Dægurlágmörk ársins 2011

Nú eru að minnsta kosti tveir spilliblotar framundan á landinu (föstudagur og sunnudagur) - er það ástand sem fyrr fyrirkvíðanlegt vegna áfreða sem þessar skammvinnu hlákur ná varla að vinna á.

Hungurdiskar eru enn í nördahug og birta í viðhengi töflu um lægsta hita hvers dags á landinu árið 2011. Hún er þrískipt, Vegagerðarstöðvarnar eru sér í töflu og síðan er sérstök aukatafla sem nær aðeins yfir sjálfvirkar stöðvar i byggð. Gögnin eru sem fyrr fengin úr gagnasafni Veðurstofunnar.

Mesta frost ársins mældist við Upptyppinga þann 8. desember, -27,8 stig. Þetta er nákvæmlega sama og meðaltal áranna 1961 til 1990, en við þann samanburð verður að hafa í huga að köldum stöðvum hefur fjölgað meira heldur en öðrum síðan þá. Hálendið er mun betur vaktað en áður. Meðaltal lægsta lágmarks áranna 2001 til 2010 er -28,3 stig.

Lægsta lágmark í byggð á árinu 2011 var -27,3 stig og mældust við Mývatn þann 6. desember. Lægsta lágmarkið á Vegagerðarstöðvunum mældist sama dag, -22,7 stig á Hólasandi. Við munum enn þessa köldu daga.

Frostlaus dagur kom ekki fyrr en 26. júní, en í byggð kom fyrsti frostlausi dagurinn þann 9. apríl. Mér telst til að alls hafi 47 dagar ársins verið frostlausir, einn í júní, 23 í júlí, 13 í ágúst, 8 í september, einn í október og einn í nóvember. Sá síðasti var 15. nóvember.

Í byggð voru frostlausu dagarnir 83. Sá síðasti var 15. nóvember - sami dagur og á landinu í heild.

Á landinu í heild var síðasti dagur vorsins sem náði -10 stiga frosti 25. maí. Þá fór hiti á Brúarjökli niður í -13,8 stig og þann 5. október fór frostið á sama stað í -12,2 stig. Í byggð fór frost ekki niður fyrir -10 stig frá 27. mars til 7. október.

Fróðlegt er að athuga hvaða staðir þetta eru sem oftast eiga lágmarkshita sólarhringsins hér á landi. Fyrir landið allt eru Brúarjökull, Þverfjall og Gagnheiði, efst á blaði en síðan Sáta og Sandbúðir hálfdrættinga. Af byggðastöðvum á Möðrudalur oftast landslágmarkið. Fáeinar aðrar byggðarstöðvar komast á blað, þar má telja Brú á Jökuldal, Þingvelli og Svartárkot.

Sé litið á byggðir eingöngu er Möðrudalur oftast kaldasta stöð landsins, en síðan koma Svartárkot, Þingvellir, Brú á Jökuldal og Haugur í Miðfirði (í þessari röð).

En lítið á viðhengið.

Skrár tengdar þessari bloggfærslu:

• dægurlágmörk landsins 2011

Athugasemdir

[Pétur Reimarsson (IP-tala skráð) 6.1.2012 kl. 08:11]

Takk fyrir afar áhugavert blogg, Trausti.

Ég var að velta fyrir mér hvernig reiknaður væri meðalhiti ársins á landinu öllu, þ.e. að teknu tilliti til þess að stöðvar færast til, þeim fækkar eða fjölgar og landfræðileg dreifing breytist?

[Ari (IP-tala skráð) 7.1.2012 kl. 22:01]

Talandi um fækkun, mér sýnist Hæll hafa verið skorinn niður sem veðurstöð í þessari viku en hann finnst ekki lengur á vedur.is (skiljanlegt enda hef ég ekki skilið af hverju stöðvar voru á bæði Hæli og Árnesi þar sem ca. 3km eru á milli stöðvanna)

[Trausti Jónsson, 8.1.2012 kl. 01:47]

Pétur. Landsmeðaltal er hægt að reikna nokkuð örugglega séu stöðvarnar margar og þess gætt að hálendisstöðvar séu ekki mismargar. Með því móti skiptir flutningur stöðva ekki svo miklu máli. Nú nota ég 26 stöðvar um land allt - en í fortíðinni eru þær auðvitað færri. Ari, já það er rétt að Hæll hefur lokið hefðbundnum skeytasendingum, en þar er áfram mæld úrkoma og send Veðurstofunni einu sinni á dag. Daglegar úrkomumælingar má sjá á vef Veðurstofunnar. Þar á Hæll að birtast eftirleiðis. Samanburður hitamælinga á Hæl og í Árnesi í átta ár sýnir að meðalhiti ársins er nákvæmlega sá sami á stöðvunum, en lítillega hlýrra er við Hæl á vetrum en í Árnesi (munar 0,3 stigum í janúar) en kaldara á sumrin (munar 0,2 stigum í júlí).

[Ari (IP-tala skráð) 8.1.2012 kl. 13:30]

Takk fyrir þær upplýsingar.  Merkilegt að það sé hlýrra við Hæl að vetri en mig minnir að það séu sennilega ca. 50 m hæðarmunur, er það ekki bara svo að þarna hreyfir vind meira þar sem þetta stendur hærra og kyrrstöðufrostið nær sér ekki upp?