Mikið um að vera á norðurhveli - eins og vera ber nærri sólstöðum

Enn lítum við á hefðbundið norðurhvelskort - það breytir stórlega um útlit frá degi til dags og sýður á flestum bylgjum. Kortið gildir um hádegi á laugardag 8. desember.

Ísland er rétt neðan við miðja mynd, nærri því ofan í einni stuttbylgjumiðjunni (laugardagslægðin). Sú situr óþægilega ofan á stórum hrygg og fellur hratt til suðausturs og suðurs á jaðri hryggjarins og styrkir kuldasvæðið á meginlandinu. Afleit og kröpp lægð er að komast suður á Miðjarðarhaf. Sú fór tíðindalítið hjá hér í dag (miðvikudag) - en er orðin illvíg þar suður frá. Þykkt er spáð niður undir 5200 metra á Ítalíu á sunnudaginn - það er efni í mikla snjókomu í inn- og uppsveitum.

Hér hvessir eitthvað í svip meðan laugardagslægðin skýst hjá en léttir fljótt til aftur þegar hæðarhryggur fylgir á eftir. Gríðarlegar sveiflur eru síðan í spám sem ná lengra fram í tímann og virðist lægðin sem á kortinu er langt suðvestur í hafi sé erfið viðureignar.

Heimskautakuldinn (fjólublár litur) sem var mestur yfir Síberíu fyrir nokkrum dögum hefur á kortinu fært sig yfir á vesturhvel og svæðið kringum norðurskautið. Hann heldur áfram að sullast um. Þótt hann sé ekkert á suðurleið að sinni hefur hann samt mikil áhrif á bylgjumynstrið með umbrotum sínum.

Athugasemdir

[Ari (IP-tala skráð) 6.12.2012 kl. 12:43]

Takk fyrir fróðleikinn, er hægt að sjá reglulega svona norðurhvelskort á vedur.is? (ég rata allavega ekki inná það ef það er til)

[Hilmar Hafsteinsson (IP-tala skráð) 6.12.2012 kl. 19:32]

"Ísland er rétt neðan við miðja mynd." Er ekki stutt í heimskautakuldann (fjólublár litur) Trausti?

[Trausti Jónsson, 7.12.2012 kl. 01:23]

Ari - norðurhvelskortin eru aðgengileg hjá Veðurstofunni, en vegna óskiljanlegrar(?) leyndarhyggju evrópureiknimiðstöðvarinnar má Veðurstofan strangt tekið ekki dreifa tenglum á þau á alþjóðavísu. Sendu mér póst á [e-mail].

Hilmar, mörk fjólubláu litanna og þeirra bláu er við 4920 metra á myndinni. Svo lítil þykkt er alveg sárasjaldgæf hér á landi og má nánast telja upp þau fáu tilvik síðustu 60 ára á fingrum annarrar handar. En fjólublái liturinn hefur þó komist til landsins.