Skilagleði

Í framhaldi af súpumynd gærdagsins á hungurdiskum má hér sjá sjávarmálsgreiningu bresku veðurstofunnar nú síðdegis í dag (páskadag 31.3. 2013 kl.18). Þar ríkir að vanda mikil skilagleði og þarf varla fleiri athugasemda við.

En þetta er svosem ekki ólíkt því sem haldið var að ritstjóranum í Björgvin fyrir nærri 40 árum. Að drepa skil var synd. Jafnvel var höstuglega spurt úr hverju þau hefðu drepist ef vantaði upp á töluna og dánarorsökin var ekki kristalklár. Nú á dögum er almenningi hlíft við tölvuspám eins og t.d. þessari hér að neðan.

Hún sýnir hæð veðrahvarfanna (í hPa) á sama tíma og kortið hér að ofan. Það er evrópureiknimiðstöðin sem reiknar. 

Myndin batnar við stækkun. Sjá má útlínur Íslands inni í bláa flekknum rétt ofan við miðja mynd. Norðurhluti Spánar er lengst niðri í hægra horni.

Á myndinni sýnir blái liturinn há veðrahvörf - oftast hæðarhryggi eða fyrirstöðuhæðir. Guli liturinn sýnir lág veðrahvörf. Brúnt, fjólublátt og hvítt sýnir þá staði sem þau eru allra lægst. Yfir Íslandi ná veðrahvörfin upp í 195 hPa, í dag um 11,3 kílómetra hæð. Hvíti bletturinn sýnir að þar ná veðrahvörfin niður í 750 hPa, í dag um 2300 metra hæð.

Sunnan Íslands eru margar dældir í veðrahvörfin og auk þess langir borðar þar sem skiptast á hærri og lægri gildi. Þetta er auðvitað alveg jafnmikil súpa fyrir óvön augu og skilagleðikortið sýnir. Sennilega veldur litasúpan enn meiri ógleði heldur en skilasystir hennar hjá almennum lesendum - þeir verða bara að afsaka vondan smekk og óeirð ritstjórans.

Athugasemdir

[Sigurður Þór Guðjónsson, 1.4.2013 kl. 12:38]

Hvað vilja þeir meina að þessi einföldu strik eigi að tákna, hvers konar skil eiga það að vera? Eitt er milli Íslands og Noregs, annað norðan við Noreg, eitt suður í hafi, eitt yfir Ítalíu, eitt yfir Adríahafi og svo framvegis. Hef brotið heilann um þetta í mörg ár og sef stundum ekki á næturna yfir þessum leyndardómi og verið kominn á fremsta hlunn með að spyrja skilanefndirnar. En hver skollinn ætli þetta eigi að vera?

[Sigurður Þór Guðjónsson, 1.4.2013 kl. 12:45]

Og svo eru þarna skil yfir Eystrasaltslöndum og Miðfjarðarhafi  sem líkjast kulda og hitaskilum en oddarnir og hálfhringirnir eru ekki fylltir út með svörtu heldur eru gersamlega innantómir! Hvaða fiff ætli  það eigi að vera! 

[Trausti Jónsson, 1.4.2013 kl. 17:31]

Eiföld strik tákna (hálofta-)lægðardrög eða skúra- eða éljabakka án skila. Venjulega var slíkt merkt með breiðri strikalínu fyrr á tíð (og er enn í Bandaríkjunum). Sjá t.d. Wikipediu. Innantóm skilamerki tákna háloftaskil - langoftast í 850 hPa.