Fellibyljatíminn í Atlantshafinu langt genginn

Nú er langt liðið á fellibyljatímann í Atlantshafinu - en þrátt fyrir það eru tveir stafrófsstormar á sveimi þessa dagana. Þeir taka bókstafina S og T, Sandy og Tony. Tony er einn af þeim sem rétt svo ná í nafn og deyja svo (vekja efasemdir um samanburðarhæfni stormaskráa nútímans og fyrri tíma). Sandy er hins vegar í nokkuð góðum gír á milli Jamaíka og Kúbu. Myndin hér að neðan er fengin af síðu Kanadísku veðurstofunnar (Environment Canada) um miðnæturbil (kl. 23:45, 24. okt).

Óvenju mikil óvissa hefur verið í spám reiknimiðstöðva um framrás kerfisins. Fyrir nokkrum dögum virtist það ætla að hverfa út á mitt Atlantshaf og verða þar að heiðarlegri lægð, en síðan tók evrópureiknimiðstöðin upp á því að senda storminn á land á Nýja-Englandi með hvassviðri og gríðarlegri rigningu. Aðrar miðstöðvar hafa fylgt í kjölfarið og gætir óróleika vestra vegna þessa. En reynsluboltarnir við fellibyljamiðstöðina í Miami eru þó enn á því að kerfið fari ekki á land á meginlandi N-Ameríku og ógnin felist fyrst og fremst í brimi við ströndina og áfalla á bátum og skútum á hafi úti.

Nú gengur Sandy á land á Kúbu og laskast umtalsvert við það - trúlega minnkar óvissan þegar hringrásin nær sér á strik aftur. Eins og oftast þegar stór kerfi eru á ferðinni í Karabíska hafinu verður Haiti illa úti vegna rigninga, flóða og skriðufalla. Gildir þá einu hvort vindur fylgir eða ekki.

Annars er vindur í Sandy ekki tiltakanlega mikill - óveðrið nær rétt upp í fellibylsstyrk.

Athugasemdir

[Hákon (IP-tala skráð) 25.10.2012 kl. 18:35]

Þetta er nú ekki alveg rétt hjá þér því Sandy er núna í 90 hnúta styrk þannig að kerfið flokkast að styrkleika sem 2. stigs fellibylur.

http://www.nhc.noaa.gov/text/refresh/MIATCDAT3+shtml/251446.shtml?

[Trausti Jónsson, 26.10.2012 kl. 00:26]

Það er rétt Hákon - fellibyljamiðstöðin i Miami var heldur of neðarlega í spám sínum.