Þreyjum enn kuldann

Nú er mesti kuldinn í háloftunum skriðinn hjá og þar með tekið eitt skref að skárri tíð. En þegar hlýtt loft nálgast gerist það yfirleitt þannig að fyrst hlýnar uppi, en síðast niðri. Þykktin yfir landinu fór niður fyrir 5200 metra síðastliðna nótt og verður um hádegi á morgun komin upp í um 5300 metra, hlýnun um 5 stig að meðaltali í neðri hluta veðrahvolfs. Um helgina er henni síðan spáð í 5400 metra, 5 stiga hlýnun til viðbótar. Það er samt ekki gott - í óskaheiminum.

Í 5 km hæð er nú 33 stiga frost en á að fara upp í 26 síðdegis á morgun. Í 1400 metra hæð hlýnar hins vegar lítið til morguns. Heldur meira þó sunnanlands en norðan. Norðanáttin á að verða nokkuð stríð á morgun (fimmtudag) og hætt er við því að úrkoman sem fylgir verði hvít. Ekki veit ég hversu víða það verður - en fylgist með því á vef Veðurstofunnar.

Við sjáum hér hefðbundið 500 hPa-veðurkort. Svörtu heildregnu línurnar sýna hæð flatarins í dekametrum (dam=10 metrar). Því þéttari sem þær eru því meiri er vindurinn. Rauðu strikalínurnar sýna þykktina í dekametrum. Því meiri sem hún er því hlýrra er loftið. Það er 5340 metra línan sem liggur yfir Austurlandi, það þykir okkur lélegt á þessum tíma árs, helst viljum við 5460 metra eða meira.

L og H sýna háloftalægðir og háloftahæð. Blái punkturinn er kuldapollurinn sem fór yfir síðastliðna nótt og er hann nú að hringsóla sunnan við land. Hann verður því miður að slaga á þeim slóðum eins langt og séð verður í spám - en minnkar samt að afli og verður misnálægt okkur. Það er erfitt að losna við svona polla yfir sjó á sumrin - nema að bylgjugangur vestanvindabeltisins sparki í þá. Við skulum þó ekkert endilega vera að óska eftir einhverju slíku sparki því það getur kostað frekara vesen, t.d. lagt okkur á brautarteina lægðalestarinnar sem rennir stundum yfir okkur vikum saman á sumrin. En vel má vera að með lagni megi sparka pollinum út af svæðinu án þess að það komi niður á veðri hér.

En slíkt er langt í framtíðinni. Á kortið eru lagðar tvær örvar. Sú rauða sýnir hvar mjög hlýtt loft er í framrás norðan við land, óvenjuhlýtt er óhætt að segja. Ef strönd Noregs tekst að losa sig við þungt sjávarloftið fer hiti þar í um 30 stig, en bara ef. Ef við skoðum rauðu örina nánar sést að hún er að ýta jafnþykktarlínubunka á undan sér í átt til Grænlands.

Brúna örin liggur hins vegar samsíða þykktarlínunum og gengur þar hvorki né rekur með framrás á hlýrra lofti. Allt er þar samsíða hæðarlínum utan um kuldapollinn.

En við þreyjum kuldann. Mér telst til að hiti í Reykjavík sé nú um 1,7 stigi undir meðallagi, en eystra, á Dalatanga, hangir hitinn enn í meðallaginu. En nimbus er að vanda með mánuðinn í gjörgæslu og er áhugasömum bent á að leita þangað varðandi frekari hitaupplýsingar á líðandi stund.

Athugasemdir

[Sigurdur Sigurdarson (IP-tala skráð) 9.6.2011 kl. 08:59]

Hvað hefur þá orðið um „lægðalestina“ eða öllu heldur braut hennar? Hefur hún farið yfir Atlantshafið miklu sunnar eða hefur öllum ferðum hennar verið aflýst þangað til vestan- og norðangangur lægða hættir hér um slóðir?

[Halldór Björnsson (IP-tala skráð) 11.6.2011 kl. 12:29]

Það er áhugavert að skoða hitafrávikakort fyrir hafsvæðið norðan við land. Á skilum Irminger og Austur Grænlandssjávar má sjá veruleg frávik, sem endurspegla tilfærslur í skilunum norður á bóginn, og hugsanlega öflugt

innstreymi Irminger. Eins má sjá tvípól í skilunum SA við landið, en veikari þó.

Það sem vekur mesta athygli mína er þó hversu kalt er í Norður Grænlandshafi. Þar er hiti 1 - 2 gráðum undir meðaltali á stórum svæðum. Engin furða að norðanáttir séu kaldar.

http://ghrsst-pp.metoffice.com/pages/latest_analysis/sst_monitor/ostia/anom_plot.html?i=33&j=1