Ekki nógu hlýtt

Þrátt fyrir að spáð sé allvænum hlýindum hér suðvestanlands næstu daga (og vel má vera að fleiri landshlutar njóti þess um tíma) er samt ekkert hlýtt loft í nánd. Allt er undir miskunn skýjahulunnar komið. En það er dálítið flókið upplegg að heimta skýjað að nóttu en léttskýjað að deginum þegar lítið ber á hlýju lofti. Slík hegðunarmynstur er eðlilegast þegar hlýtt loft er yfir landinu, en nú er loftið ekkert sérlega hlýtt og andstætt mynstur hefur undirtökin í köldu lofti, skýjað síðdegis, léttskýjað undir morgun. Ef einhver vindátt er ríkjandi trampar hún auðvitað á dægursveiflu skýjahulunnar hvort sem hlýtt er eða kalt. Þá er einfaldlega skýjað þar sem hin ríkjandi átt stefnir á land, en léttskýjað hinumegin hálendisins.

Engir alvarlegir kuldapollar eru þó í ógnandi nánd en meginvindröst vestanvindabeltisins sýnir þó líf sunnan við land. Það sést á mynd dagsins sem fastir lesendur kannast við.

Kortið sýnir hæð 500 hPa-flatarins í spá reiknimiðstöðvar evrópuveðurstofa um hádegi laugardaginn 16. júlí. Höfin eru blá, löndin ljósbrún. Ísland er neðan við miðja mynd. Bláu og rauðu línurnar eru hæð 500 hPa-flatarins í dekametrum (1 dam = 10 metrar). Því þéttari sem línurnar eru því meiri er vindurinn milli þeirra. Þykka, rauða línan markar 5460 metra hæð, en sú þunna sýnir hæðina 5820 metra.

Það sem strax vekur athygli á myndinni er að nú sést loks í 6 kílómetra hæðarlínuna (600 dam = 6000 metrar), í hæðinni við Asóreyjar. Hún sést helst á tímanum frá miðjum júlí fram í septemberbyrjun, en ekki nema stundum og oftast þá ekki lengi hverju sinni. Norðan hæðarinnar er mikill og breiður hæðarhryggur fullur af eðalhlýju lofti - sem lítið gagnast okkur.

Þessi ruðningur hlýja loftsins norður á bóginn veldur því að í norðurjaðri þess er býsna mikill vindstrengur. Þið sjáið að þéttar jafnhæðarlínur ná allt frá Manitóba í Kanada og austur um til Bretlands. Í vindstrengnum eru snörp lægðardrög sem fara hvert á fætur annars til austsuðausturs frá Suður-Grænlandi til Bretlandseyja og halda framsókn hlýja loftsins í skefjum.

Eitt þessara lægðardraga fer fyrir sunnan land á morgun (föstudag) og býr til lægðina sem á kortinu er yfir Bretlandseyjum og á að valda verulegu skítaveðri þar (við erum heppin að sleppa við það). Næsta lægðardrag er merkt með svartri þykkri línu við Suður-Grænland - það fer sömu leið og það fyrra og sýnir breskum og frönskum enga miskunn.

Við sitjum hins vegar í hægum vindi, aðallega þó norðlægum, í nokkra daga í lofti sem verður frekar að teljast kalt heldur en hlýtt. En ef sól og land finna rétta taktinn geta komið ágætir gamaldags íslenskir sumardagar - sem maður hefði verið fyllilega ánægður með á níunda og tíunda áratugnum. Nú liggur maður gjörspilltur og heimtar meiri hlýindi - ofalinn af blíðu síðustu ára.

Athugasemdir

[Sigurður Þór Guðjónsson, 15.7.2011 kl. 00:53]

Nú er komið hitahrun og skrambans kuldakreppa og ekkert gaman. En við heimtum  samt 2007 veður en þó allra helst 2003 og 2004 veður.

[Hilmar Þór Hafsteinsson (IP-tala skráð) 15.7.2011 kl. 09:48]

Við 'heimtum' ekki eitt eða neitt í sambandi við veðrið félagar, enda væri það fáfengilegt. Hins vegar væri notalegt að fá skýringu á því hvað varð af 'hnatthlýnuninni' margboðuðu sem fylgismenn kolefniskirkjunnar hafa nánast nauðgað inn í hugarfylgsni saklausra skattborgara.

[Sveinn Atli Gunnarsson, 15.7.2011 kl. 10:15]

Hilmar:

Staðbundið veðurlag er ekki það sama og hitastig á heimsvísu.