðað við síðustu tíu ár (2003 til 2012) var mánuðurinn í kaldari kantinum, 1 stigi undir meðallagi á Suður- og Vesturlandi en 2 til 2,5 undir á Norðausturlandi.  En nánari samantekt kemur væntanlega frá Veðurstofunni áður en langt um líður. Sömuleiðis er bent á umfjöllun nimbusar um mánuðinn og sömuleiðis pistil Emils Hannesar um hita í mars.

Heldur merkari er loftþrýstingurinn. Í Reykjavík var mánaðarmeðaltalið 1019,7 hPa, hærra en nokkru sinni í mars síðan 1962 og þar á undan 1916. Háþrýstingur á Íslandi kemur oft illa niður á hita  í Evrópu norðan- og vestanverðri. Bretar telja mars nú þann kaldasta frá 1962, atburðum ber saman hér og þar. Aftur á móti var þó nokkru kaldara hér á landi í mars 1962 heldur en nú.

Í háloftunum var vestnorðvestanátt ríkjandi í mars, en austnorðaustanátt nærri sjávarmáli. Við lítum betur á þau mál síðar.